இப்பக்கம் சரிபார்க்கப்பட்டது.
சிந்தனை
இஸ்லாமிய புத்தாண்டு
உலகிலுள்ள சமயங்கள் பலவும் தத்தமது சமயத்துக்குரிய புத்தாண்டு தினத்தைச் சிறப்பாகக் கொண்டாடத் தவறுவதில்லை. அதேபோன்று இஸ்லாமியப் புத்தாண்டு மாதமாக முஹர்ரம் மாதம் உலக முஸ்லிம்களுக்கு அமைந்துள்ளது. திருமறையில் குறிப்பிடப்பட்டுள்ள நான்கு மாதங்களுள் முஹர்ரமும் ஒன்று.
இஸ்லாமிய மாதங்கள் பன்னிரண்டில் இறுதி மாதமாக துல்ஹாஜ் மாதம் அமைந்துள்ளது. ஆண்டின் முதல் மாதமாக முஹர்ரம் மாதம் உள்ளது.
ஹிஜ்ரி ஆண்டு பிறந்த வரலாறு
இஸ்லாமிய ஆண்டு ‘ஹிஜ்ரி’ என அழைக்கப்படுகிறது. ‘ஹிஜ்ரத்’ எனும் சொல்வழிப் பிறந்தது ‘ஹிஜ்ரி’.
‘ஹிஜ்ரத்’ என்ற சொல்லுக்கு இடம் பெயர்ந்து செல்லுதல் என்பது பொருளாகும். முஹம்மது நபி (சல்) மக்காக் குறைஷிகளின் கொடுமைகளிலிருந்து தப்பிக்கத் தன் தோழரோடு மதினா நகர் நோக்கிப் பெயர்ந்து சென்ற நிகழ்ச்சியே ‘ஹிஜ்ரத்’ என்பதாகும்.
