26
அறப்போர்
ஒரு இலட்சியத்தைப் பெறுவதும், அதனை ஈடேற்ற, எத்தகைய தியாகம் செய்யத் தயாராகி விடுவது என்ற உள்ள உரம் பெறுவதென்பதும், சாமான்யமான காரியமல்ல! அந்தச் சாதனையில் நாம் வெற்றி பெற்றிருக்கிறோம்.
நாம் ஓர் தனி இனம்--தன்னலக்காரரின் சூழ்ச்சியினால் தாழ்ந்துபோனோம்; நாடாண்ட இனம் எனினும், நயவஞ்சகர்களிடம் சிக்கி நசித்துப்போனோம் என்பதை அறிந்துகொண்டோம்.
நாம் கூறுவதுபோல, திராவிட இனம் என்று கூறிக்கொள்ள மனம் இல்லாத சில பலரும் கூட, தென்னாட்டவர் - தென்னிந்தியர்--தமிழர்--என்று, பலப்பல பதங்களைக் கூறிடுவர். ஆனால் பாதையோ, ஒன்றுதான். திராவிட இனத்தின் மார்க்கத்துறை ஆரியரிடமும், அரசியல் டில்லியிலும், பொருளாதாரம் பம்பாயிலும் பிணைக்கப்பட்டிருப்பதை நாம் கூறி, தனி அரசு கோருகிறோம்; திராவிடநாடு திராவிடருக்கே என்று பேசுகிறோம். அந்த அளவுக்கும் முறைக்கும் வரமறுக்கும் பலர், வடநாட்டவருக்கு இங்கு வாணிபத் துறையிலே ஆதிக்கம் வளர்ந்து வருவதைக் கண்டு வருந்தி, இது ஆகாது என்றுதான் பேசுகின்றனர்; தனிநாடு கோரவில்லை என்ற போதிலும், வடநாட்டாரின் இந்தப் பொருளாதார ஆதிக்கம் கூடாது என்று கூறாமலில்லை.
வடநாட்டின் நோக்கமெல்லாம், இந்தியா--இந்திய தேசியம்--இந்திய கலாசாரம் என்ற வாய் வேதாந்தம் பேசிக்கொண்டே, திராவிடத்தை--தென்னாட்டை, வெறும் விவசாய நாடாகவும், மூலப்பொருள்களை உற்பத்திசெய்து வெளியே அனுப்பிவிட்டு, வெளியார் தயாரித்து அனுப்பி
