12
ஒய்யாரி
‘மோகினி என்றால் அற்புதமான அழகி என்று தானே.....’
‘ஓ, அப்படியா! ஆண்களை மயக்கிப் பிடித்துக் கொள்கிற பிசாசு என்றுதான் சிலர் சொல்கிறார்கள். இல்லையா? ’ அவளுடைய குறும்புத்தனத்துக்கு என்ன பதிலளித்துச் சமாளிப்பது என்ற திகைப்பு அவனுக்கு, ‘உங்க பெயர் மோகினி இல்லையா?’ என்று கேட்டான்.
‘மோகினி என்றே கூப்பிடுங்களேன். இப்ப என்ன கெட்டுப் போகிறது?’ என்று மறுபடியும் ஒரு கேள்வியையே பதிலாகத் தந்தாள் அவள்.
அவள் உண்மையை சாதுர்யமாக மறைக்கவே விரும்புகிறாள் என்பதை உணர்ந்த அவன் அந்தப் பிரச்னையை அப்படியே விட்டுவிட்டான். பேச்சு தடம் மாறி சினிமாவைப் பற்றியும், சினிமா நட்சத்திரங்களைப் பற்றியும் திரும்பியது.
‘நீங்கள் என்ன நினைக்கிறீர்கள்? நான் சினிமாவில் நடித்தால் எப்படியிருக்கும்?’ என்று வினவினாள் அவள், ஸ்டைலாக நின்ற வண்ணம். அவள் அழகை அள்ளிப் பருகின அவன் விழிகள். அவள் வசியச் சிரிப்பும் சுடர்ப் பார்வையும் சிதறினாள். ‘அவள் கண் வெட்டினாளா; சிமிட்டினாளா? விழியைச் சுழட்டினாளா?’ என்ற பெரும் சந்தேகம் ஏற்பட்டது அவனுக்கு.
‘ஊம்ம்.... என்ன?’ என்று கேட்டாள் அவள். ‘ஒண்ணுமில்லையே!’ என்றான் அவன், தான் அவளை அப்படி கவனித்ததைத்தான் அவள் கண்டிக்கிறாளோ என்ற நினைவில்.
