வீரசோழியம்

வீரசோழியம்
(புரவலன் வீரசோழன் பெயரால் பாடப்பட்ட இலக்கண நூல்)

பொன்பற்றிக் காவலர்
புத்தமித்திரனார் இயற்றியது

திருநெல்வேலித் தென்னிந்திய
சைவ சித்தாந்த நூற்பதிப்புக் கழகம், சென்னை 1
வெளியீடு 1970

பாயிரம்

கட்டளைக் கலித்துறை

1

மிக்கவன் போதியின் மேதக்(கு) இருந்தவன் மெய்தவத்தால்

தொக்கவன் யார்க்கும் தொடர வொண்ணாதவன் தூயன் எனத்

தக்கவன் பாதம் தலைமேல் புனைந்து தமிழ் உரைக்கப்

புக்கவன் பைம்பொழில் பொன்பற்றி மன் புத்தமித்திரனே

2

ஆயும் குணத்து அவலோகிதன் பக்கல் அகத்தியன் கேட்டு

ஏயும் புவனிக்கு இயம்பிய தண்டமிழ் ஈங்கு உரைக்க

நீயும் உளையோ எனில் கருடன் சென்ற நீள் விசும்பில்

ஈயும் பறக்கும் இதற்கு என்கொலோ சொல்லுவது ஏந்திழையே

3

நாமே எழுத்துச் சொல் பொருள் யாப்பு அலங்காரம் எனும்

பா மேவு பஞ்ச அதிகாரமாம் பரப்பைச் சுருருக்கித்

தே மேவிய தொங்கல் தேர் வீரசோழன் திருப் பெயரால்

பூ மேல் உரைப்பன் வடநூல் மரபு புகன்றுகொண்டே

முதலாவது - எழுத்து அதிகாரம்

சந்திப் படலம்

1

அறிந்த எழுத்து அ முன் பன்னிரண்டு ஆவிகள் ஆன, க முன்

பிறந்த பதினட்டு மெய், நடு ஆய்தம், பெயர்த்து இடையா

முறிந்தன அம் மூவாறும், ஙஞணநமன என்று

செறிந்தன மெல்லினம் செப்பாத வல்லினம், தேமொழியே.

