56
பெரியாரும் சமதர்மமும்
இவற்றையெல்லாம், சுயமரியாதை சமதர்மக் கட்சியின் திட்டம், பட்டியல் போட்டுக் காட்டியது.
தனியார் சொத்துக்களை பொது உடைமையாக்கச் சொன்ன சமதர்மத் திட்டம், கோயில்கள், மடங்கள் போன்றவைகள் மடக்கி வைத்திருக்கும் சொத்துக்களை மறந்து விடவில்லை. அவற்றை விட்டு வைத்துக் கொண்டு, தனியார் சொத்துக்களில் மட்டும் கை வைப்பது, வெடிகுண்டின் மேல் அழுத்தமாக உட்காருவதற்கு ஒப்பாகும்.
சோவியத் நாடு தனியார் நிலங்களை, செல்வங்களை நாட்டுடமையாக்கியது போன்றே, கோயில், மடம் ஆகிய சமய அமைப்புகளின் நிலங்களையும், செல்வங்களையும் பொது உடைமையாக்கி விட்டது. இந்த எடுத்துக்காட்டை, மனதிற் கொண்டு, சுயமரியாதைத் தொண்டர்கள் முடிவு செய்தார்கள்.
கோயில், பிரார்த்தனை இடங்கள் முதலிய மத நிறுவனங்களின் சொத்துக்கள், வரும்படிகள் ஆகியவற்றை, பொதுமக்களின் தொழில், கல்வி, உடல் நலம், வீட்டு வசதி, அனாதைப் பிள்ளைகள் விடுதி ஆகியவற்றிற்குப் பயன்படுத்த வேண்டும். இது அவர்கள் முடிவு. அறிவுடையோர் முடிவு. செயல்பட, முற்போக்கு அறிவுடையோர் நிறைந்த சமுதாயம் தேவை.
