சுயமரியாதை இயக்கம் தோன்றியது
11
மூன்றாண்டு காலம், தமிழ்நாட்டின் மூலை முடுக்குகளில் எல்லாம், பகுத்தறிவுச்சுடரை ஏற்றித் தன்மானப் பொத்தானைப் பொருத்தி விட்ட பெரியார், இயக்கத்தின் சார்பில் மாநாடுகளைக் கூட்டத் தலைப்பட்டார்.
முதல் மாகாண சுயமரியாதை மாநாடு 1929 ஆம் ஆண்டு பிப்ரவரித் திங்கள் செங்கற்பட்டில் கூட்டப்பட்டது. அது சமுதாயப் புரட்சிக்கு வித்தாக அமைந்தது. அறுபது ஆண்டுகளுக்கு முன்பு, எல்லாச் சாதியினரும் சேர்ந்து உண்ணும் சமபந்தி உணவு என்பது நடைமுறையில் இல்லை. அதைப் பற்றிச் சிலரே பேசத் துணிந்தவர்கள். அவர்களும், அதைப் பொது நடவடிக்கையாக்க இயலவில்லை. ஈ.வெ.ராவோ அதை, முதல் சுயமரியாதை மாநாட்டின் இன்றியமையாத பகுதியாக்கி விட்டார். முதன் முறையாக, பல சாதிகளைச் சேர்ந்த ஏறத்தாழ ஆறாயிரம் பேர்கள் ஒன்றாக அமர்ந்து, உண்ட புரட்சியைக் கண்டேன். அன்று கல்லூரி மாணவனாகிய நானும் பங்கு கொண்டேன்.
