குழந்தைச் செல்வம்/ஔவை

by கவிமணி தேசிக விநாயகம் பிள்ளை

40. ஔவை

ஔவைக் கிழவி நம்கிழவி,
     அமுதின் இனிய சொற்கிழவி ;
செவ்வை நெறிகள் பற்பலவும்
     தெரியக் காட்டும் பழங்கிழவி. 1

நெல்லிக் கனியைத் தின்றுலகில்
     நீடு வாழும் தமிழ்க்கிழவி;
வெல்லற் கரிய மாந்தரெல்லாம்
    வியந்து போற்றும் ஒருகிழவி. 2

கூழுக் காகக் கவிபாடும்
    கூனக் கிழவி; அவளுரையை
வாழும் வாழ்வில் ஒருநாளும்
    மறவோம் மறவோம் மறவோமே! 3