தமிழியக்கம்/பாட்டியற்றுவோர்

by பாரதிதாசன்

⁠௧௯. பாட்டியற்றுவோர்

தமிழிசைப்பாட் டியற்றுபவர்
    தமிழர்களாய் இருந்தால்தான்
        தமிழ்த்தென் பாங்கில்
அமைவுபெறும்! பார்ப்பனனும்
    தமிழறிவுக் கயலானும்
        அமைக்கும் பாடல்,
அமுதொத்த தமிழின்மேல்
    எட்டியையும் வேம்பினையும்
        அறைத்துப் பூசித்
தமிழர்க்கே தமிழ் என்றால்
    தனிக்கசப் பென் றாக்கிவிடும்
        தானும் சாகும்! ⁠91

மனமேஈசனின் நாமம்
    வாழ்த்துவாய் எனும் வேத
        நாயகன் தன்
இனிதான பாடலைப்போல்
    திருடுவதற் கில்லை யெனில்
        இங்கோர் பார்ப்பான்
தனதாய் ஒன்றுரைப்பான் அத்
    தமிழ்ப்பாட்டில் தமிழுண்டோ ?
        எள்ளின் மூக்கத்
தனையிருப்பின் இரவுதனை
    “ரா” என்றே சாற்றியிருப்
        பான்அப் பாட்டில்! ⁠92

செந்தமிழில் அன்புடையார்
    சிலபார்ப்பார் இருந்தாலும்
        அவரை, மற்றச்
செந்தழற்பார்ப் பார்கெடுக்கப்
    பார்ப்பார் இத்தமிழ்வாழப்
        பாரார் அன்றோ!
அந்தமிழால் உடல்வளர்ப்பார்
    ஆரியந்தான் தமதென்பார்.
        ஆரியத்தில்
இந்தவரி என்னஎனில்
    யாம்அறியோம் எம்பாட்டன்
        அறிந்தான் என்பார் ⁠93

மறை அறியார் எனினும் அவர்
   மறையவராம் என்றுரைப்பார்!
       இலக்கணத்தின்
துறையறியார் எனினும் அவர்
   தூயதமிழ் எழுத்தாளர்
       என்று சொல்வார்!
குறையுடையார் எனினும் அவர்
   குதித்திடுவார் யாம் மேலோர்
       கூட்டம் என்றே!
அறையிமிவை பெருந்தமிழர்
   ஆழ்ந்தநெடுந் தூக்கத்தின்
       பயனே அன்றோ! ⁠94

இயற்கை எழில் என்னென்ன?
    இனியதமிழ் நாட்டின்சீர்
        என்ன? மற்றும்
செயற்கரிய நந்தமிழர்
    என்னென்ன செய்தார்கள்?
        செந்தமிழ்க்காம்
முயற்சி எவை நாட்டிற்கு
    முடிப்பதென்ன ? இவையனைத்தும்
        தனித்த மைந்த
வியத்தகுசெந் தமிழாலே
    வெல்லத்துத் தென்பாங்கில்
        பாடல் வேண்டும். ⁠95