குறுந்தொகை 71 முதல் 81 முடிய
பாடல்: 71 (மருந்தெனின்)[தொகு]
- தலைவன் கூற்று
- மருந்தெனின் மருந்தே வைப்பெனின் வைப்பே
- அரும்பிய சுணங்கி னம்பகட் டிளமுலைப்
- பெருந்தோ ணுணுகிய நுசுப்பிற்
- கல்கெழு கானவர் நல்குறு மகளே.
என்பது, பொருள் கடைக்கூட்டிய நெஞ்சிற்குத் தலைமகன் சொல்லிச் செலவழுங்கியது.
- பாடியவர்
- கருவூர் ஓதஞானி.
- மேற்கோளாட்சி
- இளம்பூரணர்: தொல்காப்பியம் எழுத்ததிகாரம் குற்றியலுகரப்புணரியல், நூற்பா 75 "கல்லைக்கெழீஇயனவென இரண்டனுருபு விரிந்தது".
- நச்சினார்க்கினியர்: மேலது.
- இறையனார் அகப்பொருள் உரை: நூற்பா 51 "தலைவன் தன்நெஞ்சிற்குச் சொல்லிச்செலவழுங்கியது"
- தமிழ்நெறி விளக்கம் 24. மேலது
- பேராசிரியர்: தொல்காப்பியம் பொருளதிகாரம் உவமவியல்,நூற்பா 28. "இனிதுறு கிளவிபற்றி ஏனை உவமம் வந்தது."
- பேராசிரியர்: தொல்காப்பியம் பொருளதிகாரம் செய்யுளியல், நூற்பா 202 "நிகழ்காலமென்னும் உறுப்பு வந்தது".
- நச்சினார்க்கினியர்: மேலது.
- இலக்கணவிளக்கம்: மேலது.
- பேராசிரியர்: தொல்காப்பியம் பொருளதிகாரம் செய்யுளியல் நூற்பா, 211. "பொருளென்னும் உறுப்பின்றி வந்தது"
- நச்சினார்க்கினியர்: மேலது.
- சேனாவரையர்: தொல்காப்பியம் சொல்லதிகாரம் எச்சவியல் நூற்பா, 45 "எமக்கென்னும் சொல்பின்னும் முன்னும் எஞ்சிநின்றது".
- நச்சினார்க்கினியர்: மேலது.
- இலக்கணவிளக்கம்: நூற்பா, 51. மேலது.
- குணசாகரர் யாப்பருங்கலம் விருத்தியுரை, நூற்பா 15. "இயற்சீரான் வந்த ஆசிரியப்பா".
பாடல்: 72 (பூவொத்தலமருந்)[தொகு]
- தலைவன் கூற்று
- பூவொத் தலமருந் தகைய வேவொத்
- தெல்லாரு மறிய நோய்செய் தனவே
- தேமொழித் திரண்ட மென்றோண் மாமலைப்
- பரீஇ வித்திய வேனற்
- குரீஇ யோப்புவாள் பெருமழைக் கண்ணே.
என்பது, தலைமகன் தன் வேறுபாடு கண்டு வினாய பாங்கற்கு உரைத்தது.
- பாடியவர்
- மள்ளனார்.
- மேற்கோளாட்சி
நச்சினார்க்கினியர்: தொல்காப்பியம் அகத்திணைஇயல் நூற்பா, 16. 'இக்குறுந்தொகையுள் குரீஇ யோப்புவாள் கண்ணென வழிநிலைக் காட்சியைப் பாங்கற்குக் கூறினமையின் அத்தினைக்கதிர் முற்றுதற்குரிய இளவேனிலும், பகற்பொழுதும் காட்சிக்கண் வந்தன'.
பாடல்: 73 (மகிழ்நன்)[தொகு]
- தோழி கூற்று
- மகிழ்நன் மார்பே வெய்யை யானீ
- அழியல் வாழி தோழி நன்னன்
- நறுமா கொன்று நாட்டிற் போக்கிய
- ஒன்றுமொழிக் கோசர் போல
- வன்கட் சூழ்ச்சியும் வேண்டுமாற் சிறிதே.
என்பது பகற்குறி மறுத்து இரவுக்குறி நேர்ந்தது, அதுவும் மறுத்தமைப்படத் தலைமகட்குத் தோழி சொல்லியது.
- பாடியவர்
- பரணர்.
- மேற்கோளாட்சி
- இளம்பூரணர்: தொல்காப்பியம் பொருளதிகாரம் களவியல் நூற்பா, 24. "தோழி வன்புறை"
- நச்சினார்க்கினியர்: மேலது, நூற்பா 23.
