குழந்தைச் செல்வம்/பாண்டியாடுதல்
16. பாண்டியாடுதல்
பாங்கி தோழி பங்கஜம்!
பாண்டியாட வாராயோ?
பாட்டி எனக்குப் பரிசளித்த
பல்லாங் குழியைப் பாரிதோ!
1
மாமா நேற்று வாங்கித் தந்த
மாணிக்கத்தைப் பாரிதோ!
அத்தை தந்த கட்டிமுத்தின்
அழகை வந்து பாரிதோ!
2
சேரருக்கு மங்களங்கள்
செப்பிவிளை யாடலாம்;
சோழருக்குச் சோபனங்கள்
சொல்லி விளை யாடலாம்.
3
பாண்டியர்க்குப் பல்லாண்டு
பாடி விளை யாடலாம்;
உண்ணும் பாண்டி யாடலாம்;
ஓய்ந்து விட்டால் நிறுத்தலாம்.
4
கட்டும் பாண்டி யாடலாம்;
களைத்து விட்டால் நிறுத்தலாம்;
எய்யாப் பாண்டி யாடலாம்;
எய்த்துவிட்டால் நிறுத்தலாம்.
5
பசும் பாண்டி யாடலாம்;
பசித்தவுடன் நிறுத்தலாம்;
பாங்கி தோழி பங்கஜம்!
பாண்டியாட வாராயோ?
6