இப்பக்கம் மெய்ப்பு பார்க்கப்பட்டுள்ளது
ஒன்பது மாதம் சென்றதுமே
'உப்புப் புப்'பெனக் கூறிடுவாள்.
அம்மா சொல்வதை அழகாக
அந்தக் குழந்தையும் கூறிடுமாம்.
‘என்றன் குழந்தை ஊமையென
எவரும் கூறார்’ என்மகிழ்வாள்.
★★★
பத்து மாதம் ஆனதுமே
தத்தித் தத்தித் தவழ்ந்திடுமாம்.
அத்துடன் நிற்கப் பழகிடுமாம்.
அம்மா அதனைக் கண்டதுமே,
‘என்றன் குழந்தை சப்பாணி
இல்லை’ என்றே மகிழ்ந்திடுவாள்.
★★★
அப்புறம் ஒருசில மாதங்கள்
ஆனதும், அந்தக் குழந்தையுமே,
நன்றாய் நின்று, நேராக
நடக்கப் பழகிடும்; அதுகண்டு,
‘என்றன் குழந்தை முடமல்ல’
என்றே அம்மா மகிழ்ந்திடுவாள்.
★★★
