இப்பக்கம் சரிபார்க்கப்பட்டது.
65
படித்த குடும்பம். நல்ல பழக்க வழக்கங்கள். அவர்கள் குடும்பத்தில் எல்லாருமே எதையும் நேரத்தோடு செய்வார்கள். அப்பாவும் அம்மாவும் நிறைய வேலைகள் இருந்தாலும், ஒவ்வொரு வேலையையும் குறித்த குறித்த நேரத்தில் செய்து முடிக்கும் வழக்கத்தைக் கொண்டிருந்தார்கள். அண்ணனும் அக்காவும் கூடப் பெற்றோரை அப்படியே பின்பற்றினார்கள். அண்ணாமலை மட்டும் விதிவிலக்கு. எதையும் நேரத்தோடு செய்ய மாட்டான்.
“சாப்பிட வா” என்று அம்மா அழைப்பாள்.
“இதோ ஒரு நொடியில் வருகிறேன்” என்று கூறுவான் அண்ணாமலை. சிறிது நேரங்கழித்துத்தான் சாப்பிடச் செல்வான்.
“சீக்கிரம் குளித்து விட்டு வா” என்பாள் அம்மா.
“இதோ ஒரு நொடியில்” என்று கூறிவிட்டுச் சிறிது நேரம் கழித்தே குளிப்பான் அண்ணாமலை.
