குழந்தைச் செல்வம்/அரசே எழுந்திரு

by கவிமணி தேசிக விநாயகம் பிள்ளை

3. அரசே எழுந்திரு

அப்பா! எழுந்திரையா!
      அரசே! எழுந்திரையா!
கொக் கொக்கோ என்று,
      கோழி அதோ கூவுது பார்! 1

கா கா கா என்று,
      காகம் பறக்குது பார் !
கிழக்கு வெளுக்குது பார்!
     கிரணம் பரவுது பார்! 2

பூ மலர்ந்த ரோஜா
     புதிய மணம் வீசுது பார்!
வந்து வந்து வண்டு
     வட்டம் சுழலுது பார்! 3

கறவைப் பசுவை அதன்
      கன்று சுற்றித் துள்ளுது பார்!
பால் குடிக்க வேண்டாமோ?
      பழம் தின்ன வேண்டாமோ? 4

பாடங்கள் எல்லாம்
      படித்திட வேண்டாமோ?
சீக்கிரம் பள்ளிக்குச்
      சென்றிட வேண்டாமோ? 5

காலையும் ஆச்சுதையா!
      கண்விழித்துப் பாரையா!
அப்பா! எழுந்திரையா!
      அரசே ! எழுந்திரையா! 6