10ம் திருமொழி கார்க்கோடல் பூக்காள்
மால் செய்வகையோடு மாற்றம் இயம்பல்
கலிநிலைத்துறை
கார்க்கோடல் பூக்காள்! கார்க்கடல் வண்ணனென் மேல்*உம்மைப்
போர்க்கோலம் செய்து போர விடுத்தவன் எங்குற்றான்?*
ஆர்க்கோ இனிநாம் பூச லிடுவது* அணிதுழாய்த்
தார்க்கோடும் நெஞ்சந் தன்னைப் படைக்கவல்லேன் அந்தோ! 1
மேற்றோன்றிப் பூக்காள்! மேலுல கங்களின் மீதுபோய்*
மேற்றோன்றும் சோதி வேத முதல்வர் வலங்கையில்*
மேற்றோன்று மாழியின் வெஞ்சுடர்போலச் சுடாது*எம்மை
மாற்றோலைப் பட்டவர் கூட்டத்து வைத்துகொள் கிற்றிரே. 2
கோவை மணாட்டி! நீயுன் கொழுங்கனி கொண்டு*எம்மை
ஆவி தொலைவியேல் வாயழகர் தம்மை யஞ்சுதும்*
பாவி யேன்தோன்றிப் பாம்பணை யார்க்கும்தம் பாம்புபோல்*
நாவு மிரண்டுள வாய்த்து நாணிலி யேனுக்கே. 3
முல்லைப் பிராட்டி!நீயுன் முறுவல்கள் கொண்டு*எம்மை
அல்லல் விளைவியே லாழிநங்காய்!உன்ன டைக்கலம்*
கொல்லை யரக்கியை மூக்கரிந்திட்ட குமரனார்
சொல்லும் பொய்யானால்* நானும் பிறந்தமை பொய்யன்றே. 4
பாடும் குயில்காள்! ஈதென்ன பாடல்?* நல்வேங்கட
நாடர் நமக்கொரு வாழ்வுதந்தால்வந்து பாடுமின்*
ஆடும் கருளக் கொடியுடை யார்வந்து அருள்செய்து*
கூடுவ ராயிடில் கூவிநும் பாட்டுகள் கேட்டுமே. 5
கணமா மயில்காள்! கண்ணபிரான்திருக் கோலம்போன்று*
அணிமா நடம்பயின் றாடுகின்றீர்க்கடி வீழ்கின்றேன்*
பணமா டரவணைப் பற்பலகாலமும் பள்ளிகொள்*
மணவாளர் நம்மை வைத்தபரிசிது காண்மினே. 6
நடமாடித் தோகை விரிக்கின்றமாமயில் காள்!*உம்மை
நடமாட்டங் காணப் பாவியேன்நானோர் முதலிலேன்*
குடமாடு கூத்தன் கோவிந்தன் கோமிறை செய்து*எம்மை
உடைமாடு கொண்டா னுங்களுக்கினியொன்று போதுமே? 7
மழையே! மழையே! மண்புறம் பூசியுள் ளாய்நின்ற*
மெழுகூற்றி னாற்போல் ஊற்றுநல் வேங்கடத் துள்நின்ற*
அழகப் பிரானார் தம்மையென் நெஞ்சத் தகப்படத்
தழுவநின்று* என்னைத் ததர்த்திக்கொண்டூற்றவும் வல்லையே? 8
கடலே! கடலே! உன்னைக் கடைந்து கலக்குறுத்து*
உடலுள் புகுந்துநின் றூறல் அறுத்தவற்கு* என்னையும்
உடலுள் புகுந்துநின் றூறல் அறுக்கின்ற மாயற்கு*என்
நடலைக ளெல்லாம் நாகணைக் கேசென்று ரைத்தியே. 9
நல்லஎன் தோழி! நாகணைமிசை நம்பரர்*
செல்வர் பெரியர் சிறுமானிடவர்நாம் செய்வதென்*
வில்லி புதுவை விட்டுசித்தர்தங்கள் தேவரை*
வல்ல பரிசு வருவிப்ப ரேலது காண்டுமே. 10
ஆண்டாள் திருவடிகளே சரணம்
