இப்பக்கம் சரிபார்க்கப்பட்டது.
மாரி: என்னமோ அப்பா, நீ கொடுத்து வைத்தவன். என் கதியைப்பாரு, நாத்திகப் பயலிடம் நான் அடிபட்டு, கோர்ட்டுங்கையுமாக நிற்கிறேன்.
வெங்: அதோ, யாரோ, கோவிந்தா கோவிந்தான்னு கூவிண்டு வர்ரா, நான் போய் வரட்டுமா? மன்னார்! தங்கைக்குத் துணையா இரு. தைரியத்தை விடாதேம்மா.
[வெங்கடேசர் போனதும்]
மாரி: ஏதோ, சில்காட்டான் போலச் சிலபேர், நம்மைச் சீரழிச்சாலும், சிதம்பரம் செட்டியார்களைப்போலே ஆதரிக்கிறவாளும் இருக்கா.
மன்னார்: சந்தேகமென்ன, சந்தேகமென்ன.
காட்சி 4
இடம்: ஒரிசா பிரதேசம், பாலசோர்பட்டினம்.
பாத்திரங்கள்: 70 பிணங்கள், மாரி, மன்னார்சாமி, சட்டசபை மெம்பர், மாஜிஸ்ட்ரேட்.
[வெங்கடேஸ்வரரைக் கண்டபிறகு மாரியும், மன்னார்சாமியும் ஒரிசா பிரதேசத்தில், பாலசோர் பட்டினத்திலே பிரவேசிக்க அங்கு 70 பிணங்கள் கிடக்கக்கண்டு]
மாரி: மன்னார் இதென்னப்பா கோரம்? எழுபது பிணங்கள் கிடக்கின்றன. யாரோ இரண்டு பேர் கணக்கெடுக்கிறார்கள்.
மன்னார்: நீங்கள், இப்படியே இருங்கள். நான் போய் விசாரித்துக்கொண்டு வருகிறேன்.