2

இறுதிமெய் நீக்கிய ஈராறில் ஐந்து குறில் நெடில் ஏழ்

பெறு வரியான் நெடு நீர்மை அளபு பிணைந்த வர்க்கம்

மறு அறு வல்லொற்று மெல்லொற்றும் ஆம் வன்மை மேல் உகரம்

உறுவது நையும் தொடர்மொழிப் பின்னும் நெடில் பின்னுமே

3

அகரம் வகரத்தினோடு இயைந்து ஔ ஆம் யகரத்தினோடு

அகரம் இயைந்து ஐ அது ஆகும் ஆ ஏ ஓ வினா அந்தம் ஆம்

எகர ஒகர மெய்யில் புள்ளி மேவும் அ இ உ சுட்டாம்

இகரம் குறுகி வரும் குற்றுகரம் பின் ய வரினே

4

ஏயாஎச் சொன்முன் வினாஎடுத் தல்படுத் தல் நலிதல்

ஓயா துரப்பல் எனநால் வகையிற் பிறக்குமெய்கள்

சாயா மயக்கந்தம் முன்னர்ப் பிறவொடு தாமும்வந்து

வீயாத ஈரொற்று மூவொற் றுடனிலை வேண்டுவரே

5

குற்றெழுத் தொன்(று) ஒன் றரையாகு மையௌ இரண்டுநெடில்

ஒற்றெழுத் தாய்தம்இ உஅரை மூன்றள (பு) ஓங்குயிர்மெய்

மற்றெழுத் தன்றுயிர் மாத்திரை யேபெறும் மன்னுகின்ற

ஒற்றெழுத் தின்பின் னுயிர்வரின் ஏறும் ஒளியிழையே

6

உந்தி முதலெழுங் காற்றுப் பிறந்துர முஞ்சிரமும்

பந்த மலிகண் டமுமூக்கும் உற்றண்ணம் பல்லுடனே

முந்து மிதழ்நா மொழியுறுப் பாகு முயற்சியினால்

வந்து நிகழு மெழுத்தென்று சொல்லுவர் வாணுதலே

7

ஆவி யனைத்தும் கசத நபமவ் வரியும்வவ்வில்

ஏவிய எட்டும்யவ் வாறும்ஞந் நான்கும் எல் லாவுலகும்

மேவிய வெண்குடைச் செம்பியன் வீரரா சேந்திரன்றன்

நாவியல் செந்தமிட் சொல்லின் மொழிமுதல் நன்னுதலே

8

ஈறும் மகர ணகரங்க டாமும் இடையினத்தில்

ஏறும் வகரம் ஒழிந்தைந்தும் ஈரைந் தெழிலுயிரும்

வீறுமலிவேங் கடங்கும லிக்கிடை விகாரம்வந் தெய்திடும் மேவிற்றென்று

கூறுந் தமிழினுக் கீற்றெழுத் தாமென்பர் கோல்வளையே

9

நின்றசொலு லீறும் வருஞ்சொன் முதலும் நிரவித்தம்முள்

ஒன்றிடும் போதும் ஒரோமொழிக் கண்ணு முலகிற்கொப்பி

னன்றிய மும்மை விகாரம்வந் தெய்திடும் நன்கியல்பிற்

குன்றுத லின்றி வருதலு முண்டென்று கூறுவரே

10

ஆன்றா முலோபத்தொ டாகம மாதேச மாரியத்துள்

மூன்றா மொழியோ டெழுத்து விகாரம் முதனடுவீ

றேன்றாம் வகையொன்ப தாகலு முண்(டு)அவையெவ் விடத்துந்

தோன்றா வுலகத் தவர்க்கொத்த போதன்றித் தூமொழியே

11

சொன்ன மொழிப்பொருணீக் குநகாரம் அச் சொன்முன் மெய்யேல்

அந்நிலை யாக வுடல்கெடும் ஆவிமுன் னாகிலது

தன்னிலை மாற்றிடும் ஏஓ இரண்டும் தனிமொழிமுன்

மன்னிய ஐஔவு மாகும் வடமொழி வாசகத்தே

12

ஆவும் அகரக் கிரகத்துக் கையும்ஔ வும்உகரக்

கேவும் இருவினுக் காரும் விருத்தி எழிலுகரக்

கோவும் இகரத்திற் கேயுங் குணமென் றரைப்ப வந்து

தாவும் இவைதத்தி தத்தினுந் தாதுப் பெயரினுமே

13

மூன்றொடு நான்கொன்ப தாமுயிர்ப் பின்னுயிர் முந்தின்டு

ஆன்ற மகாரம்வந் தாகம மாகும் அல் லாவுயிருக்

கேன்ற வகாரம் எட் டேற்கும் இரண்டும் இறுதிகெட்டுத்

தோன்று நிலையும் ஒரோவிடத் தாமென்பர் தூமொழியே

14

ஆறா முடலின்பின் தவ்வரின் ஆங்கதைந் தாமுடலாம்

ஊறார்ந்த நவ்வரின் முன்பின தாம் குறிற் பின்புமெய்கள்

ஏறா வுயிர்பின் வரவிரண் டாகும் யவ் வோடுரழ

ஈறா வரில்வன்மை பின்பில்வர்க் கத்தொற் றிடைப்படுமே

15

நான்கொடு மூன்றொன்ப தாமுயி ரின்பின்பு நவ்வருமேல்

ஏன்ற ஞகாரம தாகும் பதினைந்தொ(டு)எண்ணிரண்டாய்த்

தோன்றுடற் பின்னர்த் தகாரம் வரினிரண் டுந்தொடர்பால்

ஆன்றவைந் தாமுடல் ஆம் முன்பி லொற்றுக் கழிவுமுண்டே

16

எண்ணிரண் டாமொற்று வன்மைவந் தாற்பின் பியைந்தவைந்தா

நண்ணிய வொற்றாம் நகரம் வரின்முன்மெய் ணவ்வதுவாம்

தண்ணிய மவ்வந் திடினு மஃதே தனிநெடிற்பின்

பண்ணிய வொற்றுப்பின்றான்வரப் போமொரு காற்பயின்றே

17

பன்முன்ற தாமுடல் நப்பின் வருமெனி னீற்றெழுத்தாம்

பன்னேழதாம் வன்மை பின்வரின் ஆயிடைத் தவ்வுமஃதாம்

பின்னா மிகீரா மதுபன்னொன் றாமுடல் பின்வருமேல்

சொன்னா ரியலின்பின் றோன்று நகார ஞகாரமென்றே

18

ஐம்மூன்ற தாமுடல் வன்மைபின் வந்திடில் ஆறொடைந்தாம்

மெய்ம்மாண்பதாம் நவ் வரின் முன்னழிந்து பின்மிக்கணவ்வாம்

மம்மேல் வரினிரு மூன்றா முடல் மற் றியல்புசந்தி

தம்மா சகலங் கிடப்பின்க ளாமென்ப தாழ்குழலே

19

வன்மைவந் தாற்பின்பு பத்தா முடல்வன்மை யின்வருக்கத்

தன்மையொற் றாகும் ஞநமக்கள் பின்வரிற் சாற்றும்பபோம்

முன்வயிற் கால்வவ் வரின் பதின் மூன்றா முடலழியும்

பின்வயின் தவ்வுங் கடைவன்மைப் பெறுறுமே

20

ஈற்றின்பின் நவ்வரி னீற்றெழுத் தாம் எழில் தவ்வரில் தவ்

வேற்றுப் பதினேழ தாமுட லாம் எய்தும் ஆவியின் பின்

ஆற்றுந் திறல்வல் லினம்வந் திடிலவற் றின்வருக்கம்

போற்று மிவையென்ற வல்லொற்று மெல்லொற்றும் புக்கிடுமே

21

ஆவிபின் றோன்றக் கேடுங்குற் றுகரம் அவற்றின் மெல்லொற்

றேவிய வாறெழில் வல்லொற்று மாம் இனி வன்மையொற்று

மேவி யதன்முன் விளைதலும் வேண்டுவர் ஆவிவந்தாற்

பாவிய முற்றுக ரத்தின் சிதைவும் பகர்ந்தனரே

22

ஈறாம் லகார மதவந் தெதிர்ந்திடில் ஈற்றெழுத்தேல்

ஆறாங் கடைவன்மை யாம்வன்மை தோன்றில் ஐந் தாமுடலாம்

ஆறா முடல்வல் லினம்வரின் ஆவிமு னாவியொடுங்

கூறா ழகார மழிந்து டகாரங் குறுகிடுமே

23

ஒன்றுக் கொருவோர் இருவீர் இரண்டுக்கு மூன்றுமும்மூ

அன்றுற்ற நாலுக்கு நான்கைந்தை யாறறு ஏழெழுவாம்

தொன்றுற்ற எட்டுக்கெண் ணொன்பதொன் பானொடு தொண்டொள்ளும் பான்

பன்றுற்ற நூறு பதுபஃது பத்து நூ றாயிரமே

24

ஆவிக் குறிற்பின் ஞநமவத் தோன்றிலவ் வொற்றிடையாம்

மேவிய பன்னொன்று தோன்றில்வவ் வாம் மெய்யில் ஐந்திருமுன்

றாவது முண்(டு)ஒற் றொரோவழித் தோன்றிடும் ஆவுமவ்வாய்த்

தாவிய வைந்தா முயிர்பின் பெறுவன தாமுமுண்டே

25

நின்றசொல் லீற்றுமெய்ம் முன்னா முதலுயிர் நீண்டுமெய்யும்

பொன்று முயிரொ டுயிர்மைவந் தால் வந்த ஆவியும்போய்க்

குன்று மொரோவழி கூறிய ஆவி யொரோவழிப்போம்

அன்றி லனள ணமனக்க ளொன்றுக்கொன் றாவனவே

26

கூறிய சுட்டின்பின் னாய்தமுங் கூடும் சுட் டீற்றுகரம்

மாறி யுயிரிரண் டாவது மாம் வந்த சுட்டொருகால்

வீறுடை நெட்டெழுத் தாகும் அளபும் விரிந்துநிற்கும்

நூறுடை வெள்ளிதட் டாகரைக் கோயி னுடங்கிடையே

27

துப்பார் பெயர்வேற் றுமையி னகத்துந் தொகையின்கண்ணுஞ்

செப்பார் மொழிமுதற் பின்சாரி யைவரிற் றேர்ந்தவற்றுள்

ஒப்பார் மொழியீ றுயிரொடும் போமொரு காலுடல்போம்

தப்பா வுயிர்மெய் கெடுமொரு காலென்பர் தாழ்குழலே

28

எண்ணிரண் டாமொற்றுப் பன்மூன்று மெய்நின் றிவற்றின் பின்னே

அண்ணிய தவ்வரின் தட்டற வாம் அவை யாய்தமுமாம்

பண்ணிய சந்தி பகரா தனவும் பகர்ந்தவற்றாற்

கண்ணி யுரைக்க மதியால் வனசக் கனங்குழையே

2 சொல்லதிகாரம்

1 வேற்றுமைப் படலம்

29

எட்டாம் எழுவாய் முதற்பெயர் வேற்றுமை ஆறுளவாம்

கட்டார் கருத்தா முதற்கா ரகம் அவை கட்டுரைப்பின்

ஒட்டார் கருத்தா கருமங் கரணமொண் கோளியொடும்

சிட்டா ரவதியொ டாதாரம் என்றறி தேமொழியே

30

ஒருவ னொருத்தியொன் றாஞ்சிறப் போடுபல் லோர்பலவைக்

கருது முறையிற் கலப்பன வேற்றுமை காண்முதல்சு

மருவும்அர் ஆர்அர்கள் ஆர்கள்கள் மார்முதல் வேற்றுமையின்

உருவம் விளிவேற் றுமையொழித் தெங்கு முறப்பெறுமே

31

ஒருவ னொருத்தி பலரொன் றொடுபல வஞ்சிறப்பின்

உருபுகண் மூன்று முடன்வைத்துப் பின்னெட்டு வேற்றுமையும்

மருவ நிறுவி யுறழ்தர வாங்கா ரகபதங்கள்

உருவு மலியு மறுபத்து நான்குள ஒண்டொடியே

32

ஆதியி லா ண்பெ ணலியென்று நாட்டி யதினருகே

ஓதிய வேற்றுமை யேழையுஞ் சேர்வித் தொருங்க தன்பின்

வாதிய லொன்றொ டிரண்டு பலவென வைத்துறழத்

கீகிய லாத வறுபத்து மூன்றுறந் தேர்ந்தறியே

33

கூறிய சொற்பின் பொருண்மாத் திரத்திற் குலவெழுவாய்

வீறுடை வேற்றுமை யெய்து மொருவ னொருத்தியொன்றின்

ஏறிய சுப்பல விற்சுவ்வுங் கள்ளுமெங் கும்மழியும்

ஊறிய சுச்சிறப் புப்பல ரிற்கள் ளொழிந்தனவே

34

ஐயென் பதுகரு மத்திரண் டாவ ததுவொருகாற்

பைய வழிதரும் மூன்றோடொ டாலாம் பகர்கருத்தா

வைய நிகழ்கர ணத்தின் வரும் குப் பொருட்டென்பல

மெய்திகழ் வேற்றுமை நான்காவ தாமிக்க கோளியிலே

35

ஆனாளா ரார்க ளதுவின வாறிற் குடைப்பின் குவ்வேல்

நூனா டியபத மாநூவ லாதார மேழினிற்கே

தானா முழைவயின் பக்க லுழியில்கண் சார்பிறவும்

வானா மலிநின்ற வற்றில் வரூஉமைந் தவதியிலே

36

ஆயாளி யேயவ்வொ டாவானோ லோயீ ரளபெடைகாள்

மாயா விளியி னுருபுகள் மற்றிவை முன்னிலைக்கண்

ணேயாகும் முன்சொன்ன வேழ்வேற் றுமையுமெல் லாவிடத்தும்

ஓயா தியல்கை யுணர்பெரி யோர்த முரைப்படியே

37

உன்னுமென் னுந்தன்னும் யாவுமவ் வும்மிவ்வு முவ்வுமெவ்வு

மென்னு மிவற்றின்முன் னீநான்றான் சுவ்வரில் யாமுதல

வன்னும்வள் ளுந்துவ்வும் வையிஞ் சிறப்பினீர் நாமொடுதாம்

பின்னிலைந் தும்வர் பலரிற்கள் ளோடுவர் கள்ளென்பவே

2. உபகாரகப் படலம்

38

மேதகு நற்றொழில் செய்வான் கருத்தா வியன்கருவி

தீதில் கரணம் செயப்பட்ட தாகுந் திறற்கருமம்

யாதனி னீங்கு மவதிய தாம்இட மாதாரமாம்

கோதறு கோளிமன் கொள்பவ னாகுங் கொடியிடையே

39

வரைநின் றிழிந்தங்கொர் வேதியன் வாவியின் கண்மலிந்த

விரைநின்ற பூவைக் கரத்தாற் பறித்து விமலனுக்குத்

துரைநின்ற தீவினை நீங்கவிட் டானென்று சொல்லுதலும்

உரைநின்ற காரக மாறும் பிறக்கும் ஒளியிழையே

40

காரணந் தான்தெரி தான்தெரி யாக்கரு மந்தலைமை

ஆரணங் கேயைந் துளகருத் தாஅச லஞ்சலமாம்

பூரண மாகும் அவதிபுறமக மாங்கரணம்

சீரணங் கார்வங் கிடப்பிரப் பாங்கோளி தேமொழியே

41

பற்றொடு வீடே யிருபுறந் தான்தெரி தான்தெரியா

நற்கருத் தாத்தீ பகமாங் கருமம் நான் காதாரமேற்

பொற்பமர் சேர்வு கலப்புப் புலனொ டயலென்பதாம்

கற்பு மலியு மிருபத்து மூவகைக் காரகமே

42

ஆதிய தான்தெரி யாக்கருத் தா அதல் லாக்கருத்தா

ஆதிய தாறொடு மூன்றும் பெறுமென்பர் ஆதியையே

ஓதினர் தான்தெரி யாக்கரு மத்திற்(கு) ஒழிகருமம்

மேதகு மூன்றிரண் டாறுநான் காமென்பர் மெல்லியலே

43

மூன்றைந்தொ டாறு கரணம் பெறும் முரட் கோளியதே

மூன்றிரு மூன்றொடு நான்காந் தருமுறை யால் அவதி

தோன்றுமைந் தாம் மற்றை யாதார மேழின்க ணேயென்பவாம்

வான்றிக டெய்வ வடநூற் புலவர்தம் வ்வாய்மொழியே

உபகாரப்படலம் முற்றும்.

