பக்கம்:விளையாட்டுத்துறையில் சொல்லும் பொருளும்.pdf/92

விக்கிமூலம் இலிருந்து
இப்பக்கம் மெய்ப்பு பார்க்கப்பட்டுள்ளது

90


சண்டை வீரர்கள் எல்லோரும் தாங்கள் போடும் சண்டைக்காகப் பணம் பெற்றுக் கொண்டே போட்டியிட்டார்கள். ஆனால், பிரபல குத்துச்சண்டை வீரரான ஜேக்சன் என்பவரோ, எந்தவித சலனத்திற்கும் ஆளாகாமல், விருப்பத்துடன் போட்டியிடும் வீரராகவே கடைசி வரை உறுதியாக இருந்தார். திறமையுடன் போரிட்டுப் பேரும் புகழும் பெற்றார்.

அதனால் அவரை பண்பாளர் ஜேக்சன் (Gentleman Jackson) என்று பெருமையுடன் அழைத்தார்கள்.

அதே சமயத்தில், ஜிம்தேர்ப் என்ற அமெரிக்க வீரர் ஒலிம்பிக் பந்தயங்களில் பல தங்கப் பதக்கங்கள் வென்றார். அவர் சிறுவனாக இருந்தபோது, கொஞ்சம் பணம் பெற்றுக் பேஸ்பால் ஆடினார் என்று தெரிய வந்தபோது, தங்கப் பதக்கங்களைத் திருப்பித் தருமாறு கட்டளையிட்டு, அவரது பெயரை வீரர்கள் பட்டியலிலிருந்து நீக்கி, கொடுமையாகத் தண்டித்து விட்டனர் அமெரிக்க ஒலிம்பிக் கழகத்தினர்.

அவ்வாறு கடுமையாக அமெச்சூர் விதிகளைக் கடைப்பிடித்திருந்த காலமும் இருந்தது. ஆனால், இன்றைய இந்த விதிமுறை, பணம் சம்பாதிக்காமல், விளையாட்டு விளையாட்டுக்காகவே என்ற கொள்கையுடன் விளையாடுகின்ற விளையாட்டு வீரர்களையே குறிக்கிறது.

இருந்தாலும், உள் மனதில் அந்த ஏக்கம், பணம் திரட்டும் ஆவல் எதிரொலித்துக் கொண்டிருந்தாலும், இயலாமை என்று கூறுவோரும் உண்டு.