இப்பக்கம் மெய்ப்பு பார்க்கப்பட்டுள்ளது
திரைவழி கடந்து சென்று
திறமையால் ஈட்டு வாரும்
செறுவழி உழுது செல்வம்
சேர்த்ததை உதவு வாரும்
தருவழி யறிந்து செல்வம்
தக்கவர்க் கருளு வாரும்
ஒருவழி அறமே யாக
உலவிடும் நல்லூர் அவ்வூர் 6
இளஞ்சிறார் பயிலும் பள்ளி
இருப்பதங் கொன்றே ஒன்று
புழங்குவார் இருவர் மூவர்
போய்வரும் தெருவி ரண்டு
வழங்கிடும் கடைகள் மூன்று
வடிவினிற் சிறிய வாகும்
அளவுவார் மக்க ளீட்டம்
ஆயிரத் தைந்நூ றாகும் 7
உருவினிற் சிறிய தவ்வூர்
உளத்தினாற் சிறந்த மாந்தர்
மருவியங் குறைத லாலே
மதிப்பினில் உயர்ந்த தாகும்
உருவுகண் டெள்ளல் வேண்டா
ஓதுவ தறநூல் அன்றோ ?
உரியவர் நல்ல ரானால்
ஒருநிலம் நல்ல தாகும் 8