தொகைப் படலம்

44

நாமங்க ளிற்பொருந் தும்பொருள் நற்றொகை அத்தொகைக்கண்

தாமங் கழியுமுன் சாற்றிய வேற்றுமை வேற்றுமையைச்

சேமங்கொள் சார்பாக வெய்திய சொல்லுஞ் சிலவிடத்துப்

போமங் கதன்பொருள் தன்னையெல் லார்க்கும் பொருட்படுத்தே

45

தற்புரு டன்பல நெற்கன்ம தாயந் தாங்கியசீர்

நற்றுவி குத்தொகை நாவார் துவந்துவம் நல்லதெய்வச்

சொற்பயன் மாந்தர்க ளவ்விய பாவமி தென்றுதொன்மை

கற்பக ம்பபகர்ந் தார்தொகை யாறும் கனங்குழையே.

46

எழுவாய் முதலெழு வேற்றுமை யோடு மெழுந்தடையில்

வழுவாத நஞ்சொடெட் டாந்தற் புருடன் வளர்துவிகு

தழுவார்ந்த எண்மொழி முன்னாய் வருந்தத் திதப்பொருண்மேல்

குழுவா ரொருமையொப் புப்பன்மை யொப்புக் குறியிரண்டே.

47

இருமொழி பன்மொழி பின்மொழி யெண்ணோ டிருமொழியெண்

மருவும் விதியர் ரிலக்கண மற்றைச் சகமுன்மொழி

பரவும் திகந்தரா ளத்தொகை யென்னப் பலநெற்றொகை

விரியுமொ ரேழவை வேற்று மொழிப்பொருண் மெல்லியலே

48

முன்மொழிப் பண்பு மிருமொழிப் பண்பு மொழிந்தமைந்த

பின்மொழி யொப்பொடு முன்மொழி யொப்பும் பிணக்கொன்றிலா

முன்மொழி நற்கருத் தும்முன் மொழிநற் றுணிவுமென

நன்மொழி யார்கன்ம தாரய மாறென்ன நாட்டினரே

49

முன்மொழி யவ்வியஞ் சேர்தொகை பேர்முன் மொழித்தொகையே

சொன்மொழி யவ்விய பாவம் மருவும் துவந்துவமும்

வன்மொழி யாமித ரேதரம் வாய்ந்த சமாகாரமாம்

நன்மொழி யானுரைத் தார்கள் சமாசம் நறுநுதலே.

50

வேற்றுமை யும்மை வினைபண் புவமையொ டன்மொழியென்(று)

ஆற்றுந் தொகைசெந் தமிழணர்க ளாறென்பர் ஆய்ந்தபண்பில்

தோற்று மளவு வடிவு நிறஞ்சுவை சொல்பிறவும்

ஏற்று மிருபல் லளவு நிறையெண் பெயரும்மையே.

51

அன்மொழி நற்றொகை யிற்றொகும் போதுமல் லாவிடத்தும்

நன்மொழிப் பின்பு நடுவுங் கெடுநன் கொரோவிடத்து

முன்மொழி யீறு கெடும் பன்மை யாகும் முரட்பொருள் கோள்

பின்மொழி முற்சொற் பிறிதோர் மொழியொ டிருமொழியே.

தொகைப்படலம் முற்றும் .

தத்திதப்படலம்

52

அன்னிய னீன னிகனேயன் வான்வதி யம்மிகரம்

வன்னு அகரத்தொ டானாளன் மானக னாதிமற்றுந்

துன்னிய சீர்த்தத் திதத்தின் பிரத்தியஞ் சுவ்வென்பது

மன்னு மரபு பிழையாம லெங்கும் வரப்பெறுமே.

53

உண்ணு மிதனா லுரைக்கு மிதனை யுடையனிது

பண்ணு மிதனைப் பயிலு மிதிற்பயன் கொள்ளுமித்தால்

எண்ணு மிதனை யிதனுக்கு நாயக னீங்கிருக்கும்

நண்ணு மிதனை யிதையொக்கு மிங்குள னன்னயத்தே.

54

மகனிவ னுக்கிய ளுக்கிந்த வர்க்கத் தினனிவனைத்

தகவிய தேவ னெனும்யாவ னென்றுநற் றத்திதங்கள்

நிகழும் பிற பொரு ளின்கண்ணு நிற்கும் நினைந்தவற்றைப்

புகன்மலி தெய்வப் புலவர்க்கும் பொச்ச மடக்கரிதே.

55

மையம் புதுவுகம் வல்லள வாதி குணக்குறிப்பில்

வையம் வலிநெடு வாதிபின் னாம்மன்கன் னானன்வன்னாள்

ஐய மவனமவள் மிம்முத லாகுந் திரப்பியத்திற்

பைய மதிக்க வுலகத் தவர்க்குப் பயன்படவே.

56

அச்சியொ டாட்டி யனியாத் தியத்தி தியாளொடள்ளி

இச்சி யாதியும் பெண்மைத் தெளிவாம் எழில்வடநூல்

மெச்சிய வாகாராந் தத்தினு மூர்ப்பின்னு மிக்க ஐயாம்

நச்சிய ஈகாரந் தானே குறுகும் நறுநுதலே.

57

முந்திய வர்க்கங்க ளைந்தினு முன்னொன்றின் மூன்றடங்கும்

பந்தியில் தெய்வ மொழிமுதல் யவ்வேல் பகருமிய்யாம்

வந்திடும் லவ்விற் குகரமு மாகும் வரில்ரகரம்

அந்த இரண்டொ டகரமு மாமென்பர் ஆயிழையே.

58

முதலொற் றிரட்டிக்கு முப்பத்தொன் றெய்திடின் முன்பினிஃ

திதமிக்க வைந்தாமெய் யாகுந் தனியே யிதனயற்குப்

பதமிக்க சவ்வரு மெண்ணான்கு தவ்வாமுப் பானுறுமுன்

றதனுக்கு லோபமும் யவ்வொடு கவ்வு மறைவர்களே.

59

கூட்டெழுத் தின்பின் யரலக்கள் தோன்றிடிற் கூட்டிடையே

ஓட்டெழுத் தாகப் பெறுமொ ரிகாரம் வவ் வுக்கொருவ்வாம்

மீட்டெழுத் துத்தமி ழல்லன போம்வேறு தேயச்சொல்லின்

மாட்டெழுத் தும்மித னாலறி மற்றை விகாரத்தினே.

தத்திதப்படலம் முற்றும்

தாதுப் படலம்

60

மன்னிய சீர்வட நூலிற் சரபச வென்றுவந்து

துன்னிய தாதுக் களின்போலி போலத் தொகுதமிழ்க்கும்

பன்னிய தாதுக் களைப்படைத் துக்கொள்க முன்னிலையின்

உன்னிய வேவ லொருமைச்சொல் போன்றுல கிற்கொக்கவே.

61

நடவடு செய்பண்ணு நண்ணுபோ சிந்தி நவிலுண்ணிரு

கிடவிடு கூறு பெறுமறு கொள்ளழை வாழ்கிளைவெல்

கடநடு தங்கு கசிபொசி பூசு மிகுபுகுசெல்

இடுமுடி யேந்துகொல் இவ்வண்ண மற்று மியற்றிக்கொள்ளே.

62

வானுமை யம்புகை வல்லிவு நல்லல்லன் பானலைகுத்

தான்விதி வைசி முதல்சுப் பிரத்தியந் தாதுவின்பின்

ஆன வினைக்குறிபு புக்கா லகத்தி லணையுமென்ப

ஊனமில் சொல்லொன்று முன்புநின் றாகலு முண்டென்பரே.

63

தம்மந்தி கன்வம் மனமணந் தன்னக நக்கொடியுச்

சம்மன் மமையகஞ் சர்திர மாவாயு வல்லில்மியான்

கம்மன் தவங்கல் முதலா யினதெய்வத் தாதுவின்கண்

விம்ம வருங்கா ரகத்தும் வினைக்குறிப் பின்கணுமே.

64

அய்யா இகராந்த மவ்வா வுகராந்த மாவிமுன்பு

நையாது நிற்கும் பிரத்தியம் பின்வரின் நற்குணமும்

பொய்யா விருத்தியும் ஓரோ விடத்துப் புகழ்பெயர்ச்சொல்

உந்நா தொழியில் விகாரத்தை யோர்ந்துகொ ளொண்ணுதலே.

65

ஆட்டாற்று தீற்றாதி தாதுக் களையடற் காரிதமென்(று)

ஓட்டா வறிக உரையின் படியொப்பில் விப்பிபின்பு

மூட்டா வறிகா ரிதக்கா ரிதம்முன்பிற் றாதுவின்கட்

காட்டா வறியவை காரிதக் காரிதக் காரிதமே.

