அந்தாதி
92
அந்துவன் கீரன்
லாம் வெவ்வேறு காரணங்களின் சிறப்புப்பற்றி வேறு வேறு பெயர்கள் பெற்றன. எனினும் அவைகளும் சொற்றொடர் நிலைகளே. என்றாலும் அந்தத்தை ஆதியாகக்கொண்டு வரும் ஒரு சிறப்பினைப்பற்றி அந்தாதி எனப் பெயர் பெற்ற நூல்களே அந்தாதி என்று வழங்கப்படும்.
சங்க காலத்திலேயே இத்தகைய சொற்றொடர் நிலை தொடங்கி விட்டது. பெருஞ்சோற்றுதியஞ் சேரலை முரஞ்சியூர் முடிநாகராயர் பாடிய, “மண்டிணிந்த நிலனும்” என்ற புறநானூற்றுப் பாடலிலேயே அந்தாதித்தொடை வந்தது. காப்பியாற்றுக் காப்பியனார் பதிற்றுப்பத்துள் நான் காம்பத்தினை அந்தாதியாகவே இயற்றியுள்ளனர். ஆயினும் இறுதிப் பாடலின் அந்தம் மட்டும் முதற்பாடலின் ஆதியோடு மண்டலிக்கப்படவில்லை. நக்கீரதேவ நாயனார், கபில தேவநாயனார் , பரணதேவ நாயனார் ஆகிய மூவரும் இயற்றிய அந்தாதிகள் பதினோராந் திருமுறையிற் சேர்க்கப்பட்டடுள்ளன. இம் மூவரும் சங்க காலத்துக் கபில பரண நக்கீரரே என்று கொள்ளின், அந்தாதி தோன்றிய காலம் கி. பி. முதல் அல்லது இரண்டாம் நூற்றாண்டு என்றே கொள்ளலாம். இம்மூவரும் பிற்காலத்தவர் என்று வேறாகக் கருதும் கொள்கையும் உண்டு. அவர் கொள்கைப்படி ஆறாம் நூற்றாண்டின் தொடக்கம் என்று கொள்ளலாம்.
சங்க காலத்துத் தொகை நூல்களுள் புறநானூறு, அகநானூறு, சிறுபாணாற்றுப்படை ஆகிய இவற்றுள் அந்தாதித்தொடை வந்திருத்தலானும், பதிற்றுப்பத்துள் ஒரு பதிகமே அந்தாதியாக வந்திருத்தலானும், அந்தாதிக்காலம் கி. பி. இரண்டாம் நூற்றாண்டிலேயே தொடங்கிவிட்டது என்பது நன்கு புலனாகும்.
நக்கீரதேவ நாயனார் இயற்றிய, 'கைலைபாதி காளத்திபாதி' அந்தாதி, நல்ல நோக்கு உடையதாய், உள்ளத்தை உருக்கும் கவினுடையது. கபிலதேவ நாயனாரும் பரணதேவ நாயனாரும் ஒன்று என்று தொடங்கி, ஒன்று என்று முடித்துச் சிவபெருமான் திருவந்தாதியென இருவரும் ஒரு பெயரிட்டு, இரு நூல்கள் செய்து முடித்தார்கள். இவ்விரண்டு நூல்களிலும் உள்ள வெண்பாக்களில் இரண்டு இரண்டு அடிகள் மடக்காக (யமகமாக) அமைந்துள்ளன. இவையே பின்னால் யமக அந்தாதி பாடுவதற்கு வழிகாட்டி எனலாம். பின்னர்க் காரைக்காலம்மையார் பாடிய அற்புதத் திருவந்தாதி, சேரமான் பெருமாள் நாயனார் பாடிய பொன்வண்ணத்தந்தாதி, ஆழ்வார்கள் இயற்றிய அந்தாதிகள் முதலியன மல்கின. திருநூற்றந்தாதி சமண சமயத்தவரால் இயற்றப் பட்டது; பெரிதும் பாராட்டப்படுவது.
இவற்றிற்குப் பின்பு நம்பியாண்டார் நம்பிகள் இயற்றிய திருத்தொண்டர் திருவந்தாதி கட்டளைக்கலித்துறையால் அமைந்தது. இது 63 நாயன்மார் வரலாற்றை வகைப்படுத்துப் பாடுகின்ற வகை நூலாக அமைந்து, வரலாற்றுச் சிறப்பெய்தி நிற்கின்றது. பின்பு தோன்றிய பதிற்றுப்பத்தந்தாதிகள் ஓசை நயமும் பொருள் நயமும் வாய்ந்தவை. பாடல்களை நினைவு கூர்தலுக்கு அந்தாதி அமைப்புப் பேருதவியாக இருந்துவருகிறது.
வெண்பாவந்தாதி, கலித்துறையந்தாதி, ஒருவகை ஓசைக்குப் பத்தாகப் பத்துவகை ஓசையில் பலவகை விருத்தங்களாலும் பாடப்படும் பதிற்றுப்பத்தந்தாதி, வண்ணமுங் கலைவைப்புந் தவறாமல் பதினாறு கலைவைப்பு ஒரு பாடலில் அமைத்து, அப்படி முப்பது பாடல் அந்தாதியாக இயற்றும் ஒலியந்தாதி, அவ்வாறே முப்பத்திரண்டு கலைவைப்பு ஒரு பாடலில் அமைத்து, முப்பது பாடல் அந்தாதியாக இயற்றும் கலியந்தாதி, அடி தோறும் முதற்சீர் மடக்காக வரும் யமக அந்தாதி, திரிபு அந்தாதி, உதட்டோடு உதடு படாமற் பாடக்கூடிய நிரோட்டக யமக அந்தாதி என்றிவ்வாறு பல்வகை யாப்பாலும் அந்தாதிகள் விரிவு பெற்றன.
