நையாண்டிப் புலவர் தனிப்பாடல்கள்

பாடலுக்குக் குறிப்புரை – செங்கைப் பொதுவன்

பாடல் 1

விருத்தம்

விற்கம்பத் தடியாலும் அடியுண்டான் விண்ணவரை வேலை கொள்ளும்

நற்கம்பத் தடியாலுந் தூக்க வசையான் ஆரூர் நாதன் கோயில்

பொற்கம்பத் தடியினின்று வன்மீகத்தானை யுன்னிப் போற்றினோர்க்குச்

சொர்க்கம்பத் தடியப்பான் மோக்ஷம் பத்தடியாகத் தோற்றுந்தானே. (1)

கட்டளைக் கலித்துறை

செங்கை வரிச்சிலை தங்கமதைச் சம்புத்தீவு தன்னில்

எங்கு வைத்தாலும் அப்பள்ளி கொண்டான் தமிழ்க் கீவனென்றே

திங்கள் இரவி தினம் சுற்றிக் காக்கத் திரை சுருட்டுங்

கங்கைக்கு முத்தரத்தே யொளித்தான் உமை காதலனே. (2)

மேலாடை யின்றிச் சுவை புகுந்தால் இந்த மேதினியோர்

நூலாயிரம் படித்தாலும் எண்ணார் நுவல் பாற்கடலோ

மாலானவர் அணி பொன்னாடை கண்டு மகளைத் தந்தே

ஆலாலம் ஈந்தது தோலாடை சுற்றும் அரன் தனக்கே. (3)

வள்ளி கொண்டான் மயிலேறிக் கொண்டான் மதிபோலு மலை

வெள்ளி கொண்டான் விடையேறிக் கொண்டான் வண்ணவர்க்கு அமுதம்

துள்ளி கொண்டான் புள்ளில் ஏறிக்கொண்டான் சுபசோபனம் சேர்

பள்ளி கொண்டான் புகழேறிக் கொண்டான் என்று பார்க்க வென்றே. (4)

எல்லீசு

செந்தமிழ்ச் செலவனும் ஓராயிரம் தலைச் சேடனும் யாழ்

சுந்தரத் தோடிசை வல்லோனும் யாவரும் தோத்திரஞ் செய்

கந்தனைச் சொல்லுங் கவிராமச் சந்தரனைக் கண்டு வெட்கி

யந்தர வெற்பிழி பாதாளத்தோடி யடங்கினரே. (5)