பக்கம்:கலைக்களஞ்சியம் 1.pdf/175

விக்கிமூலம் இலிருந்து
இப்பக்கம் மெய்ப்பு பார்க்கப்பட்டுள்ளது

அயக்காந்தத் தன்மை

135

அயர்லாந்து


அயக்காந்தத் தன்மை (Ferro-magnetism): பார்க்க : காந்தத்துவக் கொள்கைகள்.

அயக் கான்கிரீட்டு (Ferro-concrete): இது வலுவாக்கிய கான்கிரீட்டு என்றும் கூறப்படுகிறது. கான்கிரீட்டிற்குள் எஃகு கம்பிகளை வைத்துக் கட்டட வேலைக்கு உபயோகிக்கும் முறை இவ்வாறு அழைக்கப்படுகிறது. அதிகமான தகவினாலும் (Stress) கான்கிரீட்டு நசுங்கியோ அழுந்தியோ போவதில்லை. ஆனால் அதன் இழுவலிமை மிகக் குறைவு. எஃகின் இழு வலிமை அதிகம். ஆகையால் இவ்விரு பொருள்களையும் தக்க விகிதத்தில் பயனாக்கிப் பலவேறு வகையான தகவுகளையும், பலவேறு அளவுள்ள பாரங்களையும் தாங்க ஏற்றவாறு கட்டடங்களை அமைக்கலாம். இவ்வாறு கான்கிரீட்டை. வலுப்படுத்தும் முறையை மானியர் என்ற தோட்டக்காரர் 1860-ல் கண்டுபிடித்தார் எனக் கருதுகிறார்கள்.

அயக் கான்கிரீட்டினால் கட்டடம் கட்ட, முதலில் மரத்தினாலோ, உலோகத் தகடுகளாலோ, அதே வடிவுள்ள சட்டம் அமைக்கப்படுகிறது. பின்னால் ஊற்றப்படும் கான்கிரீட்டிற்கு இது வார்ப்படமாக அமைகிறது. இதற்குள்ளேயும் இதன் மேலும் எஃகு கம்பிகள் பொருத்தப்படுகின்றன. இதன்பின் புதிதாகத் தயாரிக்கப்பட்ட கான்கிரீட்டு வார்ப்பிற்குள் ஊற்றப்படுகிறது. அது இறுகியபின் எஃகு கம்பிகள் அதில் பதிந்து அத் துடன் இணைந்துவிடுகின்றன. முன்னர் மரமும், எஃகும் பயனாகி வந்த பல கட்டட வேலைகளுக்குத் தற்காலத்தில் அயக் கான்கிரீட்டுப் பயனாகிறது. இது மரத்தை விட அதிகமான வலுவும் உறுதியும் கொண்டது. இதன் தீ யெதிர்க்கும் திறன் மரம், எஃகு இவற்றின் திறனை விட அதிகம். பார்க்க : கான்கிரீட்டு.

