அன்பு வெள்ளம்/அன்பின் வெல்லும்

by புலவர் த. கோவேந்தன்

அன்பின் வெல்லும் ஆற்றல்

வாழ்க்கையில் எதற்கு இடம் கொடுத்தாலும் கொடுக்கா விடினும், அன்புக்கு இடம்தர வேண்டும்; அதிலும் அன்பே முதலிடம் பெற வேண்டும்.

இந்தக் கருத்தில் நம்பிக்கையுள்ளவர், அன்பினை நாடுகின்றனர். பற்றார்வம் உள்ளவரின் உயிர் வாழ்க்கையின் மையமே அன்புதான்். 1.பேதுரு 4:8 "எல்லாவற்றிற்கும் மேலாக ஒருவரில் ஒருவர் ஊக்கமான அன்புள்ளவர்களாயிருங்கள்; அன்பு திரளான தீங்கு களை மூடும்"

இப்படித் தீங்குத் திரளை மூடும் அன்பு, பொதுவான அன்பில்லை, உச்சகட்ட அன்பு: யார் எவர் என்று பாராது நெகிழ்ந்து தன்னையே தரும் அன்பு. அறிவினால் ஆளப்படும் அன்பில்லை; கட்டுபாடற்ற அன்பு, கட்டுக்கடங்காத அன்பு.

அவ் அன்பு திரளான தீமைகளை வாராமல் தடுக்கும், வந்திடினும் திருப்பி அனுப்பும், அழிக்கும். அதே அன்பு, பூசலும் மனக்கசப்பும் அற்றதோர் பண்புலகில் கொண்டு சேர்க்கும் அவ் அன்பு. இயேசுவின் அன்பு போன்ற அளப்பரும் அன்பு, உயர் நிலை அன்பு: உலப்பில்லா அன்பு. உச்சநிலை அன்பு.

மீமிசைமாந்தர் அடையாள முத்திரைகள் அனைத்தும் தன்னகத்தே கொண்டது அன்பு. தோல்விகளையும், பலவீனங்களையும் அவற்றைச் சார்ந்த அனைத்தையும் வென்றிடக் கூடியது அன்பு. பாசமற்ற பேச்சும் கட்டுக்கதைகளும் அன்பிடத்திலிருந்து வாரா. நெஞ்சத்தின் அடித்தளத்திலிருந்து தனியாப் பற்றுடன் வெளிப்படும். போலியற்ற உண்மையான அன்பு. அந்த அன்பு தான், சிறப்பேதுமற்ற இடத்தில் இருக்கும் ஒருவரைச் சீரும் சிறப்பு மிக்க தன்னிடத்தில் கொணர்ந்து சேர்ப்பது.

இத் தகு புதியபாணி அன்பு, காலங்கள் கண்ட அற்புதம். அனைத்துயிர்கள் நலமும் மகிழ்வும் பெற்றிட விழைவதும் பணிகள் புரிவதும் நம்மில் இருந்து செயல்படும் அன்பு.