66

தாதுவின் பின்பு தனய விறப்பின் நிகட்சியின்கண்

ஓதுங் கிறசுவ்வொ டாநின்ற வாம் கும்மும் மோடுமஃகான்

பேத மலியு மெதிரின்க ணாகும் பிறவும் வந்தால்

ஏதமில் சந்திராந் தம்பிழை யாம லியற்றிக்கொள்ளே.

67

மன்னுந் துமந்தம் பொருட்டுக்கப் பான்தற்கு வானவென்று

பன்னு மெழிற்றாது வின்பின்பி லாகும் பகரில்முன்பு

துன்னிய தாதுத் தொழிற்பொருட் டாகவென் னுந்தொடர்ச்சி

உன்னிய போதென்று தெய்வப் புலவ ருரைத்தனரே.

68

ஆவுமிட் டுந்துவ்வு முவ்விடொ டிய்யு மரும்புலவர்

ஏவுங் கருத்தா விருதொழிற் கொன்றிடின் முன்புநின்று

மேவும் பொருட்டாது வின்பின் வரும்மிக்க தன்பெயரே

பாவுந் துவாந்தம தாமென் றுரைப்பர் பனிமொழியே.

69

இல்லையுண் டாலில் லிவைமுத லாவிடைச் சொற்களுக்கோர்

எல்லையுண் டாக வியற்றவொண் ணாவிசைச் யும்பொருளும்

ஒல்லையுண் டாகநிற் கும்மிட முந்தேர்ந் திவற்றொடொக்கச்

சொல்லையுண் டாக்குக வென்பது நூலின் துணிபொருளே.

70

ஆனாளா ரார்களொ டந்தா விலன்மற் றிலளிலரும்

தானா மிலர்க ளிலதில தாதுத் தடைப் பொருட்கண்

மேனா முரைத்த மரபே வரும் மிக்க வாதொழிமுன்

நானா வுளமற்று நற்றடை மன்னும் பிரத்தியமே.

தாதுப்படலம் முற்றும்

கிரியா பதப் படலம்

71

ஒருவ னொருத்தி சிறப்புப் பலரொன் றொடுபலவை

மருவு படர்க்கை யொடுகால மூன்றையும் வைத்துறழத்

துருவ மலிபதி னெட்டாந் தொழிற்பதம் தொல்கருத்தா

உருவ மலியும் பொருண்மேல் நிகழு மொளியிழையே.

72

முன்னிலை தன்மை யிடத்தினிற் காலங்கள் மூன்றையும்வைத்

துன்னு மொருமை சிறப்பொடு பன்மையு முய்த்துறழ்ந்தால்

பன்னுந் தொழிற்சொல் பதினெட் டுளகருத் தாப்பொருண்மேன்

மன்னி நிகழ்தொகை முப்பதொ டாறும் வகுத்தறியே.

73

தானானுந் தாளாளுந் தாராருந் தார்களொ டார்களென்று

மேனா முரைத்த பிரத்திய மாகுந் ததுவதுவும்

தேனார் குழலி தனவு மனவுந் திகழ்படர்க்கை

ஆனா விறப்பில் தொழிற்பத மாறிற்கு மாய்ந்தறியே.

74

நின்றான் கிறானொடு நின்றாள் கிறாளிவை நின்றார்கிறார்

நின்றார்க ளோடிகின் றார்களு நின்றதுங் கின்றதுவும்

தென்றாத சீர்நின் றனகின் றனவுந் திகழ்படர்க்கைப்

பின்றா நிகழ்கை தொழிற்பத மாறிற்கும் பேர்த்தறியே.

75

வான்பானும் வாள்பாளும் வார்பாரும் வாகர்ளும் பார்களுஞ்சீர்

தான்பா வியவது வும்பது வுந்தத்தை யத்தைவென்ற

தேன்பாவுஞ் சொல்லி வனவும் பனவுந் திகழ்படர்க்கை

வான்பான் மலியு மெதிர்விற் றொழிற்பத மாறிற்குமே.

76

தாயாயுந் தீரீருஞ் சாற்றிய தீர்களொ டீர்களுமாஞ்

சாயாத முன்னிலை யின்னிறப் பாம் தன்மை தன்னிறப்பில்

தேயாத தேனேனுந் தேமேமுந் தோமோமு மாகும்என்ப

வேயார் பொதியத் தகத்திய னார்சொன்ன மெய்த்தமிழ்க்கே.

77

கிறாஅய்நின் றாய்கிறீர் நின்றீர் கிறீர்கள்நின் றீர்களுமாய்

இறாநின் றனமுன் னிலையி னிகழ்ச்சி இதன்கண் தன்மை

கிறேஎன்நின் றேன்கிறோம் நின்றேம் கிறோமுநின் றோமுமென்றாம்

தெறாநன்ற கட்பவ ளந்திகழ் வாய்நற் றிருந்திழையே

78

வாய்பாய்வீர் பீர்வீர்கள் பீர்க ளிவைமன்னு மின்னிலையில்

சாய்பாய் விடுமெதிர் காலம் இதனுழித் தன்மைசொல்லின்

வேய்பா வியதோளி வேன்பேன்வேம் பேமொடு வோம்போமுமாம்

சேய்பா வியசெழும் போதிப் பிரான்தன் திருந்துரைக்கே

79

ஓங்காத முன்னிலைப் பாலேவ லாங்கா லொருமையிற்சுப்

பாங்கார் சிறப்பிலா மேயுமின் கப்பன்மை யாமிடத்து

நீங்காத மின்களுங் கள்ளாம் இசைவினிற் கவ்வென்பதாம்

தாங்காப் பரோக்கத் தினிற்போலு மாமென்பர் தாழ்குழலே.

80

தன்மைத் துணிவா மொருமைவன் பன்தஞ்சம் போமொடுவோம்

பன்மைக்க ணன்றிப் படர்க்கையின் கண்ணும் மொருமையிலாம்

பன்மைக்கண் வர்பர்கள் ளோடாகு முன்னிலை தன்னொருமைத்

தன்மைச் சிவைதிபன் மைக்கி விசிப்பித்திப் பின்னரவே.

81

வினைக்குறிப் போடு கருமம்படர்க்கையின் மிக்கவொன்றை

அனைத்தென்ன லாம் அவ் வொடுபடுத் தாதுபின் னாமியற்கை

தனைக்கரு மம்பெறும் தாதுக்கள் மற்றும் படுவினைப்போல்

நினைக்க வரும் மற் றிவையும் பெயர்ச்சொல் நிகர்த்திடுமே.

82

ஈரெட்டு மூவைந்து மாமுடல் தேற்றவு மீற்றுவன்மை

தேரிட்டு மூன்றா முடலொடு தேற்றவுஞ் சிந்தைசெய்து

நேரிட் டுரைப்ப ரறிவொன் றிலாதவர் நீயவற்றைப்

பாரிட்ட மாகப் பெரியோர் தமதுரை பார்த்தறியே.

83

மதத்திற் பொலியும் வடசொற் கிடப்புந் தமிழ்மரபும்

உதத்திற் பொலியேழைச் சொற்களின் குற்றமு மோங்குவினைப்

பதத்திற் சிதைவு மறிந்தே முடிக்கபன் னூறாயிரம்

விதத்திற் பொலியும் புகழவ லோகிதன் மெய்த்தமிழே.

கிரியா பதப் படலம் முற்றும்

பொருட்டொகை வெண்பா 1

வேற்றுமை யெட்டுந் திணையிரண்டும் பாலைந்தும்

மாற்றுதற் கொத்த வழுவேழும் – ஆறொட்டும்

ஏற்றமுக் காலமிட மூன்றோ டிரண்டிடத்தால்

தோற்ற வுரைப்பதாஞ் சொல்.

பொருட்டொகை வெண்பா 2

திணைபால் மரபு வினாச்செப் பிடஞ்சொல்

இணையா வழுத்தொகையோ டெச்ச –மணையாக்

கவினையபார் வேற்றுமையுங் காலமயக் குங்கொண்

டவிநயனா ராராய்ந்தார் சொல்.

சொல்லதிகாரம் முற்றும்.

3. பொருளதிகாரம்

பொருட்படலம்

84

ஆற்று மகமே புறமே யகப்புற மன்றிவென்றி

போற்றும் புறப்புற மென்றாம் பொருள் அளப் பானளவை

ஏற்றும் பிரமேய மென்றும் வகுப்பர் இவையுமன்றிச்

சாற்றும் புலவரு மெண்ணிறந் தாரென்பர் தாழ்குழலே.

85

முல்லை குறிஞ்சி மருதத் தொடுமுது பாலைநெய்தல்

சொல்லிய காஞ்சி சுரநடை கைக்கிளை பாலைதும்பை

இல்லவண் முல்லை தபுதாரந் தாபத மேய்ந்தவள்ளி

அல்லது காந்தள் குறுங்கலி வெட்சி யடல்வஞ்சியே.

86

குற்றிசை வாகை கரந்தை பெருந்திணை கொற்றநொச்சி

பற்றிய பாசறை முல்லை யுழிஞை யெனப்பகர்ந்த

மற்றிவை யையைந்து மாம்பொருள் நான்கினும் வண்புகட்சி

பற்றிய பாடாண் பொதுவிய லாதியும் பார்த்தறியே.

