இப்பக்கம் மெய்ப்பு பார்க்கப்பட்டுள்ளது
சுரதாகவிதைகள் 21
நிலத்திற் கழகு நெல்லாம் கரும்பாம்
தடாகத்திற் கழகு தாமரைப் பூவாம்
நெஞ்சத்திற் கழகு நல்ல நினைவுகள்
மஞ்சத்திற் கழகு மாதே நீதான்.
- நூல்: தேன்.மழை
வன்பால் குறிஞ்சிநிலம் -அது
வாழ்க்கைப் புணர்ச்சி நிலம்!
மென்பால் மருதநிலம் - அதை
வெல்வதுன் மேனி நலம்!
-இதழ்: சுரதா (1.5-1968)
பிறைநிலவின் மொழி பெயர்ப்பே யானைத் தந்தம்;
பெற்றோரின் மொழிபெயர்ப்பே குழந்தை யாகும்;
வறுமையதன் மொழிபெயர்ப்பே ஏழை மக்கள்:
வானத்தின் மொழிபெயர்ப்பே பெண்ணின் பார்வை
- நூல்:துறைமுகம்.
பருவம் என்பது காலத்தின் பக்குவம்
பெண்ணுக் கமைந்திடும் பேதைப் பருவமோ,
நிமிர்ந்து வளரும் நெற்பயிர் போன்றது.
மனமாலைக் குரிய மங்கைப் பருவமோ,
நிதானமாய்க் குனியும் நெற்கதிர் போன்றது.
- நூல்: கவரும் சுண்ணாம்பும்
