மலரும் உள்ளம்-1/கன்றுக்குட்டி
கன்றே, கன்றே, ஓடிவா.
காளைக் கன்றே ஓடிவா.
இன்றே கூடி இருவரும்
இன்ப மாகப் பேசலாம்.
‘அம்மா’ என்றே நாங்களும்
அழைக்கி றோமே அன்னையை.
‘அம்மா’ என்று நீயுமே
அழைப்ப தெங்கள் பாடமோ?
பாலைக் குடித்த பிறகுதான்
வேலை ஒன்றும் இல்லையே.
வாலைத் தூக்கி என்னிடம்
வளைந்து குதித்து ஓடிவா.
சொறிந்து கொடுத்து உனக்குநான்
சொன்னேன், ஏதோ வார்த்தைகள்
‘சரிதான், சரிதான்’ என்றுநீ
தலையை ஆட்டிக் காட்டுவாய்.