குழந்தைக் கவிஞரின் கதைப் பாடல்கள்-தொகுதி-1/கரும்பின் ருசி

by குழந்தைக் கவிஞர் அழ. வள்ளியப்பா

 

கரும்பின் ருசி



மறுநாட் காலை பொங்கல் விழா.
வாங்கிக் கரும்புடன் தேங்காய்கள்
குறும்புக் குப்பனின் தந்தையுமே
கொண்டு தம்வீடு வந்தடைந்தார்.

குப்பனின் நாக்கில் நீர்வழிய
‘குடுகுடு’ என்றே ஓடிவந்தான்.
அப்பா விடமுள்ள கரும்பினையே
அவசர மாகப் பறிக்கவந்தான்.

“படைத்த பிறகுதான் தின்றிடலாம்.
பதறிடல் பயனில்லை” என்றுரைத்தார்.
தடுத்திடும் தந்தையின் மொழிகளினால்
தாங்கொணாக் கோபம் கொண்டனனே.

அப்பா கரும்பினைத் துண்டுகளாய்
அறுத்துமே பானையில் வைத்தனரே.
அம்மா பானையை வைக்குமிடம்
அறிந்தனன் குப்பன்; மகிழ்ந்தனனே.

பூனைபோல் இரவில் எழுந்தவனும்
போயினன், யாவரும் தூங்குகையில்.
பானையின் உள்ளேகை விட்டனனே;
பல்லால் கரும்பைக் கடித்தனனே.

“ஐயையோ!” என்றஓர் சத்தமுடன்
அலறித் துடித்துக் குதித்தனனே.
கையை உதறியே கத்துவதைக்
கண்டனர் பெற்றோரும், ஓடிவந்தே.

கரும்பினைக் கடித்தவன் வாயினேயே
கடித்தது கரும்பினில் மொய்த்திருந்த
எறும்புகள் தாமென்று யாவருமே
எளிதினில் உண்மை அறிந்தனரே!

“பொழுது விடியும் வரையிலும்நீ
பொறுத்திட லாகாதோ?” என்றுரைத்தே
அழுதிடும் கண்கள் துடைத்ததுடன்
அவனது பெற்றோர்கள் தேற்றினரே.