கண்
மதுரைக் கோயில் வரலாறு
103
'ஆடும் பரி, அணிசேவல்" என்றதற்குத் தக்கவாறு அவர் மயிலும், மயில்மேல் அவர் இருக்கும் இருப்பும் உள்ளன.
பொன் : தோகை விரித்தாடும் மயிலின் முதுகில் வலக்காலை ஊன்றியிருக்கும் முருகன், இடக்காலை மயிற் குதிரையின் அங்கவடியில் வைத்துள்ளார். நாற்கை யராக விளங்கும் இவர், மயிற்கடிவாளம் பற்றி இழுக்கிறார். இணைத்திரிசூலம் போல விளங்கும் ஒரு கருவியைப் பிடித்துள்ளாரே! இஃதென்னவென்று தெரிகின்றதா?
கண்
- இதுதானே வச்சிரப்படை.
பொன் : ஆம்! இந்திரன் மகன் மணவாளன், கையில் வச்சிரம் வைத்திருத்தல் அருமையா? அடுத்து இருப்பவர் நாகராசர். ஐந்தலை நாகத்தின்கீழ் அழகாக விளங்குகிறார்.
கண்
- உச்சிப் பெருங்கொண்டை சரியான உருண்டை. திருநீற்றுக் கீற்றும், ஏற்றிய ஒரு நாமமும்,தூக்கிய புருவமும், உயரத்தில் குறுகிப் பருத்த கழுத்தும், உதடும், உதட்டுக்கும் மூக்குக்கும் இடைப்பட்ட பட்டையும் நன்றாக அமைந்துள்ளன.
பொன் : கைவண்ணம் வெளிப்பட நின்ற இக்கவின் சிலையின் கைகள் இரண்டும் ஒடிந்துள்ள கொடுமை, நெடுமூச்சு விட வைக்கிறது. உருளை போன்ற காதுத் தொங்கல் புதுமையாக உள்ளது. அடுத்து அழகுக்கோலம் கொண்டு விளங்குபவள் கலைமகள்.
கண்
- வீணை செய்யும் ஒலியில் இருப்பவள், வீணை ஏந்திய கையளாக விளங்குகிறாள்.
பொன் : வீணையின் நரம்புகளில் விளையாடும் கைவிரல் களும் பார்! மேலே மூன்று விரல்கள் வருடுகின்றன. கீழே நான்கு விரல்கள் வருடுகின்றன.
கண்
- முழந்தாள்வரை முற்றுடையுடுத்த இவ்வம்மை, வீணைக்கு ஏற்ப நெளிந்து வளைந்து இருப்பது கவின் காட்சியாம். இவள் காதில் சக்கரத் தோடு; நடுவே திருகுப் பூ; உச்சியில் முருகுப் பூ!