87

முல்லை குறிஞ்சி மருதத் தொடுபாலை நெய்த லைந்துஞ்

சொல்லு மகமா மதனுக் குரைதொகு சட்டகமோ(டு)

எல்லை நிகழு மிருபதொ டேழுள ஏனையவற்(று)

ஒல்லை நிகழு முரையு மறிந்துகொள் ஒண்ணுதலே.

88

சட்டக மேதிணை கைகோள் நடைசுட் டிடங்கிளவி

ஒட்டிய கேள்வி மொழிவகை கோளுட் பெறுபொருளென்(று)

இட்டிகச் சொற்பொருள் எச்ச மிறைச்சி பயன்குறிப்புக்

கட்டக மெய்ப்பாடு காரணங் காலங் கருத்தியல்பே.

89

ஏற்றும் விளைவொ டுவம மிலக்கண மேய்ந்ததொல்லோர்

போற்றும் புடையுரை யேமொழி சேர்தன்மை யேயுமன்றி

ஆற்றும் பொருளடை வென்றா முரையல் லவற்றினுக்கு

மாற்ற முரையும் வகுக்கு முரையு மதித்தறியே.

90

மலையிருள் முன்பனி கூதிர்வெற் பன்கண மூங்கில்மஞ்ஞை

இலைமலி வேங்கைசெங் காந்த ளிலவ மிகல்முருகன்

சிலைமலி குன்றுவர் தேனே புணர்தல் தினைசுனையுங்

கொலைமலி யானை குறிஞ்சியென் றின்ன குறிஞ்சியிலே.

91

ஓதிய வேனி லொடுபின் பனியகில் வெம்பரலே

தீதியல் வேடர் கலையொள் விடலைதிண் பாலையத்தங்

கோதியல் செந்நாய் பருந்தொடு கொம்பனை யார்ப்பிரிதல்

வாதியற் கன்னி குறும்பர்வெம் பாலை மடவரலே.

92

காடுகார் மாலை யிடையர் முதிரைகான் யாறுமுல்லை

நீடுமால் கொன்றை நிரைமேய்த்த லோடு நெடுங்குருந்தங்

கேடில்கார் தோன்றி சிறுபான் கிழத்தி மனையிருத்தல்

பீடுசேர் புன்கு பிறவுமுல் லைத்திணை பெண்கொடியே.

93

பொற்றா மரையிந் திரன்பொய்கை பூந்தார் பழனஞ்செந்நெல்

வற்றா வெருமை வளர்பனி நீர்நாய் வடமகன்றில்

தெற்றா மனையூட லூரன் கடைசியர் செங்கழுநீர்

சுற்றா மருதத் திணையிலுண் டாவன தூமொழியே.

94

மீனே கடல்பனி கொண்கன் திமிலம் விளரிநிலாக்

கானே தரும்புன்னை கண்டலன் னஞ்சுறாக் காதலுப்பு

வானோர் வருணன் முதலை நுளைய ரிரங்கல்கைதை

தேனே தருமொழி யாய் அந்தி நெய்தல் தெளிந்தறியே.

95

ஏற்று முதுபாலை பாசறை முல்லை யியன்றவள்ளி

தோற்றுஞ் சுரநடை யில்லவண் முல்லைதொல் காந்தளன்றி

மாற்றுங் குறுங்கலி தாபதங் குற்றிசை கைக்கிளையோ(டு)

ஆற்றும் பெருந்திணை யாந்தபு தார மகப்புறமே.

96

வெட்சி கரந்தை விறல்வஞ்சி காஞ்சி யுழிஞைநொச்சி

உட்கிய தும்பையென் றேழும் புறமுயர் வாகைதன்பின்

கொட்கும் பொதுவியல் பாடாண் புறப்புறங் கொண்டிவற்றை

உட்கு மதுவிட் டுரவோ ருரைப்படி யோர்ந்தறியே.

97

ஒருப்பாடு நற்சொற் செலவொற் றுரைப்புப் புகல்பொருதல்

விருப்பாநிரைகொண் டவரைத் தடுத்தல் நெறிசெலுத்தல்

செருப்பாடு கைப்படை காத்தூர் புகல்திறங் கூறிடுதல்

பருப்பாடு பாலாற் களித்தல்வெட் சித்திரம் பான்மொழியே.

98

ஓடாப் படையாண்மை யுன்ன நிரைமீட்டல் மன்னர்வெற்றி

கோடாத் திறங்கூறல் தன்திறங் கூறுதல் கொற்றப் பொற்றார்

சூடாப் பொலிகுத லாரம ரோட்டல் துகளறுகல்

தேடாப் பொறித்தல் கரந்தைத் திறமற்றுந் தேர்ந்தறியே

99

அரவ மெடுத்தல் வயங்கிய லீகை விலக்கருமை

விரவு தனிச்சே வகம்வென்றி கூறலுவென் றார்விளக்கம்

நிரவும் வழிவொடு சோற்று நிலைகொற் றவர்மெலிவும்

பரவு தழிஞ்சியென் றின்னவை வஞ்சியின் பாற்படுமே.

100

நிலையாமை வாழ்த்து மயக்க முதுமை நிலையினொடுந்

தொலையா மகிழ்ச்சி பெருமைதீப் பாய்தல் சுரத்திடைத்தன்

தலையார் கணவன் தனையிழத் தல்தனி யேயிரங்கல்

கலையார் மனைவிபெய் சூளுற வென்றிவை காஞ்சியென்னே.

101

வேந்தன் சிறப்பு மதிலே றுதல்வென்றி வாட்சிறப்புக்

காந்தும் படைமிகை நாட்கோ ளொடுகாவ லேமுடிகோள்

ஏந்துந் தொகைநிலை கொற்றநீர்ப் போர்ச்செல்வ மூர்ச்செருவே

போந்த முதிர்வு குறுமையென் றாமுழி ஞைப்புணர்ப்பே.

102

நாற்குலப் பக்கமுக் காலங் களவழி நற்குரவை

ஆற்றல்வல் லாண்வேட்கை யார்பக்க மேன்மை யரும்பொருளே

தோற்றிய காவல் துறவு கொடைபடை யாளர்பக்கம்

மாற்றிய வொற்றுமை யோடுமற் றும்மிவை வாகையிலே.

103

நிலைபாழி கோளொடு வாளாட் டுடைபடை நீள்களிற்றின்

தொலையார் மலைவிவை தும்பை விகற்பங்கள் தொன்மைமிக்க

தலையாய நூலவை தன்னினுங் கண்டிங் கொழிந்தவெல்லாஞ்

சிலையாகு நன்னுதல் மாதே அறிந்துகொள் செப்பிடவே.

104

புகட்சி பரவல் குறிப்புக் கொடிநிலை கந்தழியே

இகட்சி மலிவள்ளி யென்றிவை யாறு நெறிமுறையில்

திகட்சி மலைதரு பாடாண் பகுதிசெப் பாதனவும்

இகட்சியுண் டாகா வகைதேர்ந் தறித லியல்புடைத்தே.

பொருட்படலம் முற்றும்

பொருளதிகாரம் முற்றும்

5 யாப்பதிகாரம்

யாப்புப் படலம்

105

குறிலு நெடிலு மெனுமிவை யேரசை குற்றெழுத்துப்

பெறின்முன் இவையே நிரையசை யாம் பிழைப் பில்லைபின்பொற்

றிறினும் அசையிரண் டொன்றின்முற் சீர்மூ வசையொன்றிநேர்

இறுவ திடைச்சீர் நிரையிறிற் பிற்சீர் எனவியம்பே.

106

கருவிளங் கூவிளந் தேமா புளிமா எனக்கலந்து

மருவிய நான்கு முதற்சீர்க ளாம் மற் றிவற்றினந்தத்

துருவமாங் காய்வரி னாமிடைச் சீர்ஒண் கனிவருமேற்

செருமவற் வேற்கண்ணி னாய் கடைச் சீரெனத் தேர்ந்தறியே.

107

இருசீரு முச்சீரு நாற்சீரு மைஞ்சீரு மைந்தின்மிக்கு

வருசீரு மந்தரங் கால்தீப் புனலொடு மண்பெயரால்

திரிசீ ரடியாங் குறள்சிந் தளவு நெடிற்றகைமை

தெரிசீர்க் கழிநெடி லென்று நிரனிறை செப்புவரே.

108

முன்னிரண் டாவியு மீறுமை யும்மோனை முன்னவற்றின்

பின்னிரண் டாவியு மேழுமெட் டும்மோனை ஆறுமைந்தும்

பன்னிரண் டாமுயிர் முன்னிரண் டும்மோனை பண்ணுந் தச்சப்

பின்னிரண் டாநஞ மவ்வும்வவ் வும்மோனை பெண்ணணங்கே.

109

என்றா முதலள வொத்திரண் டாமெழுத் தொன்றிவரிற்

சான்றா ரதனை யெதுகையென் றோதுவர் தன்மைகுன்றா

மூன்றாவ தொன்ற லிரண்டடி யொன்றன் முழுதுமொன்றல்

ஆன்றா வினமுயி ராசிடை யாய்வரும் ஆங்கதுவே.

