பக்கம்:கனிச்சாறு 1.pdf/142

விக்கிமூலம் இலிருந்து
இப்பக்கம் மெய்ப்பு பார்க்கப்பட்டுள்ளது


எப்படியேனும் இத் தமிழகத்தை
முப்படி உயர்த்திடல் வேண்டும் - என்
மூச்சதற் குதவிடல் வேண்டும்!

முப்படி நிலையில் முதற்படி தமிழ்ப்படி!
முறைப்படி அதன்நலம் வேண்டும்! - முழு
முயற்சியும் அதற்கிடல் வேண்டும்!

தமிழ்ப்படி யேறின் தமிழினம் ஏறும்!
தாழ்நிலை இழிவுகள் மாறும்! - நம்
தலைவிலை எனின் - தரல் வேண்டும்!

தமிழின உரிமையே தமிழ்நில உரிமை
தருமெனில் மறுப்புரை உண்டோ? - இத்
தலைமுறைக்(கு) உழைப்(பு) - அது வன்றோ?

தமிழ்மொழி வாழ்க! தமிழ்மொழி வாழ்க!
தமிழ்மொழி வாழ்க வென் றுரைப்போம்! - அதால்
தமிழினம் மலர்க - வென் றழைப்போம்!

தமிழினம் வாழ்க! தமிழினம் வாழ்க
தமிழினம் வாழ்க - வென் றுரைப்போம் - அதில்
தமிழ்நிலம் தழைக்க - வென் றுழைப்போம்!

எப்படி யேனும் இத்தமி ழகத்தை
முப்படி உயர்த்திடல் வேண்டும்! - என்
மூச்சதற் குதவிடல் வேண்டும்!

"https://ta.wikisource.org/w/index.php?title=பக்கம்:கனிச்சாறு_1.pdf/142&oldid=1513102" இலிருந்து மீள்விக்கப்பட்டது