- நம்பியகப்பொருள்: நூற்பா, 154. "தலைவியைப் பாங்கி கழறியது".
பாடல்: 74 (விட்டகுதிரை)[தொகு]
- தோழி கூற்று
- விட்ட குதிரை விசைப்பி னன்ன
- விசும்புதோய் பசுங்கழைக் குன்ற நாடன்
- யாந்தற் படர்ந்தமை யறியான் றானும்
- வேனிலானேறு போலச்
- சாயின னென்பநம் மாணல நயந்தே.
என்பது, தோழி தலைமகன் குறை மறாதவாற்றாற் கூறியது.
- பாடியவர்
- விட்ட குதிரையார்.
- மேற்கோளாட்சி
- நம்பியகப்பொருள் நூற்பா, 148. "தலைவி பாங்கியை முனிந்தது".
பாடல்: 75 (நீகண்டனை)[தொகு]
- தலைவி கூற்று
- நீகண் டனையோ கண்டார்க்கேட் டனையோ
- ஒன்று தெளிய நசையின மொழிமோ
- வெண்கோட் டியானை சோணை படியும்
- பொன்மலி பாடலி பெறீஇயர்
- யார்வாய்க் கேட்டனை காதலர் வரவே.
என்றது, தலைமகன் வரவுணர்த்திய பாணற்குத் தலைமகள் கூறியது.
- பாடியவர்
- மோசிகீரனார்.
- மேற்கோளாட்சி
- இளம்பூரணர்: தொல்காப்பியம் சொல்லதிகாரம் கிளவியாக்கம் நூற்பா, 18. "செய்யுளில் இனச்சுட்டில்லாப் பண்புகொள் பெயர் வந்தது".
- கல்லாடர்: மேலது.
- இளம்பூரணர்: தொல்காப்பியம் பொருளதிகாரம் கற்பியல் நூற்பா,6. "தலைவன் வருகின்றானென்ற உழையர்க்குத் தலைவி கூறியது.
- நச்சினார்க்கினியர்: தொல்காப்பியம் பொருளதிகாரம் கற்பு நூற்பா, 6. "தலைவன் வரவைத் தலைவி விரும்பிக் கூறியது".
பாடல்: 76 (காந்தள்)[தொகு]
- தலைவி கூற்று
- காந்தள் வேலி யோங்குமலை நன்னாட்டுச்
- செல்பவென்பவோ கல்வரை மார்பர்
- சிலம்பிற் சேம்பி னலங்கல் வள்ளிலை
- பெருங்களிற்றுச் செவியின் மானத் தைஇத்
- தண்வரல் வாடை தூக்கும்
- கடும்பனி யச்சிர நடுங்கஞ ருறவே.
என்பது, பிரிவுணர்த்தச் சென்ற தோழிக்கு அவர் பிரிவு முன்னர் உணர்ந்த தலைமகள் சொல்லியது.
- பாடியவர்
- கிள்ளிமங்கலங் கிழார்.
- மேற்கோளாட்சி
பாடல்: 77 (அம்மவாழி)[தொகு]
- தலைவி கூற்று
- அம்ம வாழி தோழி யாவதும்
- தவறெனிற் றவறோ விலவே வெஞ்சுரத்
- துலந்த வம்பல ருவலிடு பதுக்கை
- நெடுநல் யானைக் கிடுநிழ லாகும்
- அரிய கானஞ் சென்றோர்க்
- கெளிய வாகிய தடமென் றோளே.
என்பது, பிரிவின்கண் ஆற்றாளாகிய தலைமகள் தோழிக்குச் சொல்லியது.
- பாடியவர்
- மதுரை மருதன் இளநாகனார்.
- மேற்கோளாட்சி
- இளம்பூரணர்: தொல்காப்பியம் சொல்லதிகாரம் இடையியல் நூற்பா, 28. "அம்மவென்னும் இடைச்சொல் கேட்பித்தல் பொருளில் வந்தது.
- சேனாவரையர்: மேலது, நூற்பா, 27.
- தெய்வச்சிலையார்: மேலது, நூற்பா, 28.
- நச்சினார்க்கினியர்: மேலது, நூற்பா, 28.
- மயிலைநாதர்: நன்னூல் நூற்பா, 437.
- இலக்கணவிளக்கம் நூற்பா, 274.
