கலைஞர் மு. கருணாநிதி
41
“ ஆரம்பத்திலிருந்து நீ பார்த்த பார்வை......” என்னமோ ஆத்திரமாகச் சொல்லப்போனான் குமரேஸ்.
“என் சிறு வயதில் இறந்துபோன அண்ணன் மாதிரி இருந்தது. பார்த்தேன் இந்தப்பாவி.....” என்று விம்மி விம்மியழுதாள். பெட்டியிலிருந்தவர்கள் அவனைத் திட்டித் தீர்த்தார்கள். கடலூர் ஸ்டேஷன் வந்தது. அந்த சபலம் பிடித்த மைனர் இறங்கிப் போய்விட்டான். “இதற்காகவே இந்தப் பயல்கள் ரயிலில் ஏறுவது” என்று ஒரு குரல் கிளம்பிற்று. திடீரென ஏற்பட்ட அதிர்ச்சியில் குழந்தையைக்கூட மறந்திருந்த சந்திரா, “குழந்தை எங்கே அத்தான்?” என்று ஆவலோடு கேட்டாள்.
“பக்கத்தில்தான் இருக்கிறது; இங்கேயே இறங்கு” என்றான் குமரேஸ். அவன் முகம் கருத்து விட்டது.
“ஏன்?” என்றாள் அவள்.
“இறங்கேன்;சொல்லுகிறேன்” என்று மூட்டைமுடிச்சுகளைத் தூக்கிக்கொண்டு புறப்பட்டான் குமரேஸ். அவளும் இறங்கினாள். இறங்கியவுடன் கேட்டாள் “எங்கே குழந்தை?” என்று.
கண்ணீர் வழிந்தோட அவன் சொன்ன பதில் “இரண்டு மைல்களுக்கப்பால் இருக்கிறது” என்பது தான்.
“ஏ! அவசரக்கார குமரேசா!”
ஆத்திரக்கார முட்டாளே!”
என்ற ஒலி, நாலா புறமிருந்தும் அவன் காதில் சாட்டை ஒலியாய் ஒலித்தது.
'இந்தோ சிலோன் எக்ஸ்பிரஸ்' கடலூரிலிருந்து புறப்பட்டது.
கு—4
☐
