இப்பக்கம் மெய்ப்பு பார்க்கப்பட்டுள்ளது
50
சுரதா கவிதைகள்
அப்பத்தைச் சுடும்போது பொத்தல் வந்தே
அதன்நடுவில் தானாக அமைதல் போலே
ஒப்பற்ற காவியத்தில் எங்கி ருந்தோ
ஓடிவந்து கருத்துக்கள் குதிப்ப தில்லை.
✽✽✽
அடையாளம் காட்டுகின்ற யாப்பின் மூலம்
அமைகின்ற வடிவந்தான் செய்யு ளாகும்.
✽✽✽
பயிற்சிமிக்க கவிஞர்களின் சிறந்த பாடல்
பசிதீர்க்கும் மேன்மேலும் அறிவுண் டாக்கும்.
✽✽✽
ஒற்றை நிலாவெளிச்சம் –பல
ஊருக்கும் நாட்டுக்கும் ஓசை உலகுக்கும்
முற்றும் பயன்படல்போல் –மொழி
மூதறிவாளரின் பாடல் பயன்படும்.
✽✽✽
நாட்டுக்கு மருத்துவம் நல்ல கொள்கையாம்
பாட்டுக்கு மருத்துவம் யாப்புநூற் பயிற்சியாம்
✽✽✽
பக்குவத்தைப் பழுத்தபழம் காட்டும்; நல்ல
பாடல்களை அப்பாடல் கருத்து காட்டும்.
–இதழ் : சுரதா (15–4–68)