110

பத்தியங் கத்திய மென்றிரண் டாஞ்செய்யுள் பத்தியமேல்

எத்திய பாதங்க ளால்வந் தியலு மெனமொழிந்த

கத்தியங் கட்டுரை செய்யுளின் போலிக் கலந்தவற்றோ

டொத்தியல் கின்றமை யாலொன்று தாமு முரைத்தனரே.

111

ஒன்று மிடைச்சீர் வருஞ்சீ ரொடு முதற் சீர்கள்தெற்றும்

என்று மளவடி யீற்றடி யல்லன ஈற்றடியும்

நன்று மலர்காசு நாள்பிறப் பென்றிற்ற சிந்தடியே

துன்றுங் கடைச்சீர் புகாவென்பர் வெள்ளையிற் றூமொழியே.

112

வேண்டிய ஈரடி யாற்குறள் ஆம் மிக்க மூவடியால்

தூண்டிய சிந்தியல் நான்கடி நேரிசை தொக்கதனின்

நீண்டிய பாதத்துப் பஃறொடை யாம் இத நேரிசையே

நீண்டிசை யாங்கலி நேரிசை பேதிக்கி வின்னிசையே.

113

ஈற்றயன் முச்சீர் வரினே ரிசையாம் இணைக்குறட்பா

ஏற்ற குறள்சிந் திடையே வரும் நிலை மண்டிலப்பாச்

சாற்றிய தன்னே ரடியா லியலும் தலைநடுவீ(று)

ஆற்றிய பாதத் தகவ லடிமறி மண்டிலமே.

114

தரவொடு தாழிசை சுற்றும் அராகமம் போதரங்கம்

உரவுடை நற்றனி வாரமென் றாங்கலி ஓர்ந்ததனை

வரலிசை நேரிசை யம்போ தரங்கம்பின் வண்ணகமே

விரவிய கொச்சகம் வெண்கலி யென்று விகற்பிப்பரே.

115

வண்ணக வொத்தா ழிசைக்கா றுறுப்பென்பர் ஐந்துறுப்பு

நண்ணுவ தம்போ தரங்கவொத் தாழிசை நான்குறுப்பாம்

எண்ணிய நேரிசை யொத்தா ழிசைதான் இறுதிசிந்தாய்த்

திண்ணிய நேரடி யால்வரும் வெண்கலி தேமொழியே.

116

நிலவுந் தரவுந் தரவிணை யும்நின்ற தாழிசைகள்

சிலவும் பலவுஞ் சிறந்து மயங்கியுஞ் சீர்விகற்பம்

பலவும் வரினும் பவளமுஞ் சேலும் பனிமுல்லையிங்

குலவுந் திருமுகத் தாய் கொண்ட வான்பெயர் கொச்சகமே.

117

சிந்துங் குறளு மடியென்பர் வஞ்சிக்குச் சீர்தனிச்சொல்

அந்தஞ் சுரிதக மாசிரி யத்தான் மருவும் வெள்ளை

முந்தி இறுதி யகவல தாகி முடியுமென்றால்

இந்து நுதன்மட வாய் மருட் பாவென் றியம்புவரே.

118

பாமுதல் நிற்பது கூன்வஞ்சி யீற்றினும் பாதத்துள்ளும்

ஆமிரண் டொத்து நிகழடி வெண்செந் துறையிழுகிப்

போமிசைச் செந்துறை சந்தஞ் சிதைகுறள் பூண்பலசீர்

தாமது வந்தங் குறைநவு மாங்குறட் டாழிசையே.

119

நான்கொடு மூன்றடி தோறுந் தனிச்சொல்லு நண்ணுமெனில்

தான்பெயர் வெள்ளை விருத்தம் முப் பாதந் தழுவிவெள்ளை

போன்றிறும் வெண்டா ழிசை மூன் றிழிவே ழடிபொருந்தி

ஆன்றவந் தங்குறை யின்வெண் டுறையெனப ராயிழையே.

120

மூன்றடி யொப்பன தாழிசை நான்காய்க் கடைய யற்கண்

ஏன்றடி நைந்து மிடைமடக் காயு மிடையிடையே

தோன்றடி குன்றியு மாகுந் துறை தொல் கழிநெடிலாய்

ஆன்றடி நான்கொத் திடிலை சிரிய விருத்தமன்றே.

121

ஈரடி யாதி யெனைத்தடி யாலும்வந் தீற்றில்நின்ற

ஓரடி நீளிற் கலித்தா ழிசை ஒலி யோர்விருத்தம்

நேரடி நான்காய் நிகழுமென் றார் நெடி லென்றுரைத்த

பேரடி நான்கு கலித்துறை யாமென்பர் பெய்வளையே.

122

நெடிலடி நான்கவை நேர்ந்துநின் றேபதி னாறெழுத்தாய்

முடிவன வாம்பதி னேழு நிரைவரின் முன்மொழிந்த

படிவழு வாது நடைபெறு மோசைவண் டேந்திநின்ற

கடிகமழ் கோதைக் கயநெடுங் கண்ணி கலித்துறையே.

123

துன்னுங் குறளடி நான்குவஞ் சித்துறை சிந்தடிநான்(கு)

உன்னும் விருத்தம் துறைமூன் றொருபொரு தாழிசையாம்

இன்னும் வரினு மடக்குக போலியென் றேற்பமுன்னூல்

பன்னு மவர்க்கு முடம்பா டெனவறி பைந்தொடியே.

124

மேவுங் குறள்சிந் தொடுதிரி பாதிவெண் பாத்திலதம்

மேவும் விருத்தஞ் சவலையென் றேழு மினியவற்றுள்

தாவு மிலக்கணந் தப்பிடி லாங்கவை தம்பெயரால்

பாவு நிலையுடைப் போலியு மென்றறி பத்தியமே.

125

எழுசீ ரடியிரண் டாற்குற ளாகும் இரண்டடியொத்

தழிசீ ரிலாதது சிந்தாம் அடிமூன்று தம்மிலொக்கில்

விழுசீ ரிலாத திரிபாதி நான்கடி மேவிவெண்பாத்

தொழுசீர் பதினைந்த தாய்நடு வேதனிச் சொல்வருமே..

126

நேர்முந் துறிற்பதி னாறெழுத் தாகி நிரைமுதலாஞ்

சீர்முந் துறீற்பதி னேழிய் முடிந்துசெப் பாரடிகள்

ஏர்முந்து நான்கொத் திருபது சீரா லியன்றிடுமேல்

தேர்முந்து பேரல்குன் மாதே அஃது திலதமன்றே.

127

அளவோ ரடிபோ லொருநான்கு பேத மிலாதுமெய்ப்ப

துளதே லஃது விருத்தமென் றேயறி உள்ளங்கொள்ளுங்

களவே நுழைந்து கயலினு நீண்டு கடுவடுவின்

பிளவே யனைய பெருமதர் யாட்டத்துப் பெய்வளையே.

128

இடையு முதலுங் கடையுங் குறைந்து மிடையிடையே

அடையு மடிகுறைந் தும்வரி னான்கடி யப்பெயரால்

நடைமுந் தியன்ற சவலையென் றோதுவர் நான்கின்மிக்க

தொடையுந் திறம்புவ தாய்விடிற் போலி துடியிடையே.

129

ஒன்றாதி யென்ப ரொருசா ரவரொரு நான்குமுன்னாம்

என்றா லினிதுசந் தத்தி னெழுத்தை யிருபதின்மேல்

நன்றாய வாறுபர் வாமென் றுரைப்பர்நற் றண்டகமேற்

பின்றாத கட்டளை நான் குமுன் னாகிப் பெருகிடுமே.

130

ஏறிய நெட்டெழுத் தேநெடி லொற்றே யெழில்வடநூல்

கூறிய சீர்க்குறி லொற்றே குருவாம் குறிலதுவே

வேறியல் செய்கை யிலகுவென் றாகும் வியன்குறிலும்

ஈறிய லிற்பிறி தாமொரு காலென் றியம்புவரே.

131

ஒப்பா ருறழ்ச்சியுங் கேடுமுத் திட்டமு மொன்றிரண்டே

னப்பா லிலகு குருச்செய் கையுமந்தச் சந்தங்களால்

துப்பார் தொகையி நிலவ ளவுமென்று சொல்லிவைத்தார்

செப்பார் தெளிவுக ளாறையுஞ் சீறடித் தேமொழியே.

132

ஆதி யினிற்குருப் பாதம்வைத் தாதிக் குருவதன்கீழ்

ஓதிய சீரில குத்தன்னை யாக்கி யொழிந்தவற்றை

மூதியன் மேற்படிக் கொப்பித்து முன்புறப் பாழ்கிடக்கின்

தீதிய லாக்குருக் கொண்டே மறைக்க திறப்படவே.

133

ஏறு மடியெனைத் தாவது கெட்டதென் றாலவ்வெண்ணைத்

தேறும் படியரை செய்தி லகுக்கொள்க சேரினொற்றை

வேறு முருவொன்று பெய்தரை செய்து வியன்குருவைத்

தீறு திகழு மளவு மியற்றுக விப்படியே.

