குழந்தைக் கவிஞரின் கதைப் பாடல்கள்-தொகுதி-1/குதிரை கொடுத்தது!

by குழந்தைக் கவிஞர் அழ. வள்ளியப்பா

 

குதிரை கொடுத்தது!

“கையி லுள்ள ரேகை தன்னைக்
கவன மாகப் பார்த்துமே,
ஐய மின்றிக் குறிகள் சொல்வார்
அடுத்த ஊரில் வந்துளார்.”

என்றே ஒருவர் சொல்லக் கேட்டே,
எழுந்து வேணு என்பவர்
சென்றே அங்த மனிதர் தம்மைத்
தேடிப் பிடித்துக் கூறினார் ;

விரைவில் பணத்தைச் சேர்க்க நானும்
விரும்பு கின்றேன். ஆதலால்,
குறுக்கு வழிகள் ஏதும் உண்டோ ?
குறிகள் பார்த்துக் கூறுவீர் ?”

கையைப் பிடித்துப் பார்த்து விட்டு,
“கணக்காய் நானும் கூறுவேன்.
ஐயா, குதிரை யாலே நீங்கள்
அடைவீர் செல்வம், நிச்சயம்”

என்று கூற அதனைக் கேட்டே
இன்பம் கொண்ட வேணுவும்,
அன்றே குதிரைப் பந்த யத்தில்
ஆவ லாகக் கலந்தனர்.

குதிரைப் பந்த யத்தில் அவரும்
கொஞ்சங் கொஞ்சமாகவே,
அதிகப் பணத்தை இழந்து மிகவும்
அல்லற் பட்டுத் திரும்பினர்.

திரும்பி அவரும் வந்த போது
திடுதிப்பென்று வேகமாய்,
அருகில் வந்த குதிரை வண்டி
அவரின் மீது மோதவே,

வலது கையும் முறிந்த தையோ!
வைத்தி யர்கள் பார்த்துமே,
பலனே இல்லை; ஆத லாலே,
பாவம், நொண்டி யாயினார்!

‘கஷ்டம் மிகவும் பட்டேன், இந்தக்
கையொ டிந்த தால்’ என
நஷ்ட ஈடு கோரி ரூபாய்
நான்கு நூறு பெற்றனர்.

குறிகள் சொன்ன மனிதர் மீது
குற்றம் உண்டோ ? சொல்லுவீர்.
சிறிதும் இல்லை. குதிரை யாலே
செல்வம் வந்த தல்லவா?