இப்பக்கம் மெய்ப்பு பார்க்கப்பட்டுள்ளது
43. திருவள்ளுவர்
இம்மை மறுமையின் - பயன்கள்
எவருமே யடையச்
செம்மை நெறியினை - விளக்கும்
தெய்வ நூல் செய்தோன்.
1
வழுக்கள் போக்க வந்தோன் - நல்ல
வாழ்வை ஆக்க வந்தோன்;
ஒழுக்கம் காட்ட வந்தோன் - தமிழுக்கு
உயிரை ஊட்ட வந்தோன்.
2
அறிவின் எல்லை கண்டோன் - உலகை
அளந்து கணக்கிட் டோன்;
தறியில் ஆடை நெய்தோன் - தமிழில்
தரும நூல் நூற்றோன்.
3
சாதி ஒன்றேயாம் - தமிழர்
சமயம் ஒன்றேயாம்
நீதி ஒன்றேயாம்-என்று
நிலை நிறுத்தி நின்றோன்.
4
44. கம்பன்
ஆரியம் நன்குணர்ந்தோன் - தமிழின்
ஆழம் அளந்து கண்டோன்;
மாரி மழைபோலக் - கவியின்
மழைபொ ழிந்திடு வோன்.
1
உலக உண்மைகளை - எவரும்
உணரக் கூறிடு வோன்;
அலகி லாக்கலைகள்-உறையும்
ஆலய மாகிடு வோன்.
