பாவலரேறு பெருஞ்சித்திரனார் ☐ 49
31
பள்ளியை மூடுங்கள் !
படிப்பை நிறுத்துங்கள்!
பள்ளியை மூடுங்கள்!
பண்பாட்டிற் குயிர் ஊட்டுங்கள்! - வெறும்
நடிப்பெதற்கு? - போலி
நடையெதற்கு? - ஆடும்
நாடகத் திரை மாற்றுங்கள்!
அறிவை அடக்குங்கள்;
ஆய்வை ஒடுக்குங்கள்;
அகத்தினில் ஒளியேற்றுங்கள்! - பணச்
செறிவெதற்கு? - பொய்ம்மைச்
சிறப்பெதற்கு? - கொண்ட
செயலுக்குத் தெளிவூட்டுங்கள்!
நிலவைப் பிடித்தென்ன?
நிலத்தில் இருந்தென்ன?
நிறைவான வாழ்வில்லையே! அற
நெறிகளெங்கே? - மன
நேர்மை யெங்கே? - தீய
நிகழ்ச்சிக்கு வீழ்வில்லையே!
எழில்கூட்டும் நகரங்கள்!
எண்ணற்ற ஊர்திகள்!
ஏழ்மைக்கு விடிவில்லையே! - கல்வி
ஏற்றமெங்கே? - மெய்ம்மை
இன்பமெங்கே? - புன்மை
இழிவுக்கு முடிவில்லையே!
செயலுக்குக் குறைவில்லை;
சீருக்குத் தாழ்வில்லை;
செலவுக்கு வரவில்லையே! - நல்ல
வயல்களுண்டு; - நீர்க்கால்
வாய்களுண்டு! - வீணர்
வாய்க்கொரு பூட்டில்லையே!
