பாவலரேறு பெருஞ்சித்திரனார் ☐ 143
வருவாய் தமிழ் மகனே!
தமிழ்த்தாய் பெறுந் துயரைவிடத்
தாயின் துயர் பெரிதோ - நம்
தாயின் துயர் பெரிதோ - நிலை
பெரிதோ - அவள்
அமிழ்தாம் தமிழ் மொழியைவிட
அன்னை உரை இனிதோ - நம்
அன்னை உரை இனிதோ - பொருள்
இனிதோ?
(தமிழ்த்)
உயர்வாம் தமிழ் இனத்தைவிட
உற்றார் தொகை பெரிதோ - நம்
உற்றார் தொகை பெரிதோ - நலம்
பெரிதோ? - அவர்
பெயர் மேவிய நாட்டைவிடப்
பெற்றோர் நலம் பெரிதோ - நம்
பெற்றோர் நலம் பெரிதோ - மிகப்
பெரிதோ?
(தமிழ்த்)
மலையாத் தமிழ்ப் போரைவிட
மனையாள் உற வினிதோ - நம்
மனையாள் உற வினிதோ - இதழ்
இனிதோ - அதன்
குலையாப் பெரும் புகழைவிடக்
குழந்தை நலம் பெரிதோ - நம்
குழந்தை நலம் பெரிதோ - நகை
பெரிதோ?
(தமிழ்த்)
துயர் தூவிய அடிமைத்தனம்
தொலையாப் பெரும் பகைமை - என்றுந்
தொலையாப் பெரும் பகைமை - நெடும்
பகைமை - தமை
அயர்வே தவிர்த் தழிக்கா விடில்
அடடா, தொலைந் தனையே - அட
அடடா, தொலைந் தனையே - அழிந்
தனையே!
(தமிழ்த்)