கரைவினாற் காரைக்காலம்மையார் செய்த அற்புதத் திருவந்தாதி கவியுலகிற் பெண்களுக்கு ஓர் உயர்ந்த நிலைமையை வழங்குந் திறனுடையது. முதலாழ்வார்கள் செய்த அந்தாதிகள் அன்பர்களுக்கு முகுந்தனை ஞான விளக்கிட்டுக் காட்டும் நிலைமையன. சேரமான் பெருமாள் நாயனார் பாடிய பொன்வண்ணத்தந்தாதி பொன் வண்ணமாகவே மிளிர்கின்றது. கம்பர் பாடிய சரசுவதியந்தாதியும், சடகோபர் அந்தாதியும் கலையுலகில் அன்பர் நெஞ்சத்தை ஈர்த்துக் களிப்பில் மூழ்கச் செய்யும். பரஞ்சோதி முனிவர் பாடிய மதுரைப் பதிற்றுப்பத்தந்தாதி மாட்சிமை வரையறுக்க வொண்ணாதது.
குட்டித் திருவாசகம் என்று போற்றப்படும் திருக்கருவைப் பதிற்றுப்பத்தந்தாதி, ”கன்னற்பாகில் கோற்றேனிற் கனியிற் கனிந்த கவி”களால் யாக்கப்பட்டது. இந்த நூற்றாண்டின் தொடக்கத்தில் பாம்பன் குமரகுருதாச சுவாமிகள் செய்துள்ள குமரவேள் பதிற்றுப்பத்தந்தாதி, கனிந்த பத்தியும் கவிப்பண்பும் இன்னோசையும் எளிய நடையும் உடையதாகிச் சிறந்து விளங்குகின்றது. ந. சே.
அந்தி இளங்கீரனார் கடைச்சங்கம் மருவிய புலவர் (அகம். 71).
அந்தி ஒளி சூரியனது மறைவிற்குப்பின் காணப்படும் ஒளி. வைகறையிலும் சூரியன் தோன்றுமுன் இத்தகைய ஒளி இருக்கும். காற்று மண்டலத்தின் மேற்பகுதிகளில் சூரிய ஒளி பிரதிபலித்துப் புவியை அடைவதால் இவ்விளைவு தோன்றுகிறது. காற்று மண்டலத்தில் நிகழும் ஒளிக்கோட்டமும், ஒளிச்சிதறலும் இதற்கு ஓரளவு காரணமாகின்றன. சூரியன் அடிவானத்திற்கு 18° கீழே செல்லும்வரை அதன் ஒளியை இவ்வகைகளில் காற்று மண்டலம் புவிக்கு அனுப்புகிறது. ஆகையால் அந்தி ஒளி உள்ள நேரம் அட்சரேகையையும் பருவத்தையும் ஒட்டி வேறுபடும். பூமத்தியரேகைப் பகுதிகளில் இது ஏறக்குறைய ஒரு மணி நேரம் இருக்கும். உயர்ந்த அட்சரேகைப் பகுதிகளில் இது அதிக நேரம் இருக்கும். துருவ மண்டலத்தில் கோடையில் சூரியன் அடிவானத்தினின்று 18°-க்குக் கீழே செல்லாமலே இருக்கும் இடங்களில் இரவு முழுவதும் அந்தி ஒளி இருக்கும்.
அந்திமான் இடையெழு வள்ளல்களுள் ஒருவன்.
அந்திரோகிலீசு ஒரு ரோம நாட்டு அடிமை, தன் எசமானிடமிருந்து தப்பித்து ஓடிப்போய் ஒரு குகையுள்ளே ஒளிந்துகொண்டான்; அங்கு வருந்திக் கொண்டிருந்த ஒரு சிங்கத்தின் பாதத்தில் தைத்திருந்த முள்ளை எடுத்துவிட்டான். பிறகு இவன் பிடிபட்டு, ஒரு சிங்கத்துடன் போர் புரியும்படி தண்டிக்கப்பட்டான். ஆனால் போர் புரிய வந்த சிங்கம் இவனே தன் துன்பத்தை நீக்கியவன் என்று அறிந்து, அவனுக்கு ஒரு தீங்கும் செய்யாமல் இருந்தது. இது பண்டைய ரோமக் கதைகளில் ஒன்று.
அந்துவன் சேர மன்னன்; அந்துவஞ்சேரலிரும் பொறை எனவுங் கூறப்படுவான். இவன் மகன் செல்வக்கடுங்கோ வாழியாதன் என்பவன் (பதிற். ஏழாம் பதிகம்).
அந்துவன் கீரன் : அந்துவன் மகனாகிய கீரன் என்பது பொருள்; ஒரு வள்ளல் ; காவட்டனாரால்
