இப்பக்கம் மெய்ப்பு பார்க்கப்பட்டுள்ளது
ஆத்தி-ஆர்
பாகினியா ரசிமோசா (Bauhinia racemosa, Lam.)
குறிஞ்சிப் பாட்டில் (67) “அடும்பமர் ஆத்திநெடுங் கொடி அவரை” என்ற அடியில் இடம் பெற்ற ‘ஆத்தி’ என்பது ஒரு சிறு மரம். இதன் மலர் கருஞ்சிவப்பு நிறமாக இருக்கும்.
| சங்க இலக்கியப் பெயர் | : | ஆத்தி |
| சங்க இலக்கியத்தில் வேறு பெயர் | : | ஆர் |
| பிற்கால இலக்கியப் பெயர் | : | காட்டாத்தி, திருவாத்தி, ஆத்தி |
| உலக வழக்குப் பெயர் | : | ஆத்தி, மந்தாரை, காட்டாத்தி |
| தாவரப் பெயர் | : | பாகினியா ரசிமோசா (Bauhinia racemosa, Lam.) |
ஆத்தி-ஆர்
இலக்கியம்
முடிமன்னர் குடிகளில் முன்தோன்றி மூத்த குடியில் முதற்குடி சோழர் பெருங்குடி. சோழமன்னர் தம் குடிப்பூ ‘ஆத்தி’. இதனைக் குறிஞ்சிப் பாட்டில் மட்டும் காணலாம்.
“அடும்பமர் ஆத்தி நெடுங்கொடி அவரை”-குறிஞ். 67
பிற சங்கவிலக்கியங்களில் அதிலும் புறநானூற்றில் ஆத்தி மலர் ‘ஆர்’ என்று குறிப்பிடப்படுகின்றது. இதில் மூவேந்தர்களின் குடி மலர்களும் கூறப்படுகின்றன.
“வேம்பும் ஆரும் போந்தையும் மூன்றும்
மலைந்த சென்னியர் அணிந்த வில்லர்
கொற்ற வேந்தர் வரினும்”-புறநா. 338:6-8
- 73-17
