மலரும் உள்ளம்-1/மூக்கும் மணமும்

by குழந்தைக் கவிஞர் அழ. வள்ளியப்பா

 

 

பூக்கள் விற்கும் கடையருகே
போனேன். உடனே, அடடாவோ !
மூக்கில் வாசனை புகுந்ததுவே,
முகத்தில் இன்பம் பொங்கியதே.

‘பத்து விரல்கள் படைத்ததுபோல்
பற்பல மூக்கைப் படைத்திருந்தால்
இத்தனை மணமும் மூக்கினுள்ளே
இழுத்திட லாமே’என நினைத்தேன்.

சாக்கடை தங்கிய வீதியிலே
சற்றே ஒருநாள் நடந்திடவே
மூக்கைத் துளைத்தது, துர்நாற்றம்.
முகமும் சுருங்கிப் போனதுவே!

‘மூக்கே இல்லா திருந்திட்டால்,
மிகமிக நல்லது’ என்றெண்ணி
மூக்கைப் பிடித்துக் கொண்டேநான்
மும்முர மாக நடந்தேனே!