வான்மீகர் சூத்திர ஞானம்
நூல் 21
வான்மீகர் சூத்திர ஞானம்
தொகுப்பு நூல் பக்கம் 319
1-5
[தொகு]1
இருள் வெளியாய் நின்ற சிவ பாதம் போற்றி
- எழுத்து அதனின் விவரத்தை விரித்துச் சொல்வேன்
அரு உரவாய் நின்று அதுவே எழுத்து அது ஆகும்
- ஆதி அந்தம் அண்ட பிண்டம் அதுவே ஆகும்
திரு உருவாய் ரவி மதியாய் நின்ற ரூபம்
- சிவ சத்தி திருமாலின் ரூபமாகும்
வரும் உருவே சிவ சத்தி வடிவம் ஆகும்
- வந்ததிலும் போனதிலும் மனத்தை வையே
2
வந்ததுவும் போனதுவும் வாசி ஆகும்
- வானில் வரும் ரவி மதியும் வாசி ஆகும்
சிந்தை தெளிந்து இருப்பவனார் அவனே சித்தன்
- செகம் எல்லாம் சிலம் என்றே அறிந்தோன் சித்தன்
நந்தி என்ற வாகனமே தூல தேகம்
- நான் முகனே கண் முக்குச் செவி நா காக்கும்
தந்தி முகன் சிவ சத்தி திரு மூச்சாகும்
- தந்தை தாய் ரவி மதி என்று அறிந்து கொள்ளே
3
அறிந்து கொள்ளு பூரகமே சரியை மார்க்கம்
- அடங்குகின்ற கும்பகமே கிரியை மார்க்கம்
பிரிந்து வரும் ரேசகமே யோக மார்க்கம்
- பிசகாமல் நின்றதுவே ஞான மார்க்கம்
மறிந்து உடலில் புகுகின்ற பிராண வாயு
- மகத்தான சிவ சத்தி அடங்கும் வீடு
சிறந்து மனத் தெளிவாகிச் சேர்ந்தோன் சித்தன்
- சிவசிவா அவன் அவன் என்று உரைக்கல் ஆமே
4
ஆமப்பா உலகத்தில் பெரு நூல் பார்த்தோர்
- அவர் அவர் கண்டதை எல்லாம் சரிதை என்பார்
ஓமப்பா கல் செம்பைத் தெய்வம் என்றே
- உருகுவார் பூசிப்பார் கிரியை என்பார்
வாமப்பா யோகம் என்று கனி காய் தின்று
- வாய் பேசா ஆமையைப் போல் திரிகுவார்கள்
காமப்பா ஞானம் என விண்டு மேலும்
- காக்கை பித்தன மிருகம் போல் சுற்றுவாரே
5
சுற்றுவார் பெருநூலைப் பார்த்துப் பார்த்துத்
- தூடிப்பார் உலகத்தில் சில் சில்லோர்கள்
தெற்றுவார் அவர் பிழைக்க அனேக வேடம்
- தேகத்தில் அணிந்து கொண்டு திரிகு வார்கள்
பற்றுவார் குருக்கள் என்பார் சீடர் என்பார்
- பையவே தீட்சை வைப்பார் தீமை என்பார்
கத்துவார் திரிமூர்த்தி தாமே என்று
- காரணத்தை அறியாத கசடர் தானே
6-10
[தொகு]6
தான் என்ற உலகத்தில் சில் சில்லோர்கள்
- சடை புலித்தோல் காசாயம் தாவடம் பூண்டு
ஊன் என்ற உடம்பு எலலாம் சாம்பல் பூசி
- உலகத்தில் யோகி என்பார் ஞானி என்பார்
தான் என்ற சிவபூசை தீட்சை என்பார்
- திருமாலைக் கண்ணாலே கண்டோம் என்பார்
கான் என்ற காட்டுக்குள் அலைவார் கோடி
- காரணத்தை அறியாமல் கதறுவாரே
7
கதறுகின்ற பேர்கள் ஐயா கோடா கோடி
- காரணத்தைக் கண்டவர்கள் கொஞ்சம் கொஞ்சம்
பதறுகின்ற பேர்கள் எல்லாம் பரா பரத்தைப்
- பற்றி நின்று பார்த்தவர்கள் சுருக்கம் அப்பா
உதறுகின்ற பேர்கள் எல்லாம் உலகத்து உள்ளே
- உதித்த கலை தம்முள்ளே அறிய மாட்டார்
சிதறுகின்ற பேர்களைப் போல் சிதறிடாமல்
- சிலசத்தி வரும்போதே தன்னில் நில்லே
8
நில்லென்ற பெரியோர்கள் பாடை யாலே
- நீடுலகம் தன்னுள்ளே நாலு வேதம்
வல்லமை யாய்ச் சாத்திரங்கள் இருமூன்றாக
- வயிறு பிழை புராணங்கள் பதினெட்டாகக்
கல்லுகளைக் கரைப்பதைப் போல் வேதாந்தங்கள்
- கட்டினார் அவர் அவர்கள் பாடையாலே
தொல் உலகில் நாற் சாதி அநேகம் சாதி
