குழந்தைச் செல்வம்/தைப் பொங்கல்

by கவிமணி தேசிக விநாயகம் பிள்ளை

48. தைப் பொங்கல்

பொங்கல்! இன்று பொங்கல்!
     புதுவருஷப் பொங்கல்!
மங்கலங்கள் பொங்க
     மனையிலிடும் பொங்கல்! 1

சந்தனத்தைக் குழைத்துத்
     தரையைமெழு கிடுவோம்;
சிந்துரத்தாற் கோலம்
     சேர அதில் அமைப்போம். 2

எங்கள் கண பதியை
     எழுந்தருளச் செய்வோம்;
மங்கலநற் பொருள்கள்
     வரிசைகொள வைப்போம். 3

வாசமிக வீசும்
     மலர் எடுத்து வருவோம்;
நேசமொடு தூவி
     நின்றுதொழு திடுவோம். 4

தலைகள் விரித் திடுவோம்;
     இளநீர்கள் வைப்போம்;
குலைகுலையாய்க் கனிகள்
     கொண்டுவந்து வைப்போம். 5

பச்சைமஞ்சள் இஞ்சி
     படைபடையாய் வைப்போம்
இச்சைதரு கரும்பும்
     இடையிடையே நடுவோம். 6

அகில் விறகை மாட்டி
     அடுப்பில் எரி மூட்டி,
பகவன் அடி போற்றிப்
     பானையேற்றி வைப்போம். 7

தங்கத்தினால் பானை,
     தரளம் என அரிசி.
பொங்கலும்பால் பொங்கல்,
     புத்தமுதப் பொங்கல்! 8

பானையுமே பொங்கிப்
     பால்வடியும் வேளை,
வானம்எழக் குரவை
     வழங்கிவலம் வருவோம். 9

கடவுட்கமு தளிப்போம்;
     காகத்துக்கும் இடுவோம்.
உடனிருந்தெல் லோரும்
     உண்டுமகிழ்ந் திடுவோம். 10