5. பசிபிக் வழிகள்
கடல் வழிகள்
பசிபிக்கின் கடல்வழிகள் அண்மைக் காலத்தில் உண்டானவை. மேற்கு வட அமெரிக்காவிலிருந்து சீனா, ஜப்பான் வரை ஒரு வழியுள்ளது. இது வட அட்லாண்டிக் வழிக்கு இணையாக உள்ளது.
ஜப்பானிலிருந்து கச்சாப் பட்டும் தேயிலையும்; ஹாவாயிலிருந்து சர்க்கரையும் கிழக்கு நோக்கி அமெரிக்காவிற்கு ஏற்றிச் செல்லப்படுகின்றன. திரும்பி வரும் பொருள்கள் முக்கியமாக மரமும், உற்பத்திப் பொருள்களும் ஆகும். அண்மைக் காலத்தில் உணவுப் பொருள்களும் வருகின்றன.
பசிபிக் வழிகள் நான்கு முக்கிய நிலைகளில் குவிகின்றன. மேற்கு அமெரிக்கா; பனாமா; சீனா, ஜப்பான், கிழக்கு நாடுகள்; ஆஸ்திரேலியா.
பசிபிக் வழிகளின் ஒரு சிறப்பியல்பாவது: ஐரோப்பாவிலிருந்தும் அமெரிக்காவிற்குக் கிழக்கே இருந்தும் வரும் பயணிகளின் விரைவுப் போக்குவரத்துக்குப் பனாமா–நியூசிலாந்து வழியைப் பயன்படுத்துவது ஆகும். தென் அட்லாண்டிக்கில் உள்ளதுபோல், தென் பசிபிக்கிலும் முக்கிய கிழக்கு-மேற்கு வழி இல்லை. ஆஸ்திரேலியாவும் தென் அமெரிக்காவும் மாற்றிக் கொள்ளும் பொருள்கள் மிகக் குறைவே காரணமாகும்.
