காற்றை விதைத்துப் புயலை அறுக்காதீர்
பாவேந்தர்
எங்களின் வாழ்வும் எங்களின் வளமும் எங்கள் தாய்மொழி இன்தமிழ்ச் செல்வமே! தமிழ் எங்கள்.உயிர், தமிழ் எங்கள்உடல் தமிழ் வாழ்வதனால் யாம் வாழ்கின்றோம்! தமிழ் எம் உணர்வு தமிழ் எம் உணர்ச்சி ! உண்ணும் உணவும் பருகும் நீரும் தமிழே தமிழே, சாவா மருந்து ! தேனின் இனிமை செழுமலரின் மணம் ! தமிழ்தான்் எங்களின் கூர்வாள், எங்களின் கேடயம், எஃகில் காணா வலிமையின் இருப்பு ! நீரின் தெளிவு ! நெருப்பின் சுடர்தி ! காலப் பழமையால் வைரம் பாய்ந்தது ! நாகரிகத்தின் நாற்றங் காலது ! எம்மொழிக்கும் அது ஈடிணையற்ற செம்மொழி : உலகச் சிந்தனைக்கெல்லாம் ஊற்றாய்த் துலங்கும் உண்மையின் பைஞ்சுனை ! அதனில் இந்தி நஞ்சைக் கலப்பது
பொதுமை நோக்கிப் புதுமைக்கேகும் மக்களை மாய்க்கும் மடச்செயல் ஆகும். சிக்கல் நெருப்பில் எண்ணெய்யைச் சேர்ப்பதா? தீமையின் விளைவு தீமையே, காற்றை விதைத்துப் புயல்அறுக்காதீர் !
