மனிதன் மாறவில்லை 37
‘எல்லாம் அந்த குருஷேவால் வந்த வினை செத்த பிறகும் தன்னுடைய செல்வாக்குக்குத் தடையாயிருந்து வந்த ஸ்டாலினின் புகழை மறைப்பதற்காக, தனி நபர் வழிபாடு கூடாது’ என்று அவன் ஒரு புதிய இயக்கத்தைத் தொடங்கி வைத்தாலும் தொடங்கி வைத்தான் - மாணவர் உலகம் இப்போதெல்லாம் யார் எதைச் சொன்னாலும் எடை போட்டுப் பார்க்கவும், எதிர்க் கேள்வி கேட்கவும் தொடங்கிவிட்டது!” என்று முணுமுணுத்துக்கொண்டே திரும்பினார். திரும்பி, ஏற்கெனவே அமர்ந்திருந்த இடத்துக்கே வந்து அமர்ந்தார். அமர்ந்து, “நீயோ நானோ உணர்ச்சிக்கு இடம் கொடுப்பதில் தவறில்லை, தம்பி! - உணர்ச்சிக்கு இடம் கொடுக்காவிட்டால் இந்த உலகத்தில் நமக்கு இன்பமும் இல்லை - ஆனால் அதே உணர்ச்சிக்கு இடம் கொடுக்குமாறு மக்களை மட்டும் நாம் தூண்டிவிட்டு விடக் கூடாது; அவ்வாறு தூண்டிவிடுவதை யாராவது கடமையாகக் கொண்டாலும், அந்தக் கடமையை நாம் கயமை என்று சொல்லி முறியடிக்க வேண்டும். இல்லா விட்டால் நம்மைப் போன்றவர்கள் தட்டி ஒட்டும் வழியில் செல்லும் காயடித்த மாடுகளாக மக்கள் இருக்க மாட்டார்கள்; எடுத்ததற்கெல்லாம் முட்ட வரும் மாடுகளாக இருப்பார்கள்!’ என்று தாம் கொண்ட கருத்தின் சிறப்பியல்பைச் சற்றே எடுத்து விளக்கினார் டாக்டர்.
அவ்வளவுதான்; தம்பி அயர்ந்து விட்டான். ‘என்னே, தங்கள் நுண்ணறிவு, என்னே தங்கள் நுண்ணறிவு!” என்ற ‘உங்க"ளுக்குப் பதிலாகத் தங்களைப் போட்டு வியந்துரைத்தான்.
அதுதான் சமயமென்று விட்டுப்போன இன்னொரு
கருத்தின் சிறப்பியல்பையும் சற்றே எடுத்து விளக்கலானார்
