88
காலையில் ஆசிரம உறுப்பினர்களைக் கலந்து ஆலோசித்தார். அவர்களும் ஒப்புதல் அளித்தனர். அடிகளின் அறைக்குப் பக்கத்திலேயே சாஸ்திரியாருக்கு ஒரு சிறு குடிசை போடப்பட்டது. அடிகள் நாள்தோறும் சாஸ்திரியாரின் புண்களைத் தம் கையாலேயே அலம்பி, மருந்திட்டுக் கட்டினார்; நோய் தீருவதற்கேற்ற உணவை நாள்தோறும் கொடுக்குமாறு ஏற்பாடு செய்தார்; அன்றாடம் உணவைப் பார்வையிட்ட பிறகே சாஸ்திரியாருக்கு அனுப்புவார்.
அப்போது நாட்டில் அரசியற் கொந்தளிப்பு மிகுந்திருந்தது. சட்ட மறுப்பைத் துவக்குவதற்கு வேண்டிய ஆயத்தங்களில் அடிகள் ஈடுபட்டிருந்தார்; இடைவிடாத பல அலுவல்களுக் கிடையிலும், நாள்தோறும் காலையில் உலாவிவிட்டுத் திரும்பியதும், நேராகச் சாஸ்திரியின் குடிலுக்குச் செல்லுவார்; அவருடன் அன்புடன் உரையாடுவார்; சிரித்து மகிழ்வார். சாஸ்திரி வட மொழியில் பேரறிஞர்; கவிதை இயற்றுவதில் வல்லவர். அவருடைய கவிதைகளைக் கேட்டு அவற்றின் இன்பத்தில் அடிகள் திளைப்பார். வாரந்தோறும் மௌன விரதம் கடைப்பிடித்தொழுகும் நாட்களில், மரத்திலிருந்து புதிதாகப்பறித்த ஆரஞ்சுப் பழம் ஒன்றைக் கையில் எடுத்துக்கொண்டு சாஸ்திரியாரிடம் செல்வார்; அப்பழத்தை அன்புடன் கொடுப்பார். இருவரும் அன்பைப் பரிமாறிக் கொள்வர்.
சாஸ்திரியார் இரண்டாண்டுக் காலம் ஆசிரமத்தில் தங்கியிருந்தார். நோய் பெரும்பாலும் குண-
