ஆல்கஹாலும் கைத்தொழிலும்
429
ஆல்கால்
ஆல்கஹால் எவ்வாறு பயனாகிறது என்பதையொட்டி அதனுடன் சேர்க்கப்படும் பொருளும் அதன் அளவும் வேறுபடும். தனி ஆல்கஹாலைப் பெட்ரோலுடன் கலந்து மோட்டார்களில் பயன்படுத்துகிறார்கள். இதில் ஆல்கஹாலுடன் மண்ணெண்ணெய், பென்சீன், ஈதர், பெட்ரோல் ஆகிய பொருள்களில் ஒன்று கலந்திருக்கும். இந்தியாவில் இதற்கு மண்ணெண்ணெயை உபயோகிக்கிறார்கள். இது சக்தி ஆல்கஹால் (Power alcohol) எனப்படும்.
தொழில்களில் ஆல்கஹால் மிக முக்கியமாகக் கரைப்பானாகப் பயன்படுகிறது. தண்ணீருக்கு அடுத்தபடியாக மிக அதிகமாகப் பயன்படும் கரைப்பான் இதுதான். இதைத் தக்கபடி கலப்படம் செய்தபின் இது பல தொழில்களில் பயன்படுகிறது. ஆல்கஹால் பல பொருள்களைக் கரைக்கும் திறனுள்ளது. ஆகையால் டிங்சர்களையும் ஆல்கலாயிடுகள், பிசின்கள், ஆவியாகும் எண்ணெய்கள் முதலியவற்றின் கரைவுகளையும் பெற இது மிக முக்கியமானது. ஒரு பானமாகப் பயன்படுவதைத் தவிரக் காடி, ஈதர், குளோரோபாரம், சாயங்கள் ஆகிய ரசாயனப் பொருள்களின் தயாரிப்பிற்கு இது முக்கியமான மூலப்பொருளாகும். சுத்தமான ரசாயனப் பொருள்களைத் தயாரிக்கவும், துப்புரவாக்கும் பொருளாகவும் உபயோகப்படுகிறது. பல விஞ்ஞான வேலைகளுக்கு இது தேவை. பொருட்காட்சிச் சாலையிலும் ஆஸ்பத்திரியிலும் பிராணிகளின் உடல்களையும் உறுப்புக்களையும் ஆல்கஹாலில் பாதுகாத்து வைக்கிறார்கள். மெருகெண்ணெய்கள், கறையகற்றிகள், அரக்குச் சாயங்கள், வர்ணங்கள், சவர்க்காரம், அலங்காரப் பொருள்கள், செயற்கைத் தோல், மெழுகு துணி, வெடிமருந்துகள், தீக்குச்சி, சலனப்படங்கள், மை, சாயங்கள், அச்சு வேலை, மின்சார அச்சு, புகையிலை, மயக்க மருந்துகள், நச்சு நீக்கிகள் முதலிய பல பொருள்களின் தயாரிப்பில் ஆல்கஹால் இன்றியமையாதது.
பெட்ரோல் குறைவான இந்தியா, ஜெர்மனி, பிரான்ஸ் போன்ற நாடுகளில் சக்தி ஆல்கஹால் ஏராளமாகப் பயன்படுகிறது. இதைக்கொண்டு மோட்டார் எஞ்சினை ஓட்டலாம். தற்கால எஞ்சின்கள் தாங்கக் கூடியதைவிட இதன் ஆவியை அதிகமாக அழுத்தினால் தான் இதைக்கொண்டு எஞ்சினைத் திறமையாக இயக்க முடியும். இதைக்கொண்டு குளிர்ந்த நிலையில் எஞ்சினை ஓடும்படி தொடக்கிவைக்க முடியாது. ஆகையால் இதைத் தனியே பயன்படுத்தாமல் பென்சால், பெட்ரோல், ஈதர் முதலிய பொருள்களோடு கலந்து பயன்படுத்துகிறார்கள். உலகத்தின் திரவ எரிபொருள் வசதிகளை ஆல்கஹால் அதிகமாக்குகிறது. இதன் அழுத்த விகிதமும், ஆக்டேன் எண்ணும் (Octane Number) பெட்ரோலைவிட அதிகமானதாலும், எஞ்சினில் படியும் கரி இதில் குறைவானதாலும், இதைத் தூய நிலையில் பெற முடிவதாலும் இது பெட்ரோலைவிடச் சிறந்தது. பெட்ரோல் 80 பகுதியும் ஆல்கஹால் 20 பகுதியும் கொண்ட பெட்ரோல்-ஆல்கஹால் கலவையைப் பயன்படுத்துவதால் ஆல்கஹாலைத் தனியே பயனாக்குவதால் நேரும் குறைகள் உண்டாவதில்லை. ஆகையால் இது தற்காலத்தில் எல்லாவகை மோட்டார் எஞ்சின்களிலும் உபயோகப்படுகிறது. இத்தகைய கலவையில் ஒரு முக்கியமான விஷயத்தைக் கவனிக்கவேண்டும். கலவையிலுள்ள பொருள்கள் வெவ்வேறாகப் பிரிந்துவிடக் கூடாது. ஆதலால் இதில் பென்சாலைப்போன்ற பொருள்களைக் கலந்து அவை ஒன்றாக இணைந்திருக்குமாறு செய்கிறார்கள்.
