கனிச்சாறு 4/024
21
உனை அழிக்கும் எல்லை !
படித்து, அறிவு பெற்றாலென்ன?
பளபளப்பாய் வாழ்ந்தாலென்ன?
பிடித்ததடா ‘நாகரிகப்’ பேய்தான் - உள்ளம்
பிறழ்ந்ததடா இனிமேல் குட்டிச் சுவர்தான்!
உடுத்தும்எழில் கண்டாலென்ன?
உண்டுறக்கம் கொண்டாலென்ன?
அடுத்ததடா சீரழிவு பார்க்கே - வழி
ஆனதடா அனைத்துலகப் போர்க்கே!
அறிவியலால் என்னபயன்?
அரசியலால் ஏதுநலன்?
செறிவிழந்து போனதடா வாழ்வில் - உளம்
சீர்குலைந்து வீழ்ந்ததடா தாழ்வில்!
கலைவளர்ச்சி என்னாகும்?
காட்சிநலன் என்னதரும்?
புலைவளர்ச்சி மிகுந்ததடா தம்பி - நெஞ்சு
புண்ணாகிப் போனதடா வெம்பி!
மயிர்ப்புனைவால் யார்க்குப்பயன்?
மழமழப்பால் யார்க்குநலன்?
உயிர்ப்புனைவும் சாம்பிற்றடா தம்பி - நாடு
உடற்புனைவை ஓம்பிற்றடா நம்பி!
நூலுணர்வால் கண்டதென்ன?
நோட்டமிட்டுப் பெற்றதென்ன?
பாலுணர்வில் தோய்ந்ததடா நெஞ்சம் - இனிப்
பாரினிலே மாந்தர்க்கெது மிஞ்சும்!
எட்டுத்திக்கும் ஆண்டாலென்ன?
எழுநிலமும் வென்றாலென்ன?
தட்டுக்கெட்டுப் போயிற்றடா வாழ்க்கை! - நல்ல
தரமிழந்து வீழ்ந்தனை, நீ பூழ்க்கை!
கொம்பின்நுனி நீண்டாலென்ன?
கொத்துமலர் பூத்தாலென்ன?
வெம்பினைநீ பச்சைப்படு பிஞ்சில் - இனி
விளைந்திடுமோ அமைதியுன்றன் நெஞ்சில்!
பகுத்தறிவும் வாய்ந்தாலென்ன?
பல்பொருளும் ஆய்ந்தாலென்ன?
வகுத்தறியும் அறிவிழந்து நின்றாய், இருள்
வாழ்க்கையிலே உனைமறந்து சென்றாய்!
மிகவுயர்ந்த கட்டிடங்கள்!
மின்விளக்குத் தோரணங்கள்!
அகவுயர்ச்சி எனில், அடடா இல்லை! அவை
அத்தனையும் உனையழிக்கும் எல்லை!
-1969