திருக்குறள் புதிய உரை 289 பிறனுக்குக் கேடு என்றால் உனக்கு மட்டுமல்ல, உன்னைச் சார்ந்தவர்களுக்குப் பின் விளைவுகளாகத் தீங்குகள் தொடரும் என்று, 4வது குறளில் வள்ளுவர் எச்சரித்திருக்கிறார். 205. இலன்என்று தீயவை செய்யற்க செய்யின் இலனாகும் மற்றும் பெயர்த்து. பொருள் விளக்கம்: இலன் என்று = வேறு பக்கத்துணை, பின்புலம் இல்லையென்று தீயவை செய்யற்க - ஒருவருக்குத் தீங்குகளைச் செய்ய வேண்டாம். செய்யின் = அவ்வாறு ஆணவத்துடன் தீங்கிழைத்தால் இலனாகும் - அவரைப்போன்றே, செய்பவருக்கும் இல்லையென்ற இழி நிலைக்கு ஆளாக நேரிடும். மற்றும் மேலும் பெயர்த்து = அவரது நிலைபோலவே திரும்பவும் மோசமான விளைவுகள் ஏற்படவும் கூடும். சொல் விளக்கம்: மற்று = பிறவும், மற்றொன்று பெயர்த்து = வேறுபடுத்துதல், திருப்புதல், கிளம்புதல் முற்கால உரை: யான் வறியவன் என்று கருதி, அது தீர்தற் பொருட்டு, பிறருக்குத் தீவினைகளை ஒருவன் செய்யா தொழிக. செய்வானாயின் பெயர்த்தும் வறியனாம். தற்கால உரை: யான் வறியவன் என்று கருதி, அதனை நீக்குதற்காகத் தீச்செயல்களைச் செய்யா திருப்பானாக. அவன் செய்யின், உள்ளதையும் இழந்து மேலும் வறியவன் ஆவான். புதிய உரை: ஒருவனுக்கு எந்த ஆதரவும் துணையும் இல்லை என்று நினைத்து, கேடுகள் இழைக்கக் கூடாது. அப்படி தீச் செயல்களைச் செய்தால், தானும் பக்கதுணையை இழந்து படுவதோடு, இலனாகி, மேலும் பல துன்பங்களுக்கு ஆளாக நேரிடும்.
