–- 19 –-
பேசிப் பேசி பொழுதோட்டுவதால் என்ன பயன்? இன்றைய நிலை என்ன ?
தற்கால நிலை தமிழருக்குப் பெருமை தருவதாயில்லை. தமிழரின் வாழ்க்கைத் தரமும், தமிழரின் பண்பாடும் மிகவும் தாழ்ந்து கிடக்கின்றன. நாட்டிலே செழிப்பில்லை. மக்கள் முகத்திலே மகிழ்ச்சி இல்லை. அவர்கள் உள்ளத்தில் நம்பிக்கை இல்லை. உடலிலே தெம்பு இல்லை.
ஆனால், மக்கள் மனதில் அறியாமை மண்டிக்கிடக்கிறது. சமுதாயத்திலே மடத்தனங்கள் வேரூன்றிக் காடாக வளர்ந்து கிடக்கின்றன. நாட்டில், சகல துறைகளிலும், ஒளியில்லை !
ஏன் ? முக்கிய காரணம் அறியாமைதான்.
நாட்டினரில் எண்ணற்றோர் கல்வியறிவு இல்லாதவர்கள். கல்வி கற்கும் ஆசை இருக்கிற சிலருக்கு வசதி கிடையாது. கல்வி கற்றவர்களில் பெரும்பாலர் கூட, படித்தும் பயனற்ற தன்மை உடையவர்களாகத் தான் உள்ளனர். காரணம், கற்றுக் கொடுக்கப்படும் கல்வி முறையில் உள்ள கோளாறுதான்.
கல்வித் திட்டம் காலத்துக்கும், வளர்ந்துவரும் அறிவு ஆராய்ச்சிகளுக்கும் ஏற்ப அமையவில்லை.
விஞ்ஞானத்தையும், பூகோள சாஸ்திரங்களையும் கற்றுக் கொடுக்க முயல்கிறபோதே முட்டாள்தனத்தையும் குருட்டுத்தனமான நம்பிக்கைகளையும் வளர்க்க உதவும் பாடங்களும் வலுக்கட்டாயமாக போதிக்கப்படுகின்றன.
