32 ☐ கனிச்சாறு - இரண்டாம் தொகுதி
இலக்கிய விழைவிலர்; இலக்கணம் படிக்கிலர்;
எழுத்திலும் உரையிலும் இழிகுவர்;
கலக்குறு மனத்தினர்; கசிதுயர் கருதிலர்;
களவிலுங் கொலையிலும் அழிகுவர்;
துலக்கமில் மணங்கொளத் துடிப்புறு முளத்தினர்;
தொலைகிலாப் பிரிவினால் ஒழிகுவர்;
வலக்கரம்; கரவுளம்; வனைவிலர்க் கிராப்பகல்
வருந்திநெஞ் சழன்றுயிர் கழிகுவேன்!
5
பயனறு வினைசெயப் பலபடக் கரைந்திழி
பகட்டினில் உளமுயிர் கூடுவர்;
வயின்வயின் இளையவர் மடந்தையர் குழுமுவர்;
வரை துறை யறநகை யாடுவர்;
மயலுற விழிதகை யுரைதருஞ் சுவடிகள்
மலிகடை புகுந்தவர் தேடுவர்;
வியனுறு தமிழக வினைவழி வுறவுளம்
விசிந்துயிர் விசிந்துடல் வாடுவேன்!
6
அறிவியல் உயர்வறிந் தனரென முழங்குவர்;
அடிப்படை உளவுயர் வழிந்தனர்;
பொறியிய லறிந்தன மெனவுரை தருக்குவர்;
புகுபயன் மறந்தொழுங் கொழிந்தனர்;
நெறிமுறை பிறழ்ந்தனர்; மனையறந் துறந்தனர்!
நிலையினில் நொடிநொடி யிழிந்தனர்;
குறியிலர்; பிடியிலர்; துணிவிலர்; வினையிலர்;
குலைவுறு மவர்க்குளம் அழுங்குவேன்!
7
முதுதமிழ் உலவிய முனைப்பொழு திலங்கிய
முழுவளங் குறைவுற வினைப்பயன்
எதுவென அறிகிலன்; இடர்ப்படும் மனத்தினன்;
இலவென அலைகுவன்; நினைப்பிலன்;
மதுமலர்க் குழலியர் - பகைவரின் மனைவியர்,
மறத்தமிழ் அரசரின் குலைப்பினால்
கொதிபெறும் உளத்தொடு கொடுத்தவெங் கொடுசொலோ,
குலைத்தது குலைத்ததென் றரற்றுவேன்!
8
