சமதர்மத்தை நோக்கியே சுயமரியாதை இயக்கம்
31
இதோ அவரது சொற்களிலேயே படிப்போம்:
‘சமதர்ம இயக்கம், உலக மக்கள் எல்லோரையும் பொருத்த இயக்கம்: சாதி, மதம், வருணம், தேசம் என்கிற கற்பனை நிலைகளை எல்லாம் தாண்டிய இயக்கம். பிராமணன், சத்திரியன், சூத்திரன், அரிசனன் என்கிற வருணங்களை ஒழித்து, எல்லோரும், எப்பொழுதும் மனிதரே என்று கூவும் இயக்கம்,
‘ஏழை என்றும், பணக்காரன் என்றும், முதலாளி என்றும், தொழிலாளி என்றும், எசமான் என்றும், கூலி என்றும், ஜமீந்தார் என்றும், குடியானவன் என்றும் உள்ள சகல வகுப்புகளையும், வேறுபாடுகளையும் நிர்மூலமாக்கித் தரை மட்டமாக்கும் இயக்கம்,’ என்று ஈ.வெ. ராமசாமி விளக்கினார். அவர் மேலும் கூறியதாவது:
‘மற்றும் குரு என்றும், சிஷ்யன் என்றும், பாதிரி என்றும், முல்லா என்றும், முன் ஜென்மம், பின் ஜென்மம், கர்ம பலன் என்றும், அடிமையையும், எஜமானனையும் மேல் சாதிக்காரனையும், முதலாளியையும், தொழிலாளியையும், ஏழையையும், பணக்காரனையும், மகாத்மாவையும், சாதாரண ஆத்மாவையும், அவனுடைய முன் ஜென்ம கர்மத்தின்படி அல்லது ஈசுவரன் தன் கடாட்சப்படி உண்டாக்கினான் என்று சொல்லப்படும் அயோக்கியத்தனமான சுயநலங் கொண்ட சோம்பேறிகளின் கற்பனைகளையெல்லாம் வெட்டித் தகர்த்துச் சாம்பலாக்கி, எல்லோர்க்கும் எல்லாம் சமம், எல்லாம் பொது என்ற நிலைமையை உண்டாக்கும் இயக்கம்.
‘சாதி, சமய, தேசச் சண்டையற்று, உலக மக்கள் யாவரும் தோழர்கள் என்று சாந்தியும், ஒற்றுமையும் அளிக்கும் இயக்கம்; இன்று உலகமெங்கும் தோன்றித் தாண்டவமாடும் இயக்கம்’ என்று தமிழ்நாட்டின் பொதுமக்களுக்குத் தெளிவாகப் படம் பிடித்துக் காட்டினார்.
தன்மான இயக்கத் தந்தை ஈ.வெ.ரா.காட்டிய புது வழியில், பெருவழியில் இயக்கம் வீறு நடை போடத் தொடங்கியது.
இயக்க மேடைகளிலும், எழுத்துகளிலும் சாதியொழிப்பு, சாதிகளுக்கு ஆணி வேரான கடவுள் மறுப்பு, சமய மறுப்பு இடம் பெற்றது போன்றே, ஏழைப் பணக்காரத் தன்மை ஒழிப்பும இடம் பெற்றது. பெரியாரே சமதர்மப் பிரச்சாரத்தைச் சேர்த்துக் கொண்டார்.
