மலரும் உள்ளம்-1/சின்னப் பொம்மை
சின்னச் சின்னப் பொம்மை.
சிங்காரப் பொம்மை.
என்ன வேண்டும் சொல்லே?
ஏனோ பேச வில்லை?
பாட ஆட மாட்டாய்.
பரம சாதுப் பொம்மை.
தேட வைத்து விட்டே
தெருவில் ஓட மாட்டாய்!
வளர வில்லை; உன்றன்
வயதும் தெரிய வில்லை.
அழவே மாட்டாய். நல்ல
அழகுப் பொம்மை நீதான்.
கொஞ்ச மேனும் உண்பாய்.
கோபம் வேண்டாம், கண்ணே.
பஞ்சு மெத்தை தாரேன்.
படுத்துக் கொள்வாய், கண்ணே.
தூக்கம் கொள்வ தேனோ?
சொல்லக் கேட்பாய், கண்ணே.
சொக்காய் தைத்தேன்; பாராய்.
ஜோராய்ப் போட்டுக் கொள்வாய்.
அம்மா என்மேல் என்றும்
அன்பு காட்டக் காண்பாய்.
அம்மா வைப்போல் உன்மேல்
ஆசை கொண்டேன், நானே.