சக்தி ஆல்கஹால் இந்தியாவில் உற்பத்தியாகிறது. இதைப் பெட்ரோலுடன் கலந்து பயனாக்குவதால் பெட்ரோல் இறக்குமதி குறையும். ஆனால் பெட்ரோலை விட இதற்கு விலை அதிகம். இதனால் இது பெட்ரோலுடன் போட்டியிட முடிவதில்லை. இதனால் சக்தி ஆல்கஹால் தொழில், அரசாங்கத்தின் உதவிபெற்று அதன் கட்டுப்பாட்டிற்கு உட்பட்டிருக்கிறது. பெட்ரோலையும் இதையும் கலந்தே உபயோகிக்க வேண்டுமென்று கட்டாயப்படுத்தும் சட்டம் இந்தியாவில் பல இராச்சியங்களில் உள்ளது. ஈ. என். பா.
ஆல்காக்கள் குளம், குட்டை, ஆறு, கடல் முதலிய எல்லாவகை நீர்நிலைகளிலும், ஈரமான இடங்களிலும் வளரும் மிக நுண்மையான ஓரணுத் தாவரங்கள். சில நீலப்பச்சை, சில பச்சை, சில பழுப்பு, சில சிவப்பு நிறமாகத் தோன்றும். இவையெல்லாவற்றிலும் பச்சையம் (Chlorophyll) உண்டு. இவை அதன் உதவியால் சூரியவெளிச்சத்தைக் கொண்டு ஒளிச்சேர்க்கையினாலே தங்களுக்குத் தேவையான உணவுப் பொருள்களை ஆக்கிக் கொள்ளும் சுதந்திர உயிர் வகைகள். பார்க்க: பாசி.
ஆல்காட், ஹென்ரி ஸ்டீல் (1832-1907) அமெரிக்க அறிஞர். பல்கலைக் கழகப் படிப்பு முடிந்ததும் விவசாயியாக இருந்தார்.
உதவி : பிரமஞான சபை, சென்னை.
அமெரிக்க உள்நாட்டுப் போர்க் காலத்தில் போர்வீரராக இருந்து கர்னல் பதவி பெற்றார். அதன் பின் சட்டம் பயின்று வழக்கறிஞராக வேலை பார்த்தார். 1875-ல் பிளவட்ஸ்கி அம்மையாருடன் சேர்ந்து பிரமஞான சபையை நிறுவி, அதன் முதல் தலைவராக இருந்து, அச்சங்கம் உயர்ந்த நிலை எய்துமாறு உழைத்தார். சிறந்த நாவலர். பிரமஞானம் பற்றி நூல்கள் இயற்றியுள்ளார். பௌத்த மதத்தில் மிகுந்த பற்றுடையவர். ஹரிஜனங்களுக்காகப் பல பாடசாலைகள் நிறுவி உதவினார். மக்கள் இனத்துக்குச் சேவை செய்த பெரியார்களுள் ஒருவர்.
ஆல்கால் (Algol) மாறும் நட்சத்திரங்களுள் பிரசித்திபெற்றது. ஐந்துமணி நேரத்தில் ஒளி குறைந்து வந்து, மங்கலாகிப் பின் அடுத்த ஐந்துமணி நேரத்தில் ஒளி பெருகிப் பிரகாசிக்கிறது. இரண்டு நாட்கள் பத்துமணி நேரமான பிறகு மறுபடியும் இதுபோல் நிகழ்கிறது. இது சமாகமமாகும் இரட்டை நட்சத்திரங்களுள் ஒன்று. பெரியது ஒளி குன்றியது. அது மற்றதை ஒரு தடவை சுற்றி முடியும்போது ஒளியுள்ள நட்சத்திரம் மறைந்துவிடுகிறது. இந்நிகழ்ச்சியை வெறுங் கண்ணால் பார்க்கலாம்.
இவ்வாறு விட்டுவிட்டு ஒளி விடுவதால் இதைப் பார்த்தால் கேடு நேரும் என்று எண்ணி, மேனாட்டுப் பண்டை வானசாஸ்திரிகள் இதைப் பூத நட்சத்திரம் (Demon Star) என்று அழைத்தனர். இது 100 ஒளி ஆண்டுத் தொலைவில் உள்ளது. இரண்டு நட்சத்திரங்களின் இடையிலுள்ள தொலைவு 60 இலட்சம் மைல்களாகும். பத்தாம் நூற்றாண்டிலிருந்த ஆல்சூபி என்பவர்-இதைச் சிவந்த நட்சத்திரமாகக் கூறியிருப்பினும், இப்போது வெண்மையாகவே இருக்கிறது.
இந்த மண்டலத்தில் இரண்டு அழகான நட்சத்திரத் திரள்கள் (Star clusters) உள்ளன. வெறுங்-
