பக்கம்:கொங்குநாடும் சமணமும்.pdf/65

52 / புலவர் செ.இராசு

1.⁠ சிக்கபெட்டா எனப்படும் சிறியமலை ‘சந்திரகிரி’ என அழைக்கப்படுகிறது. அப்பெயர் சந்திரகுப்தன் பெயரால் ஏற்பட்டது என்பர்.¹⁷

2.⁠ சந்திரகிரியில் உள்ள ஒரு குகை ‘பத்திரபாகு குகை’ எனக் கூறப்படுகிறது. அங்குப் பத்திரபாகுவின் திருவடிகள் கல்லில் பொறிக்கப்பட்டுள்ளன. அங்குதான் பத்திரபாகு சல்லேகனை விரதமிருந்து உயிர் நீத்தார் என்பர். அதைக் குறிக்கும் பிற்காலக் கல்வெட்டுகளும் உள்ளன.¹⁸

3.⁠சந்திரகிரி மலையில் ‘சந்திரகுப்த பசதி’ என்ற சமணப்பள்ளி உள்ளது. அது சந்திரகுப்தன் உயிர்நீத்த இடத்தில் கட்டப்பட்ட நினைவுப்பள்ளி ஆகும்.¹⁹

4.⁠ பத்திரபாகு, சந்திரகுப்தன் ஆகியோர் மகத நாட்டிலிருந்து சிரவணபெளகொளா வருகை புரிந்த வரலாற்று நிகழ்ச்சிகள் 90 கற்சிற்பங்களாகத் தொடர்ந்து வெட்டப்பட்டுள்ளன.²⁰

6.⁠சந்திரகிரியில் உள்ள பார்சுவநாத பசதியின் வலப்புறப் பாறையில் பிரபசந்திர முனிவர் என்பவர் சல்லேகனை விரதமிருந்து உயிர் நீத்ததைக் குறிக்கும் பழங்கன்னடக் கல்வெட்டின் முற்பகுதியில் பத்திரபாகு முனிவர் சிரவணபெளகொளா வந்த செய்தி விவரமாகக் கூறப்பட்டுள்ளது.²¹ அங்குள்ள வேறு சில பிற்காலக் கல்வெட்டுகளும் மேற்கண்ட நிகழ்ச்சியைச் சுட்டிக் கூறுகின்றன. பல இடங்களில் பத்திரபாகு, சந்திரகுப்தன் பெயர்கள் இணைந்து காணப்படுகின்றன.²²

6.⁠அரிசேனரின் ‘பிருகத்கதாகோசம்’, யதி விருசபரின் ‘திலோத பண்ணத்தி’, இரத்தினநந்தியின் ‘பத்திரபாகு சரிதம்’, சித்தானந்தகவியின் ‘முனிவம்சாப்யுதம்’, தேவ சந்திராவின் ‘இராஜாவளி சரிதம்’ போன்ற பல பிற்கால இலக்கியங்களில் பத்திரபாகு, சந்திரகுப்தன் ஆகியோரின் சிரவணபெளகொளா வருகை விளக்கமாகக் கூறப்பட்டுள்ளன.²³

மேற்கண்டவை அனைத்தும் பிற்காலச் சான்றுகளே ஆயினும் அவ்விரு சமணப் பெரியார்களின் சிரவணபெளகொளா வருகையைச் சுட்டப் போதுமான ஆதாரங்களாக உள்ளன என்றே வரலாற்றுப் பேராசிரியர்கள் எண்ணுகின்றனர்.²⁴

கொடுமணல் தொல்பொருளும் இலங்கைக் கல்வெட்டும்

ஈரோடு மாவட்டம் பெருந்துறை வட்டத்தில் நொய்யல் ஆற்றின் வடகரையில் கொடுமணல் என்னும் ஊர் உள்ளது. பதிற்றுப்பத்தில்