இப்பக்கம் மெய்ப்பு பார்க்கப்பட்டுள்ளது
வெந்நீரில்
வெந்தவன்
அவன்கவிஞன்;அவன்பெயரோ அகில்கான்;சொல்லை
அமுதாக்கும் அவள்பெயரோ ஜபுஉன் னிஸ்ஸா,
அவளுக்கும் அவன்மீது காதல்; டில்லி
அமைச்சர்மகன் அவனுக்கும் அவள்மேல் காதல்.
அவளுக்கோ நினைவாற்றல் அதிகம்; காதல்
அதிபதிக்கோ பேச்சாற்றல் அதிகம்; ஆங்கே
அவன்வருவான் எதற்காக? அதற்கா கத்தான்!
ஆரணங்கும் வந்திடுவாள் அதற்கா கத்தான்!
அன்றொருநாள் அவன்வந்தான். அவளும் வந்தாள்.
அரண்மனையின் பின்புறத்தில் சந்தித் தார்கள்.
"இன்றுமுதல் இளவேனிற் பருவ"மென்றான்.
"இலுப்பைமரம் இங்கினிமேல் பூக்கு"மென்றாள்.
"தென்னையிலே செவ்விளநீர் இரண்டைக் காணோம்;
திருட்டுத்தான் போயிருக்க வேண்டு" மென்றான்.
என்னருமைக் காதலரே! அவற்றைத் தென்னை
எனக்கன்றோ பரிசளித்து விட்ட தென்றாள்.