அயர்லாந்து: பரப்பு : 26,600 ச. மைல். மக் : 29.6 இலட்சம் (1951). அட்லான்டிக் சமுத்திரத்தில் பிரிட்டனுக்குச் சிறிது மேற்கே அமைந்துள்ள ஒரு தீவு. பிரிட்டனுக்கும் இதற்கும் இடையே செயின்ட் ஜார்ஜ் கால்வாய், ஐரிஷ் கடல், வடகால்வாய் முதலியன இருக்கின்றன. இத்தீவின் கிழக்குக்கரை நேராகவே யமைந்துள்ளதாயினும், மேற்குக்கரையில் பல கடற்குடைவுகள் இருக்கின்றன. இத்தீவில் உள்ள மிக உயர்ந்த மலைகள் 3,400 அடி உயரம்; அவை வடபகுதியிலும் மேலைக்கரையோரமாகவும் இருக்கின்றன. தீவின் மேற்குப் பகுதியில் மக்கள் தொகை குறைவு. வடக்கேயும், தெற்கேயும் உள்ள மலைப் பிரதேசங்களுக்கிடையே சமநிலம் அமைந்திருப்பதால் இத்தீவு ஒரு கிண்ணம் போல் தோன்றுகிறது. இத்தீவிலுள்ள மிக நீண்ட ஆறு ஷானன் என்பது. இந்த ஆறு அட்லான்டிக் கடலோடு கலக்கிறது. இத்தீவில் மழை மிகுதியாக உண்டு. வட அட்லான்டிக் வெப்ப நீரோட்டம் இத் தீவின் மேற்குப் புறமாக ஓடுவதால், குளிர் காலத்திலும் இங்குக் குளிர் அதிகமாக இல்லை. கோடையில் சராசரி வெப்பநிலை 60° பா ; குளிர்காலத்தில் 40° பா. இத்தீவு பசுமையான புல்வெளிகள் நிறைந்துள்ளதால், மரகதத் தீவு என்னும் பெயர் பெற்றுள்ளது. மீன் பிடிப்பது இங்குள்ள மக்களின் பலருக்குத் தொழில், ஷானன் ஆற்றில் லிமெரிக் என்னுமிடத்திற்கருகே ஒரு நீர்த் தேக்கம் கட்டப்பட்டுள்ளது. ஓட்ஸ், பார்லி, பீட்கிழங்கு, உருளைக்கிழங்கு முதலியவை விளைகின்றன ; பன்றிகள், குதிரைகள், ஆடுகள் மிகுதியாக உள்ளன; பீட் சர்க்கரை அதிகமாக உற்பத்தியாகிறது. பால் பண்ணைத் தொழில் இங்கு முக்கியமானது.

இத்தீவில் ஆதியில் வசித்துவந்த மக்கள் கெல்ட் இனத்தவர். பிற்காலத்தில் டேனர்களும் ஆங்கிலேயரும் கெல்ட்களோடு கலந்தனர் ; பிராடஸ்டென்ட் மதத்தவராகிய ஆங்கிலேயர்கள் பெரும்பாலும் வடகிழக்கே அதிகமாக வசிக்கின்றனர். பெரும்பான்மை அயர்லாந்து மக்கள் கத்தோலிக்கர்கள்.

இங்குள்ள மக்களில் பெரும்பாலோர் விவசாயிகள். கம்பள நெசவு, தட்டுமுட்டுச் சாமான்கள், சவர்க்காரம் முதலியவை செய்தல் இங்கு நடக்கும் கைத்தொழில்கள். வெண்ணெய் முதலிய பொருள்கள் இங்கிலாந்திற்கு ஏற்றுமதி செய்யப்பட்டுக் கரி முதலிய தாதுப் பொருள்கள் இறக்குமதி செய்யப்படுகின்றன.

அயர்லாந்து

முற்காலத்தில் அயர்லாந்து மக்களின் மொழி கேலிக் (Gaelic) என்பது ; ஆங்கில ஆட்சியில் ஆங்கிலம் பயிற்சி மொழியாயிற்று. தென் அயர்லாந்து சுதந்திரம் எய்தியபின் மறுபடியும் கேலிக் மொழியே அந் நாட்டு மொழியாயிற்று. அதற்கேற்ப அந்நாட்டின் பெயரும் ஏரே (Eire) என்று மாற்றப்பட்டுள்ளது. பிரிட்டிஷ் காமன்வெல்த்தில் உள்ள வட அயர்லாந்தில் ஆங்கிலமே நாட்டு மொழியாயுள்ளது.

ஆங்கிலேயர் ஆட்சியிலிருந்து விடு தலை பெறுவதற்காகப் போராடிய காலத்தில் ஏரே மக்கள் தம் நாட்டின் முன்னேற்றத்தைக் கவனிக்க முடியவில்லை. ஆட்சி புரிந்த ஆங்கிலேயர்களும் அவர்களுடைய நன்மையைக் கருதியவர்களாக இருக்கவில்லை. சுதந்திரம் அடைந்தபின் ஏரே மக்கள் தம் நாட்டை முன்னேற்றமடைவிக்க முயல்கின்றனர். முக்கியமான நகரங்கள் : டப்ளின் (சுதந்திர அயர்லாந்தின் தலைநகரம்) ; மக்: 5,21,322 (1951) ; பெல்பாஸ்ட் (வட அயர்லாந்தின் தலைநகரம்); மக்: 4.43.670 (1951).