134

காட்டிய வீடெனைத் தாவதென் றாலதன் கண்ணெழுத்திற்

கூட்டிய வொன்றாதி கொண்ட திரட்டித்துக் கோப்பியல

நாட்டிய சீரில குக்களின் மேனண் ணியவிலக்கம்

ஈட்டியங் கொன்றிட் டுரைக்கு மிதனையுத் திட்டமென்ன.

135

ஓங்கிய சந்தத் தெழுத்துக் களைவீ டிரண்டொருமூன்

றாங்கிய னான்கைந்தொ டாறே ழெனவிரண் டாலிசைத்துத்

தாங்கிய வீடொன்றொன் றீறொழித் திட்டுத் தமதயலெண்

பாங்கிற் றொகுத்து லகுக்குருப் பெய்து பகர்தொகையே.

136

தொகைநான் கிடமிட் டெழுத்தான் முரணித் தொடருமரை

தகையாத வண்ண நடுவன வாற்றித் தருங்கடையிற்

சிகையாக விட்டெழுத் தோடில குக்களுஞ் சீர்க்குருவும்

மிகையாகு மாத்தி ரையுமடை வேயறி மெல்லியலே.

137

எழுத்த ளவுமிரண் டேமுத வா\ஃக்கொண் டிரட்டிசெய்யக்

குழுத்த விறுதித் தொகையே தொகை குல வுந்தொகையை

அழுத்த விரட்டிசெய் தங்கொன்று நீக்க வதுவுறழ்வால்

விழுத்த வியன்ற நிலத்தின் விரலென்ப மெல்லியலே.

138

மருவு நெடில்குறில் வல்லொற்று மெல்லொற் யிடையிலொற்றென்று

உருவந் திகழ்ந்தவை யுய்க்குங் குறிகளொப் பார்நிரைநேர்

துருவ மலிபுள்ளி வட்டம் வலகென்பர் தொன்மைகுன்றாத்

திருவு மழகும் புகழுந் திகழ்தரு தேமொழியே

139

இப்படிக் கட்டளைத் துண்டமொன் றாக்கிய தீரிரண்டில்

ஒப்புடை யெட்டிற் பதினாறி னின்முப்பத் தோரிரண்டிற்

செப்பிட வாக்குக தண்டகம் வல்லொற்றல் லாதவொற்றுத்

துப்புட னுச்சா ரணையினல் லான்மிகத் தோன்றரிதே.

140

மெல்லிசை யேந்த லொழுகுருட் டெண்ணொரு வேமுடுகு

வல்லியல் பாவகப் பாட்டு நலிவகைப் போடியைபு

சொல்லிய சித்திரந் தாவு புறப்பாட் டளபெடையும்

வல்லிசை தூங்கல் நெடுஞ்சீர் குறுஞ்சீ ரிவைவண்ணமே.

யாப்பதிகாரம் முற்றும்

யாப்புப்படலம் முற்றும்

5 அலங்காரம்

அலங்காரப் படலம்

141

உரையுட லாக வுயிர்பொரு ளாக வுரைத்த வண்ணம்

நிரைநிற மாநடை யேசெல வாநின்ற செய்யுட்களாக்

தரைமலி மானிடர் தம்மலங் காரங்கள் தண்டி சொன்ன

கரைமலி நூலின் படியே யுரைப்பன் கனங்குழையே.

142

சார்ந்த வழக்கொடு தப்பா வடவெழுத் தைத்தவிர்ந்து

தேர்ந்துணர் வார்க்கு மினிமையைத் தந்துசெய் யுட்களினும்

நேர்ந்து சொலப்பட் டுயர்ந்தவ ரால்நிர லேபொருளை

ஓர்ந்து கொளப்படுஞ் சொற்குற்ற மற்ற வுறுப்பென்பரே.

143

தெற்றி வழக்கொடு தேர்ந்துணர் வார்க்கின்பஞ்செய்யலின்றிப்

பற்றி வடநூ லெழுத்துக்க ளோடு பயின்றுரையின்

மற்றிவை யில்லென்று வாங்கவும் பட்டுப் பொருண்மருண்டிப்

பெற்றி யுடைச்சொற் பழித்த வுறுப்பென்று பேசுவரே.

144

ஆக்குதல் கேட்டவர்க் கின்பத் தினையன்றி யவ்வவரே

போக்குதல் செய்த கருத்திற் பொருளாய்ப் புராதனரால்

நீக்குதல் செய்தகுற் றத்தைக் கடத்தல் நெறிமுறையே

தாக்குதல் செய்த பொருள்காண் சிறப்புயிர் தாழ்குழலே.

145

ஈண்டுஞ் சிலீட்ட முதாரதை காந்தி புலன்சமதை

தூண்டுஞ் சமாதி பொருட்டெளி வோகஞ் சுருமாரதை

ஈண்டுமின் பத்தொடு பத்தாவி யென்னும் விதர்ப்பன் கௌடன்

வேண்டு மிவற்றை விபரீத மாக விளங்கிழையே.

146

ஈண்டுஞ் சிலீட்ட முதாரத்தை காந்தி புலன்சமதை

தூண்டுஞ் சமாதி பொருட்டெளி வோகஞ் சுகுமாரதை

ஈண்டுமின் பத்தொடு பத்தாவி யென்னும் விதர்ப்பன் கௌடன்

வேண்டு மிவற்றை விபரீத மாக விளங்கிழையே.

147

ஒப்பார் பொருளே யுயிரா னமையி னுரைத்தவற்றைத்

துப்பா ரலங்கார மாகத் தொகுக்கச்சொல் லும்பொருளுஞ்

செப்பார் தாமுற்றி லேயலங் காரந் திகழ்வதன்றேல்

தப்பார் தருமென்று கண்டுரைத் தார்பண்டு தண்டிகளே.

148

செறிவார் சிலீட்டம் தொகைமிகை யாம்ஓகம் சீர்ச்சமதை

அறிவா ரடியொப்ப தாகும் சமாதி யவனிக்கொப்பப்

பிறிவார் குணமொன்ற தொன்றிற் கிடப்பன மென்மையொன்றின்

நெறிவார் குழலி சுகுமா ரதையென்று நேர்ந்துரையே.

149

ஆனா வழகினைக் காந்தியென் கின்ற ததுதமிழின்

நானா விதமாய் நடைபெற் றியலு நனிபுகட்சி

தானா மிடத்தினும் வார்த்தையின் கண்ணுந் தலைசிறந்து

தேனாய் விதர்ப்பருக் குங்கவு டர்க்குந் திறப்படுமே.

150

திரப்பியஞ் சாதி தொழில்குண மாந்தன்மை சீருவமை

பரப்பிய வொப்பாம் உருவக மாவ ததன்றிரிவு

காப்பிய சொல்லெங்கு மொன்றே யுபகார மேல்விளக்கு

நிரப்பிய மீட்சியு மற்றதன் போலி நிரைவளையே.

151

கூறும் பிறபொருள் வைப்புத் தடைமொழி கொள்பொருளில்

ஏறு மிரண்டிலொன் றேறும் விதிரேக மேதுவின்மை

தேறும் விபாவனை யன்றித் திகழ்சுருக் கேபெருக்கே

ஈறு மிகுநோக்க மெது நுணுக்க மிலேசு மென்னே.

152

அடைவு மகிழ்ச்சி கலையூக்க மாம்பரி யாயமொழி

அடைவு மலிதுணைப் பேறொடு தாத்த மவநுதியு

முடைவு நிகழுஞ் சிலேடை சிறப்பொ டுடனிலைச்சொற்

புடையின் முரணுவ லாச்சொற் புரிவில் புகழுச்சிசுட்டே.

153

ஆக்கு மொருங்கிய லேபரி மாற்றத்தொ டாசிவிராத்

தாக்கு மொழிப்பா விகமிவை யேழைந்துந் தண்டிசொன்ன

வாக்கு மலியலங் கார மெனவறி மற்றுமின்ன

நோக்கு மெனிற்பல வாமலங் கார நடங்கிடையே.

154

புகழ்ச்சி பழிப்பு விரோதங் கருத்திசை யுண்மையையம்

இகழ்ச்சி யெதிர்ப்பொரு ளற்புத நோக்கித ரேதரந்தா

னிகழ்ச்சி மிகைபண் புயர்வு நியம மநியமமுந்

திகழ்ச்சி மலிதடை தெற்றுச் சிலேடை துணிவென்பரே.

155

உம்மை பொருளினொ டொப்புமை கூட்ட ம்பூதத்தொடு

செம்மை திகழ்வாக் கியப்பொருள் கோவைதிண் காரணமும்

வெம்மை மயக்கம் பலவியல் விக்கிரி யத்தினொடு

மெய்ம்மையிற் சந்தா னமுமென் றுவமை விகற்பிப்பீரே.

156

பட்டாங் குரைத்தல் புகழ்தல் பழித்தலிற் பண்புபயன்

சிட்டார் தொழில்வடி வாதி யுவமை செறிந்துறுப்புத்

தட்டா தியலும் பொருளு முவமையுஞ் சார்பொதுவாய்

முட்டா மலேநிகழ் காரண மும்பெறு மொய்குழலே.

