இப்பக்கம் மெய்ப்பு பார்க்கப்பட்டுள்ளது
தெரு
ஒருசிலநாள் நம்பிக்கை
உளத்தோங்கத் திரும்பிடுங்கால்
அருநட்புத் தெருவெனவே
அணைத்துமுத்த மிடவிழைவேன்
-தெருவேநான்.
மற்றதுயர் நாட்களிலே
மனஞ்சோர்ந்து திரும்பியுனைப்
பற்றறவே துாவென்பேன்
பண்பிழந்தே சீறிடுவேன் -தெருவேநான்.
சிரித்தமுகம் காட்டிவிடில்
தீப்பிழம்பாய் உனையடுத்தேன்
நெரித்தகொடும் புருவமெனில்
நீர்ஓடை யாய்ப்பாய்ந்தேன் -தெருவேநான்...
கொள்ளையின்பம் நீயறிவாய்
கொடுந்துயரும் நீயறிவாய்
உள்ளமறிந் துமையைப்போல்
உதவினைநீ வாழ்த்தறியேன் -தெருவேநான்...
உன்வடிவம் மேடுபள்ளம்
உன்மணமெல் லாமறிவேன்
என்னுடன் நீ இணைந்ததுபோல்
யாரிணைந்தார்? என்றாலும் -தெருவேநான்...
எங்கிருந்தோ வந்தஎனை
என்னவனென் றினிதேற்றாய்
பங்குகொண்டாய் கனவெல்லாம்
பதைக்கின்றேன் உனைப்பிரிய
-தெருவே நான்.
129