பாடல்: 78 (பெருவரை)[தொகு]
- பாங்கன் கூற்று
- பெருவரை மிசையது நெடுவெள் ளருவி
- முதுவாய்க் கோடியர் முழவிற் றதும்பிச்
- சிலம்பினிழிதரு மிலங்குமலை வெற்ப
- நோதக்கன்றே காமம் யாவதும்
- நன்றென வுணரார் மாட்டும்
- சென்றே நிற்கும் பெரும்பே தமைத்தே.
என்பது, பாங்கன் தலைமகற்குச் சொல்லியது.
- பாடியவர்
- நக்கீரனார்.
- மேற்கோளாட்சி
- நச்சினார்க்கினியர்: தொல்காப்பியம் சொல்லதிகாரம் எச்சவியல்,நூற்பா, 61. "அஃறிணை யொன்றன்பாற்கண் வந்த பெயரெச்சப்படர்க்கை வினைக்குறிப்பு முற்று.
- மயிலைநாதர்: நன்னூல்,நூற்பா, 350. "ஒன்றன்பால் வினைக்குறிப்புமுற்றுப் பெயரெச்சக் குறிப்பானது.
- சங்கரநமச்சிவாயர்: மேலது.
- இளம்பூரணர்: தொல்காப்பியம் சொல்லதிகாரம் தொகைமரபு நூற்பா, 30. "யாவதென்னும் ஒன்றறி சொல்லும், நிலைமொழியாய் நின்று புணர்தலும் மருவின் பாத்தியது".
- நச்சினார்க்கினியர்: மேலது.
- பரிமேலழகர்: திருக்குறள் 1255. "காமநோயுறாதார் மானமுடையார் நன்றென வுணரார் மாட்டுஞ்சென்றே நிற்கும்; யானறிவ தொன்றன்றென்பதாம்".
- தமிழ்நெறிவிளக்கம், 17. தோழி தலைவனிடம் படைத்து மொழிந்தது.
பாடல்: 79 (கானயானை)[தொகு]
- தலைவி கூற்று
- கான யானை தோனயந் துண்ட
- பொரிதா ளோமை வளிபொரு நெடுஞ்சினை
- அலங்க லுலவை யேறி யொய்யெனப்
- புலம்புதரு குரல புறவுப்பெடை பயிரும்
- அத்த நண்ணிய வங்கடிச் சீறூர்ச்
- சேந்தனர் கொல்லோ தாமே யாந்தமக்
- கொல்லே மென்ற தப்பற்
- சொல்லா தகறல் வல்லு வோரே.
- என்பது, பொருள்வயிற் பிரிந்த தலைமகனை நினைந்த தலைமகள் தோழிக்குச்சொல்லியது.
- பாடியவர்
- குடவாயிற் கீரனக்கன்
- மேற்கோளாட்சி
- நச்சினார்க்கினியர்: தொல்காப்பியம் பொருளதிகாரம் கற்பியல் நூற்பா, 43. "தலைவன் சொல்லாது பிரிந்தது".
- இளம்பூரணர்: தொல்காப்பியம் பொருளதிகாரம் கற்பியல் நூற்பா, 7.
- "புணர்ந்துடன் போகிய கிழவோண் மனையிருந்
- திடைச்சுரத் திறைச்சியும் வினையுஞ்சுட்டி
- அன்புறு தக்க கிளத்த றானே
- கிழவோன் செய்வினைக் கச்சமாகும்' ஆதலின்,"'புலம்புதரு குரலவாய்ப் புறவினைப் பெடை அழைக்கும் வருத்தங்கண்டு வினைமுடியாமல் வருவரோவென அஞ்சியவாறு காண்க'.
- நச்சினார்க்கினியர்:மேலது.
பாடல்: 80 (கூந்தலாம்ப)[தொகு]
- பரத்தை கூற்று
- கூந்த லாம்பன் முழுநெறி யடைச்சிப்
- பெரும்புனல் வந்த விருந்துறை விரும்பி
- யாமஃ தயர்கஞ் சேறுந் தானஃ
- தஞ்சுவ துடைய ளாயின் வெம்போர்
- நுகம்படக் கடக்கும் பல்வே லெழினி
- முனையான் பெருநிரை போலக்
- கிளையொடுங் காக்கதன் கொழுநன் மார்பே.
என்றது, தலைமகட்குப் பாங்காயினார் கேட்பப் பரத்தை சொல்லியது.
- பாடியவர்
- ஒளவையார்.
- மேற்கோளாட்சி
- இளம்பூரணர்: தொல்காப்பியம் கற்பியல் நூற்பா, 10. "புனல்விளையாட்டின்கண் காமக்கிழத்தியர் கூற்று நிகழ்ந்தது".
- நச்சினார்க்கினியர்: மேலது.
- குறுந்தொகை
- [[]]