- தொடுத்தார்கள் அவர் அவர்கள் பிழைக்க தானே
9
தான் என்ற உலகத்தில் இல்லா விட்டால்
- தன்பெருமை யால் அழிந்து சகத்தில் வீழ்வார்
ஊன் என்ற உடம்பு எடுத்தால் எல்லாம் வேணும்
- உலகத்தில் அவர் அவர்கள் பாடை வேணும்
மான் என்ற சிவகாமி சிவனும் கூடி
- மாமுனிவர் முகம் பார்த்து மறைநூல் சொன்னார்
தேன் என்ற சிவகாமி அருளினாலே
- திரட்டினார் வெகு கோடி தேச பாடை
10 தேசத்தின் பாடைதனை அறிந்திடாமல்
- தெளிவாகத் தாம் உரைப்பார் பாடை பார்த்தோர்
ஆசிப்பார் உலகத்தில் கண்டது எல்லாம்
- ஆச்சரியம் தனைக்கண்டு மறந்து போவார்
வாசிதனை அறியாத சண்டி மாண்பர்
- வார்த்தையினால் மருட்டி வைப்பார் வகை இல்லாமல்
நாசி நுனி அதன் நடுவில் சிவத்தைக் கண்டோர்
- நான்முகனும் திருமாலும் சிவனும் தாமே
11-15
[தொகு]11
சிவசிவா பதினெண் பேர் பாடற்கு எல்லாம்
- திறவு கோல் வால்மீகன் பதினாறாகும்
சிவம்பெத்த சித்தர் எல்லாம் என்னூல் பார்த்துச்
- சிவனோடே கோள் சொன்னார் சினந்தான் நாதன்
அவமாகிப் போகாமல் சிவன் உத்தார
- அருளினால் திறந்து சொன்னேன் உலகுக்காக
நவமான நவக்கிரகந் தன் உள்ளேயே
- நாக்கு வாய் செவி மூக்கு மத்திக்கு அப்பால்
12
நாக்கு வாய் செவி மூக்கு மத்திக்கு அப்பால்
- நடுவீதி குய்யம் முதல் உச்சி தொட்டுத்
தாக்குவாய் அங்கு என்றே அதிலே மூட்டுத்
- தாயாரைப் பூசித்து வேதம் ஓது
வாக்கு வாய் அசையாமல் மவுனம் கொண்டு
- வாசி வரும் இடத்தில் மனம் வைத்துக் காத்து
நீக்குவாய் வாசியொடு மனம் தான் புக்கு
- நினைவு அதனில் அடங்கி வரும் வரிசை காணே
13
காணரிதே எவராலும் இரு சுவாசம்
- காண்பவனே சிவ சித்தன் அவனே யாகும்
பூணரிது இவ்வுலகில் இந்நூல் கிட்டில்
- பூலோக சித்தன் என உரைக்கல் ஆகும்
காணரிது சிவசத்தி திரு மூச்சாகும்
- காட்டாதே மூடருக்குமே இந்தூல் தன்னை
தோணரிது விழி மயக்கம் சும்மாப் போமே
- சொல்லரிய சூட்சுமத்தைச் சொன்னேன் அப்பா
14
சூட்சம் இந்நூல் சொல்லுகிறேன் வாசி காண
- சூட்சாதி சூட்சத்தைத் துறக்கப் போகா
சாட்சியில்லை துணையில்லை கேள்வியில்லை
- சந்தேகம் ஒன்னும் இல்லை விழியைக் காண
காட்சி என்ன கற்பகத்தில் வசிக்குமாப் போல்
- காரணத்தைக் கண்ணாலே கண்டு இருக்க
ஆட்சி தரும் உமையாள் அப்படியே கண்டேன்
- ஆனந்தத் திருக்கூத்தின் நடக்கை காப்பே
15
காப்பதற்குப் பத்தியத்தைச் சொல்லக் கேளு
- காய்கனிகள் பஞ்சரசம் பரமா அன்னங்கள்
ஏற்கையுடன் உண்டு கொண்டு சிவத்தைக் காத்தே
- என் மகனே சித்தருடைக் குருநூல் பாராய்
ஆத்து மத்துக்கு அழிவு இல்லாது இருக்க வேணும்
- அவர் அவர்கள் நித்ய கர்மம் நடக்க வேணும்
தீர்க்கமுடன் நின்றவர்க்கு வாசி சித்தி
- சிறப்புடனே பதினாறும் பலிக்கும் தானே
16
[தொகு]16
தான் அவனாய் இருக்க என்றால் வாசி வேணும்
- தனக்குள்ளே தான் நிற்க இடமும் வேணும்
வானவனாய் நின்றவர்கட்கு எல்லாம் சித்தி
- வானுக்குள் மனம் இருக்க மதிபோல் காணும்
தேனவனாம் சித்தருக்குத் தெவிட்டா மூலி
- சிரசப்பா உடலுக்குப் பதியே யாகும்
கோன் அவனாய் இருக்க வென்று குறியைச் சொன்னேன்
- குவலயத்தில் பதினாறும் குறுகத் தானே
- முற்றும்