157

ஒப்பி லுவமை யிழிவுயர் வோடு முயரிழிவு

துப்பில் சமமே தலைப்பெயல் கூற்றுத் தொகை விரிவு

தப்பி லுறழ்ந்து வரலோ டொருவழி யோர்பொரு ண்மேற்

செப்புச் சினைமுத லொப்பு மறையென்று தேர்ந்தறியே.

158

தெற்றுத் தொகையவ் வியமேதுப் பண்பு விரியுவமை

மற்றுச் சிலேடை சகல மியைபு வரப்புணர்ந்த

முற்றுத் தொகைவிரி தன்னோ டவயவி முந்துறுப்புப்

பெற்றுப் பயிறத்து வாபனந் தன்னோ டியைபிலியே.

159

தாக்குஞ் சமாதான மேவிதி ரேகந் தடைமொழியும்

ஊக்கு முருவகத் தோடொன் றுருவக மேகாங்கமென்

றாக்கு முருவக மைநான்கொன் றாம்பிற வந்தனவும்

நீக்கு வனவிட்டுத் தொல்லோ ருரைப்படி நேர்ந்தறியே.

160

தேரும் பொதுவே சிறப்பு நிலையே சிலேடையன்றி

யேரும் முரணியை போடியை பின்மை யியைபுதம்மிற்

பேரும் விரவிய லேநற் பிறபொருள் வைப்புத்தண்டி

சீரும் பொலிவு மலியுந்தன் ணூலினிற் செப்பியதே.

161

ஆசி யனாதரங் காரணங் காரிய மையமேதுப்

பேசு முபாயஞ் சிலேடை முயற்சி பிறபொருள்வைப்(பு)

ஏசில் கருணைநட் போடு கரும மிகழ்ச்சிவன்சொல்

தேசி னிரக்கந் தலைமை யனுசயஞ் செற்றமென்னே.

162

வெப்பந் தருமம் பரவசத் தோடு வியன்குணமற்(று)

ஒப்புப் பொருளின் தடைமொழி தன்னை உரைத்துணர்ந்து

செப்ப முடையவர் காலங்கண் மூன்றிற் றிருத்திப்பின்னும்

எப்பண்பு கொண்ட விகற்பம் வரினு மியற்றுவரே.

163

ஒருமை யிருமை சிலேடை யுயர்பினோ டெதுவன்றிப்

பெருமை மலிசாதி யொப்பாம் விதிரேகம் பேசுதொழில்

அருமை மலிகுணஞ் சாதியென் றாகுமவ் வேதுவுமற்(று)

இருமை நிகழ்ஞா பகங்கா ரகமா மிலங்கிழையே.

164

பாவும் விபாவனை பல்லோ ரறியும்பரிசொழித்து

மேவு மியல்பு குறிப்பேது நீக்கி விளைவுரையாம்

வீவில் கவிதான் கருது பொருளை வெளிப்படுத்தற்

கோவிய மேசுருக் காமறை சொல்லி னுரைத்திடினே.

165

அருளு மதிசய மான்றோர் வியப்ப துலகிறவாப்

பொருள்குண மையந் துணிவு திரிவெனப் போற்றுவரால்

பெருகிய நோக்கது தற்குறிப் பேற்றம் பெயர்பொருளாய்

வருவதும் பேராப் பொருளது மாக வகுத்தனரே.

166

ஏது வுரைப்பி னிதுவிது வின்விளை வென் றுரைத்தல்

ஓதிய காரக ஞாபக முள்ளதொ டொன்றினொன்று

மாதி யபாவ மழிவுபா டென்று ம்பாவமின்மை

தீதி லொருங்குடன் றோற்றம்யுத் தாயத்தஞ் செப்புவரே.

167

திகழு நுணுக்கங் குறிப்பிற் றொழிலிற் றிறமுணர்த்தல்

நிகழு மிலேசமெய்ச் சத்துவம் வேறு நெறியினுய்த்தல்

இகழு மொழியிற் புகழ்தலு மேத்திய வின்னுரையிற்

புகழு நடையிற் பழித்தலும் போற்றுவர் பொற்கொடியே.

168

நிரனிறை யாவது சொல்லும் பொருளு நிரனிறுத்தல்

விரவு மகிழ்ச்சி யுளநிக ழார்வம் விளம்புமொழி

உரிய சுவைதா னிரதமேம் பாட்டுரை யூக்கமென்ப

பசியாய மோர்பொருள் தோன்றப் பிறிது பகர்தலென்னே.

169

தாங்குஞ் சமாயிதந் தான்முயல் செய்தி தனதுபயன்

ஆங்கத னாலன்றி மற்றொன்றி னால்வந்த தாகச்சொல்லல்

தீங்கி லுதாரதை செல்வமு முள்ளமுஞ் சீர்மைசெப்பல்

ஓங்கு மவனுதி யுண்மை தவிர வுரைத்திடலே.

170

செப்புஞ் சிலேடை யொருதிறஞ் சேர்சொற் பலபொருளை

ஒப்ப வுணர்த்தல் ஒருவினை பல்வினை யோங்குமுரண்

துப்புறழ் வாயின் சொலாய் நிய மத்தோ டநியம்முந்

தப்பில் விரோதத் துடனவி ரோதமுஞ் சாற்றினரே.

171

செல்லுஞ் சிறப்புத் தொழில்குண மங்கஞ் சிதைந்திடினு

நல்ல பயன்பட நாட்டல் உடனிலைச் சொன்னயந்து

சொல்லுங் குணமுத லொத்த தொகுத்தல் சொலும்பொருளும்

புல்லும் விரோதம் புணரின் முரணென்ப பொற்றொடியே.

172

மாறி யிகழ்மொழி வண்புக ழாய்நுவ லாச்சொல்வரும்

தேறுந் தெரிவில் புகழ்ச்சியொன் றைப்பழிக் கப்பிறிது

கூறிப் பகழுதல் சுட்டா நிகழ்பயன் கொள்பொருளில்

வேறு படநன்மை தீமை வெளிப்படல் மெல்லணங்கே.

173

துப்பா ரொருங்கியல் தூய விணைபண் பிரண்டுபொருட்(கு)

ஒப்பா வொருசொல்லு வைப்ப துயர்பரி மாற்றமது

செப்பார் பொருண்மா றிடல் திக ழாசியின் சீர்மைசொலின்

தப்பாத வாசீர் வசன மெனவுணர் தாழ்குழலே.

174

பண்பு தரும்பல் லலங்காரஞ் சேர்ந்து பயிலுவது

நண்பு தரும்விரா வாம் பா விகமது நற்கவியின்

ஒண்பொரு ளின்றொடர் காப்பிய முற்றி னுரைபெறுமால்

விண்புடை நின்றிடை யைச்சீ றியமுலை மெல்லியலே.

175

ஈண்டிய முற்றேக தேச வுவமை யுருவகமென்

றோண்டொரு மூன்றா வுருவக மோதுவர் காரணமுந்

தூண்டு மகார ணமுமா மிகைமொழி சொல்வர் எல்லாம்

வேண்டிய வேண்டிய வாறு விகற்பிப்ப மெல்லியலே.

176

யாப்பை யியம்பிடின் முத்தக மோடு குளகந்தொகை

காப்பிய மாம் முத் தகந்தன் பொருளோர் கவியின்முற்றும்

வாய்ப்பின் குளகம் பலபாட் டொருவினை மன்னுதொகை

கோப்பிற் பொருளன காப்பிய மாநூல் கொடியிடையே.

177

ஆதியு மீறு மிடையு மடி யொன்றி லேமடக்கும்

ஓதிய பாதங்க ணான்கினு மாம் ஒரு பாதமுற்றுந்

தீதிய லாமை மடக்கலு முண்டு தெரிந்தவற்றைக்

கோதிய லாமை விகற்பத் தினிலறி கோல்வளையே.

178

தந்திர வுத்தி குணமத மேயுரை தர்க்கந் தன்னில்

வந்திய லெண்கோன் முதலா யுளமாலை மாற்றுமுன்னா

வந்தியல் சித்திர மென்றின் னவுமலங் காரமென்றே

தந்திய லச்சிலர் சொன்னா ரவற்றையுஞ் சார்ந்தறியே.

179

ஏறிய மாலைமாற் றேசக் கரமினத் தாலெழுத்தாற்

கூறிய பாட்டு வினாவுத் தரமேக பாதமன்றித்

தேறிய காதை கரீப்புச் சுழிகுளஞ் சித்திரப்பா

வீரியல் கோமூத் திரியும் பிறவும் விரித்துரையே.

180

இடையே வடவெழுத் தெய்தில் விரவிய லீண்டெதுகை

நடையேது மில்லா மணிப்பிர வாளநற் றெய்வச்சொல்லின்

இடையே முடியும் பதமுடைத் தாங்கிள விக்கவியின்

தொடையே துறைநற் பிரளிகை யாறி துணிந்தறியே.

181

மறங்களி தாது வயிரபஞ் சம்பிர தந்தவசுக்

குறங்கணி கம்முத லாந்துறை யாகுங் குவலயத்தே

திறம்பல போக்குங் கிளவிக் கவிசெய் யுளின்பயனே

அறம்பொரு ளின்ப மொடுவீ டெனவறி ஆரணங்கே.

அலங்காரம் முற்றும்.

வீரசோழியம் முற்றும்